‘Tiká mokano ya Nzambe esalema’
1. Motó ya likambo ya liyangani ya mokolo moko mpo na mobu ya mosala 2012 ezali nini, mpe mpo na nini ebongi ete tótalela yango?
1 Tokelamá mpo yango ezalaki mokano ya Yehova. (Em. 4:11) Yango wana, mpo bomoi na biso ezala na ntina, tosengeli koyekola mokano ya Nzambe mpe kosala yango. Kasi yango ezali pɛtɛɛ te, mpamba te tosengeli kobundisa mposa oyo tozalaka na yango ya kosala ‘makambo oyo nzoto mpe makanisi elingaka’ to mposa ya kosala “mokano ya bikólo.” (Ef. 2:3; 1 Pe. 4:3; 2 Pe. 2:10) Soki tozangi lisalisi ya Nzambe, Zabolo ‘akoki ata kokanga biso na bomoi mpo na mokano na ye.’ (2 Tim. 2:26) Liyangani na biso ya mokolo moko mpo na mobu ya mosala 2012 ekosalisa mokomoko na biso ayokanisa bomoi na ye na likambo ya misato oyo tosengeli kosɛnga, oyo Yesu alobelaki na libondeli ya ndakisa, ete: “Mokano na yo esalema.”—Mat. 6:9, 10.
2. Tokozwa biyano na mituna nini na liyangani yango?
2 Mituna oyo tokozwa biyano na yango: Ntango okolanda liyangani yango, luká biyano na mituna oyo: Longola koyoka Liloba ya Nzambe, likambo nini mosusu ya ntina tosengeli kosala? Ndenge nini tokoki kokoba kososola mokano ya Nzambe mpo na biso? Mpo na nini tosengeli koluka kopesa litatoli na bato ya ndenge nyonso? Ndenge nini tokoki kozala na bomoi oyo ezali na ntina, mpe oyo epesaka esengo? Bilenge, likambo nini bosengeli komonisela Yehova? Mapamboli nini tokozwa soki tozali kosala mokano ya Nzambe? Mpo na nini ezali mpenza na ntina tólendisa basusu sikoyo?
3. Ndenge nini tokoki kozwa matomba na liyangani yango?
3 Salá nyonso mpo na kozala na liyangani mpe landá yango na likebi mpenza. Ntango mosusu, ndeko moko ya Betele to mokɛngɛli-motamboli moko akozala molobi-mopaya. Liboso to nsima ya liyangani, kokakatana te kosolola na ye mpe na mwasi na ye soki abalá. Ntango ozongi na ndako, kozala te “moyoki oyo abosanaka,” kasi bózongela na libota makambo oyo boyokaki na liyangani mpe bólobela ndenge oyo bokoki koyokanisa lisusu malamu makambo ya bomoi na bino na mokano ya Nzambe.—Yak. 1:25.
4. Mpo na nini ezali na ntina ete tótya likambo ya kosala mokano ya Nzambe na esika ya liboso?
4 Mosika te, baoyo balandaka bamposa na bango moko mpe baboyaka kosala mokano ya Yehova bakobomama. (1 Yoa. 2:17) Na yango, tozali na botɔndi mingi ndenge Yehova abongisaki mateya oyo eyei na ntango oyo ebongi mpo na kosalisa biso tótya mokano ya Nzambe na esika ya liboso!