Mosala ya kotonga Bandako ya Bokonzi ezali kokende liboso
1 Na ntango mayangani ya etúká na motó ya likambo “Bokonzi ya Nzambe esangisi biso esika moko” esalemaki na États-Unis na mobu 1983, liyebisi epesamaki ete mwa mbongo ekotyama pembeni mpo na kotonga mpe kobongisa Bandako ya Bokonzi na États-Unis mpe na Canada. Na ntango wana, toyebaki te ndenge oyo mapamboli ya Yehova ekokolisa likambo yango, oyo na ebandeli ezalaki kaka moke. Tobandaki komona mpenza malamu likambo oyo Nzembo 92:4 elobi na bosolo nyonso ete: “Mpamba te yo [Yehova] ozali kosepelisa ngai na misala na yo mpe nakoyembela na esengo misala ya mabɔkɔ na yo.”
2 Tozali sikoyo na esengo mingi mpo na misala nyonso oyo ezali kosalema. Lelo oyo, programɛ ya kotonga Bandako ya Bokonzi nokinoki ezali kotambola malamu. Ezala na lolenge nini, biso nyonso tozali na libaku malamu ya kopesa mabɔkɔ na mosala yango. Tosalaka yango ntango tozali kopesa makabo, ezala mbongo mingi to moke, oyo ekosalisa mpo na kotonga ebele ya bisika mosusu ya losambo na mokili mobimba. Lisusu, bandeko mingi bapesaka bisaleli na bango, ntango na bango, makoki na bango, mpe mayele na bango mpo na kosunga na misala yango. Ebongiseli yango ezali kolonga mpo Yehova azali kotambwisa, kosunga mpe kopambola milende na biso nyonso.—Nz. 127:1.
3 Bafiliale mingi elandi ndenge oyo ebongiseli yango esalemaki na masangá ya États-Unis. Na Bandako ya Bokonzi ya bikólo mingi, batyaka kɛsi oyo basakoli batyaka makabo na bango mpo na kotonga Bandako ya Bokonzi. Na États-Unis, Mosala na biso ya Bokonzi ya Marsi 1997 eyebisaki mbongwana oyo esalemaki na programɛ yango. Elobaki boye: “Kobanda la Société abandi kobongisa mbongo mpo kotonga Bandako ya Bokonzi na 1983, bandeko bapesaki makabo mingi mpenza, mpe yango epesaki likoki ya kodefisa mbongo mpo na kotonga Bandako ya Bokonzi. Ebongiseli yango esalisá masangá soki 2 700 na États-Unis. Soki yango te, mbɛlɛ masangá mingi batongá Bandako ya Bokonzi ya sika te to babongisá te oyo esengelaki kobongisama. Mposa ezali makasi sikoyo ya kosalela mbongo yango ya makabo mpo na kodefisa masangá na bamboka ya bobola. La Société mpe masangá oyo ezali kozwa matomba mpo na makabo na bino bazali na botɔndi mingi na ndenge bozali kokoba kopesa mabɔkɔ na ebongiseli yango.”
4 Liyebisi yango ezalaki nde mpo na kosɛnga kopesa mabɔkɔ na Programɛ ya kotonga Bandako ya Bokonzi nokinoki. Esengelaki mpe kopesa bandeko na biso ya mikili mosusu mbongo ya kotonga Bandako ya Bokonzi mpe kolanda kodefisa masangá ya États-Unis mbongo ya kotonga Bandako ya Bokonzi. Lisolo mosusu oyo ebimaki na Mosala na biso ya Bokonzi ya Augusto 1997 (na Lingelesi) elobi ete: “Mposa ya Bandako ya Bokonzi ezali makasi na mokili mobimba. Na boumeli ya mobu ya mosala 1996, masangá koleka 3 288 esalemaki, mingi na yango ezali na Afrika, na Amerika ya Ntei, na Amerika ya Sudi, na Azia mpe na Mpoto ya Ɛsti.”
5 Mbuma nini emonani kobanda ntango wana? Annuaire 2001 epesi lapolo oyo: “Na lisalisi ya ebongiseli oyo, kino sikoyo Bandako ya Bokonzi 453 esili kotongama na bikólo 30, mpe bazali naino kotonga mosusu 727. Bazali mingimingi koluka kotonga mitindo ya Bandako ya Bokonzi oyo ebongi na ekólo mokomoko mpe kosalela biloko mpe ndenge ya kotonga ya mboka yango. Na Kenya, bazali kosalela mabanga ya minene; na Togo, basalelaka mingi babiliki ya mabele; na Cameroun, basalelaka biliki ya sima, oyo na nsima bapakolaka yango sima. Na ndenge wana, bandeko ya bamboka yango bazali na likoki ya koyeba nokinoki mosala na ndenge esengeli mpo na kokokisa mikumba ya ntina mingi na kati ya mosala ya kotonga na mboka na bango.”
6 Na kɔntina monene ya Afrika, tokoki komona polele ndenge Yehova azali kopambola mosala yango. Na ntango ozali kotala bililingi ya Bandako ya Bokonzi mosusu oyo etongami, kanisá ndenge mosala ya kotonga bisika yango esalisi mpo mosala ya Batatoli ya Yehova ekende liboso! Emonani ete esalisi na makambo misato: bomoko ya lisangá na biso ya bandeko na mokili mobimba, ndenge oyo ebongoli likanisi ya bato ya kartye oyo bazali komona yango, mpe kobakisama ya bato na makita ya lisangá. Atako siplema oyo elobeli kaka Bandako ya Bokonzi oyo etongami na Afrika, Mosala na biso ya Bokonzi oyo ekobima nsima ekolobela ndenge oyo Mosala ya kotonga Bandako ya Bokonzi ezali kokende se liboso na bisika mosusu ya mokili.
[Bililingi na lokasa 3]
RÉPUBLIQUE CENTRAFRICAINE
Bimbo, Bangui
Begoua, Bangui
[Bililingi na lokasa 4]
Ukonga, Tanzanie
[Elilingi na lokasa 4]
Accra, Ghana
[Elilingi na lokasa 4]
Salala, Liberia
[Elilingi na lokasa 4]
Karoi, Zimbabwe
[Bililingi na lokasa 4, 5]
Allada, Benin—Ndako ya Bokonzi ya kala
Allada, Benin—Ndako ya Bokonzi ya sika
[Elilingi na lokasa 5]
Kpeme, Togo
[Elilingi na lokasa 5]
Sokodé, Togo
[Bililingi na lokasa 4, 5]
Fidjrosse, Benin
[Elilingi na lokasa 6]
Lyenga, Zambie—Ndako ya Bokonzi ya kala
[Elilingi na lokasa 6]
Lyenga, Zambie—Ndako ya Bokonzi ya sika
[Elilingi na lokasa 6]
Kinshasa, Congo
[Elilingi na lokasa 6]
Musambira, Rwanda