Koyeba kotánga mpe kokoma kati na libota ya Nzambe

LIBOTA ya Nzambe na ntango ya kala, ezalaki libota liyebaki mpenza kotánga mpe kokoma. Esili koleka soko mibu 3 500, Mose akomaki mikanda mitano ya liboso ya Biblia. Yosua, mokitani na ye, azwaki etinda ya kotánga Makomami “butu na moi” mpo ete akokisa malamu mokumba oyo Nzambe apesaki ye. Mpe Nzambe alobaki na bakonzi nyonso ya Yisraele, oyo bakomata na kiti na bokonzi ete bákoma mpo na bango moko kopi ya Mobeko mpe bátángaka yango mokolo na mokolo.​—Yosua 1:8; Deteronome 17:18, 19.

Kotánga mpe kokoma ezalaki te bobele libaku ya bakonzi mpe bato minene ya ekólo. Atako tosengeli kotalela yango ete ezalaki elobeli ya elilingi, etindá oyo epesamaki epai na Bayisraele ya “kokoma” mibeko ya Nzambe likoló na bikuke ya bandako na bango, emonisi ete libota yango liyebaki kotánga mpe kokoma. Amosa azalaki mobokɔli ya bampate, mpe mosakoli Mika azalaki kofanda na mboka moko moke; nzokande, bango nyonso mibale bakomaki mikanda ya Biblia.​—Deteronome 6:8, 9; Amosa 1:1; Mika 1:1.

Yesu azalaki na likoki ya kotánga barulo nyonso ya Makomami ya Liebele oyo ezalaki kati na biyanganelo, epai kuna, na libaku moko, atángaki liboso na bato nyonso eteni moko [ya Makomami] oyo alimbolaki yango ete ekokani epai na ye. Bantoma na ye mpe bayebaki kotánga mpe kokoma, lokola emonisami na likambo oyo ete mbala mingi bazalaki kotánga to kolobela Makomami ya Liebele kati na mikanda oyo bakomaki.​—Luka 4:16-21; Misala 17:11.

Libota ya Nzambe na mikolo na biso

Yesu atindaki na baoyo bazalaki kolanda ye ete “[bázalisa, NW] bayekoli na mabota yɔnsɔ, . . . kolakisa mpe bango ete batosa yɔnsɔ [esili ye] kolaka.” Lisusu asakolaki ete “nsango malamu oyo na Bokonji ekosakolama na mokili mobimba.”​—Matai 24:14; 28:19, 20.

Lokola baklisto ya ekeke ya liboso, Batatoli ya Yehova bazali lelo kokokisa etindá wana na molende nyonso na koteyáká mpe na kolakisáká na maloba. Bazali mpe kopalanganisa nsango malamu ya Bokonzi na nzela ya mikanda. Kobanda 1920, Batatoli ya Yehova babimisaki mpe bakabolaki koleka bamiliare libwa ya Biblia, ya babúku, ya bazulunalo, mpe ya mwa babúku na minoko koleka 200.

Bamilió ya bato na mabelé mobimba bayambaki nsango yango malamu, kokómáká bongo bayekoli ya Yesu Klisto. Kati na bango tozali kokuta mibali mpe basi oyo bayebi kotánga te mpe kokoma te. Baínga wana bazali mpe baklisto ya motuya​—mingi bazali kosalela Yehova na bosembo nyonso uta mibu mingi, bazali koyika mpiko na minyoko na ntina na makambo ya losambo mpe bazali komonisa bolingo na bango mpo na Yehova na kotosáká mibeko na ye.​—1 Yoane 5:3.

Mingi kati na bango bazali na mposa makasi ya koyeba kotánga mpe kokoma, mpamba te basosoli ete yango ekolingisa bango kobakisa bosangani na bango na losambo ya Nzambe. Na makita, balingi kolanda botángi ya Biblia mpe mikanda ya boklisto, mpe balingi kotánga maloba ya nzembo na boye ete bákoka koyemba elongo na bandeko na bango ya elimo ya mibali mpe ya basi. Na ndako, bazali na mposa ya komilendisa bango moko mpe kolendisa mabota na bango na nzela ya boyekoli ya Biblia. Kati na mosala ya kosakola, bazali na mposa ya koteya basusu Liloba ya Nzambe kozanga ete moto mosusu atángaka yango mpo na bango.

Kolakisa bato kotánga

Mpo na koyanola na mposa wana, Batatoli ya Yehova bakamataki bibongiseli mpo na kolakisa bato kotánga mpe kokoma na nzela ya masangá na bango to mpe na moto mokomoko. Kati na mokili mobimba, balóngi kosalisa mibali mpe basi mingi na koyeba kotánga mpe kokoma. Bobele na mboka Nigéria, Batatoli ya Yehova bateyaki koleka bato 23 000 na koyeba kotánga mpe kokoma. Moko kati na bango, ezalaki bongo Effor. Apesi lisoló na ye ete:

“Nabandaki kotánga mpe kokoma na 1950 wana nazalaki na mibu 16. Kelasi mpo na koyekola kotánga mpe kokoma ezali kotambwisama na Batatoli ya Yehova. Tozalaki kosalela búku moko ebimisamaki na la Société Watch Tower, mpe bazalaki kopesa biso badevuare ya botángi na ndako.

“Nazalaki kotalela boínga na ngai lokola maladi. Nazalaki kolinga kolimbola Biblia na bandeko na ngai mpe na baninga na ngai, kasi lokola nayebaki kotánga te mpe kokoma te, nakokaki kosala yango malamu te. Eloko epusaki ngai na kotánga mpe kokoma ezalaki mposa na ngai ya kosakola mpe koteya basusu ete bákóma bayekoli ya Yesu. Nazalaki kokoma likoló na eloko nyonso oyo namoni, ata likoló na nkasa ya nzeté. Mposa na ngai ya kotánga mpe kokoma ekólaki mingi na boye ete nakómaki kolɔ́tɔ ete nazali koyekola kotánga mpe kokoma. Nazalaki kosɛnga na basusu ete básalisa ngai; nazalaki koyoka nsoni mpo na yango te. Nazali komikundola ete nazalaki kokoma mikanda mpo na baninga na ngai mpe nazalaki kosɛnga na baoyo bazalaki kokende na eteyelo ete bátalela ngai yango soki mabungá mazalaki.

“Nalandaki mateya ya koyekola kotánga mpe kokoma kati na lisangá na boumeli ya mbula moko. Nsima na yango, bapesaki ngai mokumba ya kolakisa basusu. Yango epesaki ngai libaku ya kosalisa bato mingi.

“Eteyelo yango esalisaki ngai mingi na boye ete nsima na bambula, nazwaki libaku ya kobongola Masano-mateya ya la Société longwa na Lingelesi kino na lokótá Isoko, monoko ya mboka na ngai. Longola yango, kobanda na bambula 1960, naponamaki nkulutu kati na lisangá na biso. Na bambula 1980, nasalaki lokola mokitani ya mokɛngɛli-motámboli ya Batatoli ya Yehova. Lisusu, nazwaki libaku ya kotambwisa Eteyelo ya mosala ya babongisi-nzela [eteyelo ya basakoli ya ntango nyonso] mpe mbala mibale, nazwaki libaku ya koteya na Eteyelo ya Mosala ya Bokonzi [eteyelo ya bankulutu baklisto]. Nayebi ete soki natikalaki sé moínga, mbɛlɛ mabaku nyonso wana makokaki kopesama na ngai te.

“Nazangi maloba mpo na komonisa esengo na ngai na ntina na ebongiseli oyo ya kolakisa kotánga mpe kokoma epai na bato na bopɔlɔ! Mbala mosusu, wana elali ngai kati na butu, natɔ́ndaka Yehova na boye ete nazali lisusu moínga te kati na mokili oyo ya lelo.”

Yehova Nzambe, Mozalisi na biso, apesaki biso bato makoki ya koyeba kotánga mpe kokoma. Kasi mayele yango makoyaka yango moko te. Mbano eleki monene ya koyekola kotánga mpe kokoma ezali ya kokoka kosimba Liloba ya Nzambe mpe kotosa lilako na Nzambe oyo ete: “Esengeli ete otánga yango na mongóngó ya nsé butu na moi.”​—Yosua 1:8, NW.

[Etanda na lokasa  9]

Lolenge nini kosalisa bana na yo ete bálinga kotánga

● Pesá ndakisa yo moko na kotángáká mbala na mbala. Soki baboti bakotángaka, mbala mingi mpe bana na bango bakotángaka.

● Sololá na mwana na yo uta azali naino elɛzi. Wana mwana azali koyoka elobeli ya mikóló, ekosalisa ye na kokanga ntina na maloba mpe makanisi oyo na nsima makozala mpasi te na koyekola kotánga yango.

● Tangelá bana na yo mbala na mbala. Wana batyami na mabɔlɔngɔ ya baboti na bango mpe bazali kotángela bango, atako bazali naino bana mpenza mpo na kokanga ntina ya lisoló oyo lizali kotángama, bazali komesena malamu na maloba mpe na mikanda. Landá kotángela bana na yo ata nsima wana basili koyeba kotánga bango moko. Na eteyelo bazali kolakisa bango kotánga, kasi baboti bakoki kosala mingi mpo na kosalisa bango ete bálinga kotánga. Bana bakosepelaka ete bátángela bango lisusu mpe lisusu, masoló na bango oyo balingaka.

● Zalá na babúku oyo ebongi mpo na bana na yo na kotánga kati na ndako.

● Lendisá bana na yo na kokoma. Mwana oyo akomaka mbala mingi azalaka mpe motángi.

● Poná ngonga ebongi na mokolo mokomoko mpo ya botángi ya libota. Tángisá moto na moto na ngala na ye, mpe na nsima, bósolola makambo yango elongo. Esengeli kozala ntango ya esengo mpe ya kolendisa.

[Elilingi na lokasa 8]

Basaleli ya Nzambe na ntango ya kala bayebaki kotánga mpe kokoma