Moto akoki kosepela na oyo azali na yango?

“Kosepela na oyo ozali na yango ekómisaka babola bazwi; kozanga kosepela na oyo ozali na yango ekómisaka bazwi babola.”​—Benjamin Franklin.

LISESE yango ezali solo, mpo bato mingi bamoni ete kosepela na oyo ozali na yango esombamaka te. Tokoki kokamwa te ndenge ezali mpasi mpo moto asepela mpenza na oyo azali na yango na mokili oyo ezali kotinda bato bákolisa mposa ya kozala na biloko mingi, kosala makambo minene, to koluka kozala lokola basusu! Makambo oyo elandi ekómelá yo?

• Bato oyo basalaka bapiblisite bamonisaka yo ete mpo osepela esengeli osomba lisusu biloko mosusu.

• Na mosala to na eteyelo bato balendisaka yo omona ete okozala na valɛrɛ kaka soki ozali kosala makambo ndenge basusu bazali kosala.

• Bato bamonisaka botɔndi te na oyo osalaka mpo na bango.

• Baninga basalaka ete olula biloko oyo bazali na yango.

• Ozwaka biyano te na mituna ya ntina oyo omitunaka mpo na bomoi.

Ntango moto akutani na makambo ya ndenge wana akoki mpenza kosepela na oyo azali na yango? Ntoma Paulo alobelaki “sekele ya kosepela na oyo ozali na yango.” Na bantango mosusu azalaki na biloko mingi mpe na bantango mosusu azalaki na biloko moke. Baninga na ye bazalaki kosepela na ye kasi basusu bazalaki kotyola ye. Kasi, alobaki ete “ayekolaki kosepela na oyo azali na yango ata na libaku nini.”​—Bafilipi 4:11, 12, Biblia New International Version.

Kosepela na oyo ozali na yango ekoki kozala mpasi mpo na moto oyo azangi ezaleli yango, kasi ndenge Paulo amonisaki yango, moto akoki koyekola ezaleli yango. Tosɛngi yo sikoyo otalela sekele mitano oyo ezali na Biblia, Liloba ya Nzambe, oyo ekoki kosalisa moto asepelaka na oyo azali na yango.