Bomoi bozangi mpasi ekoya mosika te!

BILOKO ya nzoto oyo bizali kobatela biso na mpasi, bizali mpenza ya kokamwa. Boyekoli likoló na yango esengeli kopusa biso na kokumisa Mozalisi, lokola mokomi na Nzembo na Biblia asalaki yango, ete: “Nakotɔnda yɔ mpɔ ete nasalami na motindo na kokamwa mingi.” (Njembo 139:14) Ya solo, bobele Nzambe nde akoki koyeisa bomoi oyo bozangi mpasi! Kasi lolenge nini yango ekosalema?

Simbá ete, liboso na elaká ya kolongola mpasi, Biblia elobeli “likoló ya sika mpe mabelé ya sika; mpo ete likoló ya kala mpe mabelé ya kala esili koleka.” (Emoniseli 21:1, 4, NW) Ya solo, Biblia ezali kolobela te kolimwa ya likoló mpe ya mabelé na ndimbola na yango mpenza. Kasi, ezali koloba na bokuse ete, ebongiseli mobimba ya biloko ya sika ekokitana ebongiseli ya lelo oyo. Ee, boyangeli ya sika, oyo eleki yango esalemi na bato, ekosala ete bomoi bozangi mpasi bózala awa na mabelé.

Kolobeláká boyangeli yango, Biblia elobi ete “Njambe na lola akotɛmisa bokonji [to boyangeli] . . . ekobuka mpe ekosilisa [bikonzi] yɔnsɔ, mpe ekotikala lobiko na lobiko.” (Danyele 2:44) Ntango Yesu Klisto azalaki awa na mabelé, alakisaki biso ete tóbondelaka na ntina na Bokonzi yango, wana alobaki ete: “Bino bobɔndɛla boye ete, Tata na biso oyo ajali na Likolo, Nkombo na yɔ ejala mosanto, tika Bokonji na yɔ eya, tika mokano na yɔ esalama na nse pelamɔkɔ na Likolo.”​—Matai 6:9, 10.

Kasi, lolenge nini kokokana ya libondeli oyo ekoki kolimbola bomoi bozangi mpasi mpo na yo?

Moyangeli oyo azali na nguya eleki nguya na bato

Fungola mpo na yango esimbami na bwanya mpe na nguya ya moto oyo Nzambe asili kopona mpo na kokamba boyangeli na Ye. Ezali bongo Yesu Klisto. Na ntina na ye, esakweli ya Biblia elobi ete: “Bokonji ekojala likolo ya libeka na ye . . . Kofuluka na bokonji na ye mpe na kimia ikosuka tɛ.”​—Yisaya 9:6, 7.

Bwanya ya Yesu, oyo azali sikawa na likoló, eleki mpenza oyo ya minganga nyonso awa na mabelé. Ye ayebi malamumalamu lolenge nzoto na biso esalaka, bakisa mpe biloko oyo bizali kobatela yango na mpasi. Ntango azalaki awa na mabelé, koleka mibu 1900 sikawa, ezalaki ata na maladi moko te soko mpasi moko te oyo ye akokaki te kosilisa yango. Amonisaki bongo makambo oyo akosala na koleka, lokola Moyangeli ya Bokonzi ya Nzambe. Na ndakisa, Biblia elobi ete:

“Bibele mingi bayeli ye, mpe na esika mɔkɔ na bango bajalaki na mikatatali, bibɔsɔnɔ, bakufi miso, bimimi mpe bamosusu mingi. Balalisi bango na makolo na ye mpe abikisi bango. Bongo ebele bakamwi wana emɔni bango bimimi bajali koloba mpe bibɔsɔnɔ bajali na njoto makasi mpe mikatatali bajali kotambola mpe bakufi miso bajali komɔna. Bakumisi mpe Njambe na Yisalaele.” (Matai 15:30, 31) Kati na bamaladi oyo Yesu akobikisa na boumeli ya boyangeli ya Bokonzi na ye, monyoko oyo ete mpasi oyo ekosilaka te, ekozala lisusu te.

Ekozala mpenza lipamboli kitoko! Mpe yango ekozala te bobele mpo na mwa ndambo na bato. Mozalisi apesaki elaká oyo ete: “Mofandi [ata moko te] akoloba ete, ‘Ngai najali na malali.’” (Yisaya 33:24) Na bongo, elaká oyo ete ‘mpasi ekozala lisusu mpe te,’ ekokokana na nsé na boyangeli ya Bokonzi ya Nzambe.​—Emoniseli 21:4.

Na nsé na boyangeli ya Bokonzi ya nkembo na Klisto, biloko mingi bizwami na nzoto na biso, bakisá mpe oyo ezali kobatela biso na mpasi, ekozongela kosala na lolenge ya kokoka, mpo ete lisumu oyo tosangolaki ekolongolama. Biloko bizwami na nzoto na biso oyo bikoyebisaka ete tozali na maladi, bikobongwana monyokoli te. Na esengo nyonso, na kotalela bisakweli ya Biblia oyo bizali kokokana sikawa, tozali mpenza pene na mokili ya sika, oyo kati na yango mpasi ekopesa lisusu bato minyoko te.​—Matai 24:3-14, 36-39; 2 Timoté 3:1-5; 2 Petelo 3:11-13.

Okoki kozala na bomoi na nsé na Bokonzi ya Nzambe, wana motindo na mpasi oyo ezali kotungisa bamilió na bato lelo, ekolimwa. Kasi osengeli kosala eloko moko. Yesu Klisto alobelaki mingi lisɛngami ya moboko wana alobaki kati na libondeli epai na Nzambe, ete: “Oyo ejali bomoi na seko ete bayeba yɔ Njambe mɔkɔ na sɔlɔ mpe Motindami na yɔ, Yesu Klisto.”​—Yoane 17:3.

Batatoli ya Yehova bakosepela kosalisa yo mpo ete ozwa boyebi yango ya ntina mingi. Luká moko na bango na esika oyo ofandi, to tindá nkomá epai na bakomi ya zulunalo oyo, komonisáká mposa na yo ya koyekola Biblia na ndako to na esika mosusu oyo esepelisi yo. Bibongiseli bikokamatama mpo na kosalisa yo ete oyekola makambo mingi likoló na mikano ya Nzambe epai na bato ete bázala na bomoi bozangi mpasi.