Makambo ya esengo ya mbula eleki

MPO na makambo oyo Nzambe akosala na nzela ya Bokonzi na ye, Yisaya 9:7 elobi ete “molende mpenza ya Yehova ya mampinga nde ekosala yango.” Yesu Kristo, Mokonzi ya Bokonzi yango, amonisaki mpe molende makasi mpo na losambo ya solo ntango azalaki awa na mabele. (Yoa. 2:17) Makambo oyo ezali na eteni oyo emonisi ndenge Batatoli ya Yehova na mokili mobimba bazali komekola molende ya Yehova mpe ya Yesu na ndenge bazali kosalisa bato bámona bolingo ya Yehova, Tata na bango ya likoló.