Ebongi mpenza kosalela yango milende!

LOSAMBO na libota mpe boyekoli ya Biblia ezali na ntina mingi mpo bana bábɔkwama “na disiplini mpe na makebisi ya Yehova.” (Ef. 6:4) Kasi, soki ozali moboti, oyebi ete bana mike baumelaka te kolongola likebi na makambo. Ndenge nini okoki kokoba kobenda likebi na bango? Talá ndenge baboti mosusu basalaki.

George, na Californie, na États-Unis, alobi boye: “Ntango bana bazalaki naino mike, ngai ná mwasi na ngai tozalaki kosala milende mpo ete boyekoli ya Biblia na libota ezalaka ntango nyonso elɛngi. Na bantango mosusu biso nyonso tozalaki kolata lokola bato oyo Biblia elobeli mpe tozalaki kosana lisolo oyo tozali kotánga na buku Mokanda mpo na masolo ya Biblia. Tozalaki kutu kosala bisaleli​—mipanga, mangenda, bitunga, mpe biloko mosusu ya ndenge wana. Tozalaki mpe kosala lisano ya ‘ngai nani’ mpo na koyeba bato oyo Biblia elobeli mpe tosalaki lisano moko oyo ezalaki na mituna ya Biblia, mosusu ya pɛtɛɛ mpe mosusu ya makasi. Tozalaki mpe kosala makambo mosusu, na ndakisa kotonga masuwa lokola oyo ya Noa to kosala etanda ya badati oyo emonisi ndenge masolo ya Biblia ezalaki kolandana. Na bantango mosusu tozalaki kosala bililingi oyo emonisi bato to masolo ya Biblia. Mikolo oyo tozali kokana kosala liyemi ya molato ya etumba ya elimo oyo Baefese 6:11-17 elobeli, mpe mokomoko na biso akolimbola eteni mokomoko. Mayele wana esalisi biso tósepela na boyekoli na biso ya libota.”

Debi, mama moko na Michigan, na États-Unis, alobi boye: “Ngai ná mobali na ngai tozalaki kokoka te kobenda likebi ya mwana na biso ya mwasi ntango azalaki na mbula misato. Nde mokolo moko ntango nazalaki kotánga na mongongo makasi lisolo ya Yisaka ná Rebeka na buku Mokanda mpo na masolo ya Biblia, nazwaki bana-popi mibale mpe nasalaki lokola kolobisa yango, moko Yisaka, mosusu Rebeka. Sikoyo akómaki kolanda na likebi liloba nyonso! Na basanza oyo elandaki, tosalelaki bana-popi yango mibale mpo na komonisa bato mosusu mingi oyo Biblia elobeli. Nsima ya kotánga lisolo moko, mwana na biso ya mwasi apanzaka ndako mobimba mpo na koluka bana-popi yango to biloko mosusu oyo tokoki kosalela mpo na komonisa ndenge lisolo elekaki. Ezalaki lokola lisano ya koluka eloko ya motuya! Kɛsi ya sapato mpe nsinga ya motane ekómaki ndako ya Rahaba ná nsinga ya motane oyo ezalaki na ndako yango. Tosalelaki nyoka moko ya kopale ya mɛtrɛ moko ná ndambo oyo elíngami na nzete ya nkɔmbɔ mpo na komonisa nyoka ya motako oyo elobelami na Mitángo 21:4-9. Tozalaki kobomba bisaleli yango na kati ya kitunga moko monene ya kapo. Tosepelaka mingi komona mbala mingi mwana na biso ya mwasi afandi na salon mpe azali kopanzapanza biloko na ‘kitunga na ye mpo na masolo ya Biblia.’ Ezalaka mpenza esengo komona ndenge azali kosana masolo yango na ndenge na ye!”

Kobɔkɔla bana ezali pɛtɛɛ te; esuki te kaka na boyekoli ya pɔsɔ na pɔsɔ mpo na kokɔtisa mposa ya kosalela Yehova na mitema na bango. Kasi, losambo na libota mpe Boyekoli ya libota ekoki kosalisa mingi mpo na kopesa bana mateya mosusu. Na ntembe te, ebongi mpenza kosalela yango milende!