Nzambe oyo asalá biso ayebisi biso bilaka na ye

Kobanda Nzambe asalá bato, azalaki koyebisa bango nsango na ye na nzela ya baanzelu mpe ya basakoli. Longola yango, ayebisaki bato bákoma nsango na ye mpe bilaka na ye. Nzambe alaki ete tokozala na esengo na mikolo ezali koya. Kasi, epai wapi lelo oyo tokoki komona bilaka ya Nzambe?

Nzambe ayebisi nsango na ye na nzela ya Makomami Mosantu. (2 Timote 3:16) Ndenge nini Nzambe asalelaki basakoli mpo na kokoma nsango yango? (2 Petro 1:21) Nzambe akɔtisaki makanisi na ye na mitó ya bakomi, mpe na nsima bakomaki yango. Lelo oyo mpe likambo ya bongo esalemaka. Na ndakisa, soki patrɔ ayebisi sɛkrɛtɛrɛ akoma mokanda, tolobaka ete nkolo mokanda ezali patrɔ, kasi sɛkrɛtɛrɛ te. Ndenge moko mpe, atako bato bakomaki nsango ya Nzambe, Makomami Mosantu ezali nde ya Nzambe, kasi ya bato yango te.

MOTO NYONSO AKOKI KOYOKA NSANGO YA NZAMBE

Nsango ya Nzambe ezali na ntina mingi, yango wana alingi ete bato ya ‘bikólo nyonso, ya mabota nyonso mpe ya minɔkɔ nyonso’ báyeba nsango yango. (Emoniseli 14:6) Lelo oyo, Makomami Mosantu ezali na ndambo to na mobimba na yango na minɔkɔ koleka 3 000, ezali na minɔkɔ ebele koleka babuku mosusu nyonso.