Mpo na nini kotosa oyo Biblia elobi?

MIBEKO ya Biblia na oyo etali kosangisa nzoto ezali te makambo ya kala mpe oyo ezangi ntina. Kutu, mibeko yango ekoki kobatela biso na:

▪ Bamaladi oyo ezwamaka na kosangisa nzoto

▪ Zemi ya balabala

▪ Mawa mpe mpasi oyo moto ayokaka soki libala na ye ekufi

▪ Lisosoli oyo ezali kotungisama

▪ Kosambwisama

Yehova Nzambe,a Mozalisi na biso, alingi tósepela na makabo oyo apesaka biso mpe tózwela yango matomba. Nzambe azali “Moto oyo azali koteya yo mpo na litomba na yo moko.” (Yisaya 48:17) Moto oyo atosaka mibeko ya Biblia na makambo ya kosangisa nzoto azwaka matomba oyo:

▪ Nzambe asepelaka na ye

▪ Azalaka na kimya ya motema

▪ Ayokanaka malamu ná bato ya libota na ye

▪ Ayebanaka lokola moto ya mobulu te

▪ Apesaka nzoto na ye kilo

Kasi, okoki kosala nini soki otosaka mibeko ya Biblia te? Okoki kotika makambo ya mabe oyo osalaka? Nzambe akolandela yo mpo na mabe oyo osalá?

Kanisá naino: Bato mosusu oyo bakómaki bakristo na siɛklɛ ya liboso bazalaká liboso bato ya pite, ya ekobo, mpe oyo basangisaka nzoto mibali na mibali. Batikaki bizaleli yango, mpe yango ememelaki bango matomba mingi. (1 Bakorinti 6:9-11) Lelo oyo, ebele ya bato na mokili mobimba bazali mpe kosala bongo. Batiki mobulu ya basi to ya mibali mpe bamoni ete kotosa mibeko ya Biblia ezali malamu mingi. Talá ndakisa ya Sarah oyo tolobelaki na lisolo ya liboso.

“Nayokaki mbala moko ete motema ekiti”

Sarah amonaki ete mobulu ya mibali epesaki ye te bonsomi mpe esengo oyo azalaki koluka. Alobi boye: “Nazalaki komona ete lisosoli na ngai ezalaki kosala lisusu te. Nazalaki koyoka nsɔni mpe kobanga ete nalɔkɔta zemi to maladi ya mabe. Nazalaki kaka kondima ete Nzambe azali, mpe nayebaki ete makambo oyo nazalaki kosala ezalaki kosepelisa ye te. Nazalaki komona ete nazali salite mpe nazalaki komitungisa mingi.”

Nsukansuka, Sarah azwaki makasi ya kotika mobulu ya mibali. Asɛngaki baboti na ye oyo bazali Batatoli ya Yehova básalisa ye. Alukaki mpe ete bankulutu ya lisangá básalisa ye. Sarah alobi boye: “Nasepelaki mingi na bolingo oyo baboti na ngai mpe bankulutu bamoniselaki ngai. Nayokaki mbala moko ete motema ekiti.”

Lelo oyo, Sarah azali kobɔkɔla bana mibale ye moko. Alobi boye: “Nayebisaka bana na ngai polele nzela oyo ngai nalandaki. Nalingaka báyeba epai oyo koboya kotosa mibeko ya Nzambe ememaki ngai. Nalingi kosalisa bango báyeba matomba oyo moto azwaka na nzoto mpe na elimo soki azali kotosa mibeko ya Nzambe na makambo etali kosangisa nzoto. Nandimi mpenza ete Nzambe apesi biso mibeko mpo alingaka te tókutana na mikakatano.”

Yo mpe okoki kozwa matomba ya kotosa mibeko ya Nzambe. Biblia elobi ete mibeko ya Yehova ezali malamu, esepelisaka motema, ezali pɛto mpe kobatela yango, ememelaka moto matomba.​—Nzembo 19:8, 11.b

[Maloba na nse ya lokasa]

[Likanisi ya paragrafe na lokasa 8]

Mbala mingi, bato oyo batosaka mibeko ya Biblia te bayokisaka basusu mpasi na motema

[Likanisi ya paragrafe na lokasa 9]

Bato oyo batosaka Biblia bazalaka na kimya ya motema mpe bayokanaka malamu ná bato ya libota na bango