Makanisi mpo na ndenge ya kolakisa mwa buku Nzambe azali mpenza komibanzabanza mpo na biso?
Nsima ya kolobela likambo moko ya nsɔmɔ oyo eutaki kosalema, okoki koloba boye:
“Omituná naino te mpo na nini Nzambe atiki nzela ete bato bányokwamaka soki mpenza amibanzabanzaka mpo na biso? [Tiká ye apesa eyano.] Mwa buku oyo epesi eyano ya malamu na motuna wana mpe emonisi makambo oyo etikali moke Nzambe asala. [Lakisá elilingi ya lokasa 27, mpe tángá Nzembo 145:16, oyo ezali na paragrafe 22.] Ndenge nini Nzambe akosilisa bampasi nyonso ya bato? Nakosepela tótalela motuna yango ntango nakozongela yo mbala ya nsima.” Lakisá ye mwa buku, mpe bóyokana mpo ozongela ye.
Ntango okozongela ye,
okoki koloba boye:
“Ntango nayaki mbala eleki, totángaki vɛrsɛ oyo. [Tángá to lobá makambo oyo ezali na Nzembo 145:16.] Na nsima, natunaki motuna oyo: Ndenge nini Nzambe akosilisa bampasi nyonso ya bato?” Sɛngá ye azwa mwa buku na ye. Na nsima, fungolá na nkasa 27-28, mpe bótalela paragrafe 23-25. Sɛngá ye bóyekola na ye Biblia, to bóyokana mpo bótalela paragrafe 26-27 mbala ya nsima ntango okozongela ye.
―――◆―――
Mosakoli oyo azali elenge akoki koloba boye:
“Bilenge mingi lokola ngai bamitungisaka mingi na ndenge oyo mokili ekokóma nsima ya mbula 10 to 15. Okanisi ete bomoi ekozala ndenge nini na ntango wana? [Tiká ye apesa eyano.] Makambo tozali komona lelo oyo emonisi ete tozali na mikolo ya nsuka. [Tángá 2 Timote 3:1-3.] Mwa buku oyo ezali kopesa biyano na mituna elandi. [Tángá mituna oyo ezali na ezipeli, mpe pesá ye mwa buku yango.] Ntango nakoya lisusu, soki okozala na mwa ntango, nakosepela koyebisa yo likanisi moko ya kolendisa etali ndenge maladi mpe konuna ekosila.” Bóyokana mpo ozongela ye.
Ntango okozongela ye, okoki koloba boye:
“Ntango tosololaki mbala eleki, nalobaki ete nakosepela koyebisa yo likanisi moko etali ndenge maladi mpe konuna ekosila. Likanisi yango ezali awa.” Sɛngá ye azwa mwa buku na ye, bótánga mpe bólobela paragrafe 6-7, na nkasa 23-24. Bóyokana mpo bótalela paragrafe 8-9 mbala ya nsima.
―――◆―――
Soki mokóló moko azali kosakola elongo na mwana moko ya moke, akoki kobanda mpe koloba boye:
“Soki osepeli,________ akotángela yo vɛrsɛ moko. [Mwana akotánga Nzembo 37:29 mpe akolobela yango na mokuse.] Mwa buku oyo ezali kolobela ndenge oyo Nzambe akokokisa mokano na ye na ntina etali bato mpe mabelé. [Lakisá ye bililingi oyo ezali na nkasa 24-27.] Ntango tokoya lisusu, nakosepela komonisa yo elaka kitoko oyo Biblia epesi na ntina etali lisekwa.” Lakisá ye mwa buku, mpe yokaná na ye mpo ozongela ye.
Ntango bokozongela moto yango, mokóló yango akoki koloba boye:
“Na mbala eleki, totángaki Nzembo 37:29, mpe nayebisaki yo ete nakosepela komonisa yo oyo Biblia elobi na ntina etali lisekwa. Talá oyo balobi awa.” Sɛngá ye azwa mwa buku na ye. Na nsima, bótalela paragrafe 12-14, na nkasa 24-25. Sɛngá ye bóyekola na ye Biblia, mpe bóyokana mpo bótalela paragrafe 15-16 mbala ya nsima.