Ndenge nini okoki kosolola na moto ya lingomba ya Bahindu?
1 Ndenge oyebi yango, bato ya Lingomba ya Bahindu bazali kofanda na mikili ndenge na ndenge, ata mpe na mboka na biso. Yango elingi koloba ete mokolo mosusu okoki kokutana na moto ya Lingomba ya Bahindu wana ozali na mosala ya kosakola. Soki okutani na moto ya Lingomba ya Bahindu, ndenge nini okosolola na ye?
2 Omikundwela makambo oyo: Bamisionere oyo basololaki na bato ya Lingomba ya Bahindu balobaka ete ezali na ntina te ete oyeba mateya ya lingomba yango na mozindo mpo na kosolola na bango malamu. Komonisa moto mateya ya solo kozanga mindondo mpe na mayele mbala mingi ebimisaka matomba ya malamu. Luká kosolola liboso na tata ya libota. Soki andimi, ekozala mpasi te osolola mpe na bato mosusu ya libota na ye. Uta na ebandeli, osengeli te komonisa na molobani na yo ete omemeli ye nsango moko oyo eleki bindimeli na ye to komonisa ye ete olingi kosolola na ye na ntina na Nzambe bobele moko ya solo to kosolola na ye mpo na makomi mosantu oyo eumeli koleka mikanda mosusu nyonso. Lokola bato mingi ya Lingomba ya Bahindu batalelaka Biblia lokola buku ya bato ya mikili ya Mpoto, okoki kosalisa ye alongola makanisi wana soki olimboleli ye ete Biblia esɛngaka te ete bato mosusu báyangela baninga na bango bato (colonialisme) to esɛngaka te ezaleli ya komona ete bato ya mposo boye baleki bato ya mposo mosusu.
3 Salelá mikanda oyo ebongi: Tozali na mwa babuku mibale oyo ebongisami mpo na bato ya Lingomba ya Bahindu: Pourquoi adorer Dieu en amour et en vérité? mpe Nos problèmes—Qui nous aidera à les résoudre? Mwa babuku yango nyonso mibale ezali na Lifalanse. Mwa babuku oyo elandi: “Tala, nazali kozalisa biloko nyonso biloko na sika” mpe Nzambe azali mpenza komibanzabanza mpo na biso? epesaki matomba malamu ntango bandeko basalelaki yango epai ya bato ya Lingomba ya Bahindu. Tokoki mpe kosalela mwa buku Azali kosɛnga mpe buku Boyebi mpo na koyekola Biblia na bato ya Lingomba ya Bahindu.
4 Lukyá makambo oyo bokoyokana na yango: Ezali mpasi te mpo na kozwa likambo oyo bokoki koyokana na yango na moto ya Lingomba ya Bahindu. Bandimaka ete tozali kobika na eleko oyo mabe ekómi mingi koleka mpe ete Nzambe akolongola bampasi na mokili na nzela ya likama moko monene oyo ekolandana na eleko moko oyo solo ekofuluka. Lokola tokoki komona, ezali mpasi te mpo na koyokanisa bindimeli yango na mateya ya Biblia oyo elobeli mikolo ya nsuka, bolɔzi monene, mpe mokili ya sika oyo ezali koya. Lokola bato mingi ya Lingomba ya Bahindu batalelaka bomoi lokola kolandana ya mikakatano oyo likoki ezali te ya kosilisa yango, basepelaka mingi na masolo ya bomoi ya libota, koboma bato mpe libateli, mpe balukaka koyeba nini ekómelaka biso soki tokufi. Talá ndakisa mibale ya bilakiseli oyo okoki komeka kosalela yango:
5 Oyo ekoki kosepelisa tata ya libota:
◼ “Nazali kosolola na bato oyo bazali komitungisa mpo bomoi ya libota ezali se kobeba na bikólo mingi na mikolo na biso. Mpo na yo, okanisi ete nini ekoki kosalisa bato ya libota moko bázala na bomoko? [Tiká ye ayanola.] Bato mosusu bayebi makambo oyo mikanda ya Lingomba ya Bahindu ezali koloba na ntina na libota, kasi naino bátala te oyo Biblia ezali koloba na ntina na likambo yango. Nakosepela kolakisa yo makanisi oyo ezali na Bakolose 3:12-14.” Nsima ya kotánga mokapo yango, lakisá ye mokapo 15 ya buku Boyebi mpe lobá na ye ete: “Nakosepela soki opesi ngai mwa ntango mpo tótalela mokapo yango elongo.”
6 Elakiseli oyo ekoki kosepelisa elenge:
◼ “Ntembe ezali te ete ondimaka ete Nzambe azali. Mpo na yo, mokano ya Nzambe ezali nini mpo na biso?” Tiká ye ayanola. Nsima, tángá Genese 1:28, mpe lobá boye: “Na bisika mingi mabelé etondi na bato mingi mpenza mpe etondi na mikakatano. Okanisi ete Mozalisi akolinga kosalisa biso ete tósilisa bampasi na biso?” Nsima ya koyoka eyano na ye, lakisá ye mokanda moko oyo ebongi.
7 Matomba ya kosepelisa: Mokolo moko ndeko mwasi moko azalaki kopesa litatoli na zando. Elenge mobali moko ya mibu 22 moto ya Lingomba ya Bahindu, ayaki kosolola na ye mpe asɛngaki ye ete ayekolisa ye Biblia. Elenge yango ayebisaki ndeko mwasi ete esili koleka mbula mwambe ayokaki ndeko mwasi yango kosolola makambo ya Biblia na mama na ye. Atako ye asepelaki na biyano ya malamu oyo Biblia ezali kopesa na ntina na bampasi ya bato, mama na ye asepelaki na yango te. Kasi ye amonaki ete azalaki naino elenge mpenza akokaki te kolanda mateya yango ye moko. Sikoyo, lokola akómi mokóló, azali na mposa ya koyekola makambo mingi. Elenge mobali yango alekisaki ntango te. Bobele nsima ya mikolo 23, asilisaki koyekola buku Boyebi, mpe sanza minei nsima ya kokutana na ndeko mwasi wana na zando, elenge yango amonisaki mposa ya kozwa batisimo!
8 Ndeko mobali moko abandaki koyekola Biblia na mobali moko ya Lingomba ya Bahindu oyo akutanaki na ye na engbunduka. Mobali yango azalaki na mikakatano mingi na libala na ye. Azalaki mpe kolangwa masanga. Mobali yango andimaki ete ndeko mobali wana akende kotala ye mpe kopesa ye toli ya Biblia mpo na bomoi ya libota. Mateya ya Biblia esepelisaki ye, mpe andimaki koyekola Biblia. Ye na libota na ye mobimba babandaki koyangana na makita. Nsima, babandaki koteya baninga na bango mpe bandeko na bango solo. Lelo oyo, bato motoba kati na bato yango nyonso basili kondima solo!
9 Mokano ya Nzambe ezali ete “bato [ya lolenge, NW] nyonso bábika mpe ete bákóma na boyebi koyeba solo.” (1 Tim. 2:4) Yango etaleli mpe mibali na basi oyo bazali na mangomba ya boklisto te, lokola bato ya Lingomba ya Bahindu. Soki bato ya Lingomba ya Bahindu bazali na teritware na bino, mpo na nini te kokende kotala bango noki mpe kosalela mwa makanisi oyo epesami na lisolo oyo?