Bandeko mibale ya sika na Lisangani ya Mikóló-Bakambi

NA MOKOLO ya 05/10/2024, liyebisi moko ya ntina mingi epesamaki na likita ya nsuka ya mbula, ete ndeko Jody Jedele mpe Jacob Rumph bakómi bandeko ya Lisangani ya Mikóló-Bakambi ya Batatoli ya Yehova. Bango mibale basaleli Yehova na bosembo bambula mingi.

Ndeko Jedele abotamá na Missouri, na États-Unis mpe abɔkwamá na kati ya solo. Libota na bango ezalaki kofanda na teritware oyo Batatoli ya Yehova bazalaki mingi te. Na yango, akutanaki na bandeko mingi oyo bazalaki kouta na bisika ndenge na ndenge mpe koya kosakola kuna. Bolingo mpe bomoko ya bandeko yango esimbaki mpenza motema na ye. Azwaki batisimo na bolenge mpenza, na mokolo ya 15/10/1983. Alingaki mosala ya kosakola mingi, mpe nsima ya kozwa diplome, na sanza ya 09/1989 akómaki mobongisi-nzela ya sanza na sanza.

Ntango Ndeko Jedele azalaki elenge, baboti na ye bazalaki kokende kotala Betele elongo na ye ná leki na ye ya mwasi. Yango elendisaki ye ná leki na ye bámityela mokano ya kosala na Betele, mpe bango mibale bakokisaki mokano yango. Ndeko Jedele akɔtaki Betele ya Wallkill na sanza ya 09/1990. Asalaki liboso na Departema ya kotya bopɛto mpe na nsima na Departema ya lisalisi ya monganga.

Na ntango yango, masangá ya monɔkɔ ya Espagnol oyo ezalaki zingazinga ezalaki na bokoli mingi mpe na mposa ya bandeko mibali. Na yango, Ndeko Jedele akendaki na moko ya masangá yango mpe abandaki koyekola Espagnol. Mwa moke na nsima, akutanaki na Damaris, ndeko mwasi oyo azalaki mobongisi-nzela na lisangá moko ya zongazonga yango. Na nsima, babalanaki, mpe Damaris akɔtaki Betele.

Na 2005 babimaki Betele mpo na kosalisa baboti na bango oyo bazalaki kosalela Yehova na bosembo. Na ntango yango, bazalaki babongisi-nzela ya sanza na sanza. Ndeko Jedele atángisaki na Eteyelo ya babongisi-nzela, mpe asalaki na Komite ya boyokani elongo na minganga na teritware na ye mpe na Komite mpo na mosala ya botongi na etúká.

Na 2013, babengaki lisusu Ndeko Jedele ná mwasi na ye na Betele mpo na mosala ya kotonga Warwick. Na nsima, kobanda wana basalaki mpe na Patterson mpe na Wallkill. Ndeko Jedele asalaki na departema ya kosala baplan mpe kotonga na ekólo (LDC) mpe na Biro ya makambo etali boyokani elongo na minganga. Na sanza ya 03/2023, atyamaki mosungi na Komite ya Mosala. Mpo na mikumba nyonso oyo azwá, alobi boye: “Soki ozwi mikumba ya sika, na bantango mosusu okoki kobulungana. Kasi na ntango yango nde osengeli komikundwela ete esɛngi otyela Yehova motema mpo ye nde akómisaka.”

Ndeko Rumph abotamá na Californie, na États-Unis. Ntango azalaki mwana moke, mama na ye azalaki makasi te na elimo, kasi asalaki nyonso mpo na koteya ye solo ya Biblia. Lisusu, mbula na mbula azalaki kokende kotala nkɔkɔ na ye ya mwasi, oyo azalaki Motatoli ya Yehova ya sembo. Nkɔkɔ yango asalisaki Ndeko Rumph asepela na solo, mpe ntango akómaki na mbula 13, asɛngaki ayekola Biblia. Na mokolo ya 27/09/1992, azwaki batisimo. Likambo ya esengo, mama na ye azongaki makasi na elimo mpe bato nyonso ya libota babandaki kokola na elimo mpe bazwaki batisimo.

Na bolenge na ye, Ndeko Rumph amonaki esengo oyo babongisi-nzela bazalaki na yango. Na yango, nsima ya kozwa diplome, akómaki mobongisi-nzela na sanza ya 09/1995. Na mobu 2000, akendaki na Équateur mpo na kosala esika oyo mposa ezalaki mingi. Kuna, akutanaki na Inga, ndeko mwasi moko ya mobongisi-nzela oyo autá Canada, mpe kendekende babalanaki. Babandaki bomoi elongo na engumba moko na Équateur oyo ezalaki na etuluku moko moke ya basakoli. Lelo oyo ekómá lisangá moko monene.

Kendekende, Ndeko Rumph ná mwasi na ye bakómaki babongisi-nzela monene, mpe na nsima basalaki na mosala ya zongazonga. Na 2011, babengaki bango na eteyelo ya Gileade ya mbala ya 132. Nsima ya kozwa diplome na Gileade, basalaki na bisika ndenge na ndenge mpe bazwaki mikumba ndenge na ndenge, na ndakisa Betele, mosala ya misionɛrɛ, mpe mosala ya zongazonga. Ndeko Rumph azwaki mpe libaku ya kotángisa na Eteyelo ya bapalanganisi ya nsango malamu ya Bokonzi.

Na nsima, maladi mabe ya coronavirus esalaki ete Ndeko Rumph ná mwasi na ye bázonga na États-Unis. Babengaki bango na Betele ya Wallkill, epai Ndeko Rumph azwaki formasyo na Departema ya mosala. Na nsima, batindaki bango lisusu na filiale ya Équateur, epai Ndeko Rumph asalaki na Komite ya filiale. Na 2023, batindaki bango na Warwick. Na sanza ya 01/2024, Ndeko Rumph atyamaki mosungi na Komite ya mosala. Nsima ya kokanisa bisika oyo asalá, alobi boye: “Eloko oyo esalaka ete mokumba oyo ozwi esepelisa, ezali te esika oyo ozali kosala, kasi nde bato oyo ozali kosala na bango.”

Tozali kosepela mingi na mosala makasi ya bandeko yango, mpe ‘tozali kokoba kolɛngɛla bato ya ndenge wana.’—Flp. 2:29.