Makambo mitano mpo na kozwa moto ya koyekola na ye Biblia
1. Soki na teritware na bino kozwa moto ya koyekola na ye ezali mpasi, osengeli kosala nini mpe mpo na nini?
1 Ozalaka na mokakatano ya kozwa moto ya koyekola na ye Biblia? Kobá koluka. Yehova apambolaka baoyo balɛmbaka te kosala mokano na ye. (Gal. 6:9) Makambo mitano oyo elandi ekosalisa yo.
2. Ndenge nini tokoki kosɛnga moto mbala moko ete tóyekola na ye Biblia?
2 Kosɛnga moto mbala moko: Bato mingi bayebi ete tokabolaka Linɔ́ngi ya Mosɛnzɛli mpe Lamuká!, kasi ntango mosusu bayebi te ete tosɛngaka mpe na bato ete tóyekola na bango Biblia. Mpo na nini te kosɛnga moto mbala moko ete oyekola na ye Biblia ntango ozali kosakola ndako na ndako? Okoki mpe kotuna bato oyo ozongelaka, oyo basepelaka na mateya na biso, soki bakosepela koyekola Biblia. Soki baboyi, okoki kokoba kotikela bango mikanda mpe kosalisa bango bákolisa bosepeli. Ndeko mobali moko azalaki kopesa mobali moko mpe mwasi na ye bazulunalo na boumeli ya bambula mingi. Mokolo moko, nsima ya kopesa bango bazulunalo ya sika, abalukaki mpo na kokende kasi likanisi eyelaki ye mpe atunaki bango boye: “Bokosepela koyekola Biblia?” Akamwaki ndenge bandimaki. Lelo oyo, mobali yango mpe mwasi na ye bazwá batisimo.
3. Tokoki nde koloba ete bato nyonso oyo bayaka na makita bayekolaka na bango Biblia? Limbolá.
3 Bato oyo bayaka na makita: Kokanisa te ete moto nyonso oyo ayaka na makita bayekola na ye Biblia. Ndeko mobali moko alobi boye: “Bato mingi oyo nayekolaka na bango Biblia, nazwaki bango na kosolola na bato oyo bayaka na makita.” Ndeko mwasi moko azwaki ekateli ya kosolola na mwasi moko ya nsɔninsɔni oyo bana na ye mibale ya basi bazalaki batatoli. Na boumeli ya mbula 15 mwasi yango azalaki koya na Ndako ya Bokonzi kaka ntango makita ebandi mpe kozonga mbala moko soki esili. Mwasi yango andimaki koyekola mpe nsukansuka akomaki motatoli. Ndeko mwasi akomi boye: “Epesaka ngai mawa ndenge nazelaki mbula 15 mpo na kotuna ye soki akosepela koyekola Biblia!”
4. Ndenge nini tokoki kozwa moto ya koyekola na ye Biblia na kotuna basusu?
4 Kotuna bato mosusu: Ndeko mwasi moko alɛmbaka te kokende kotika basakoli mosusu mpo na koyekola na bato. Na nsuka ya boyekoli, nsima ya kosɛnga ndingisa epai ya motambwisi, atunaka soki moto yango ayebi moto mosusu oyo akosepela mpe koyekola Biblia. Ntango ozali kopesa moto buku Biblia eteyaka okoki kotuna ye boye: “Oyebi moto mosusu oyo akosepela mpe kozwa buku oyo?” Ntango mosusu, ezalaka mpasi mosakoli to mobongisi nzela ayekola Biblia na moto oyo akutani na ye na teritware. Yango wana, yebisáká basusu ete okoki koyekola na moto Biblia.
5. Mpo na nini tokoki kotuna balongani ya bandeko ya lisangá, oyo bazali Batatoli te, soki bakolinga koyekola Biblia?
5 Molongani oyo azali Motatoli te: Na lisangá na bino, bozali na basakoli oyo balongani na bango bazali Batatoli te? Bato mosusu balingaka te balongani na bango oyo bazali Batatoli báyekola na bango Biblia, kasi bakoki kondima Batatoli mosusu báyekola na bango. Na yango, ekozala malamu kosolola liboso na mobali to mwasi oyo azali Motatoli mpo oyeba ndenge ya kosala.
6. Ndenge nini libondeli esalisaka ntango tozali kosala makasi ya kozwa moto ya koyekola na ye?
6 Libondeli: Kotyela nguya ya libondeli ntembe te. (Yak. 5:16) Yehova alaki ete akoyoka mabondeli na biso soki eyokani na mokano na ye. (1 Yoa. 5:14) Ndeko mobali moko oyo azalaki na makambo mingi ya kosala abandaki kobondela mpo azwa moto ya koyekola na ye Biblia. Mwasi na ye azalaki komituna soki mobali na ye akozwa mpenza ntango mpo na moyekoli yango, mingimingi soki moyekoli yango azali na makambo mingi. Mpe mwasi na ye ayebisaki Yehova likambo yango ntango azalaki kobondela mpo mobali na ye azwa moto ya koyekola. Bazwaki eyano ya mabondeli na bango nsima ya pɔsɔ mibale, ntango ndeko mwasi moko mobongisi nzela akutanaki na mobali moko oyo azalaki na mposa ya koyekola Biblia mpe apesaki ye na ndeko mobali yango. Mwasi ya ndeko mobali yango akomi boye: “Mpo na moto nyonso oyo akoki kokanisa ete koyekola na moto Biblia ekozala mpasi mpo na ye, asengeli kotika te kolobela mpenza likambo yango na mabondeli na ye. Tozwi esengo mingi koleka ndenge nazalaki kokanisa.” Soki yo mpe osali milende, okoki kozwa moto ya koyekola na ye Biblia mpe koyoka esengo ya kosalisa moto akɔta na ‘nzela oyo ememaka na bomoi.’—Mat. 7:13, 14.