Opesaka motuya na bonsomi ya losambo?

Euti na mokomani na biso na Estonie

PÄRNU ezali engumba oyo ezwami pembeni ya libongo ya masuwa na Mai monene na Estonie, mokili moke ya Balte oyo ezalaki kala kati na Union soviétique. Ezali na bafandi 50 000. Sikawa, bato bazali na bonsomi ya kosalela lingomba oyo balingi​—bonsomi oyo bazalaki na yango liboso te esili koleka mwa bambula. Mwa 17 Yúni 1995 Pärnu Leht, zulunalo moko ya mboka yango, emonaki ete mangomba 11 mazalaki na Pärnu mpe eyebisaki kobimisama ya molɔngɔ́ ya masoló mataleli mangomba yango.

Lisoló ya liboso lilobaki boye: “Tobandi na lingomba moko oyo mosala na yango ezali kobenda likebi na biso nyonso​—Batatoli ya Yehova​—oyo bazali sikawa koyangana na makita na bango kati na ndako moko ya kompanyi oyo esalaka masangá. . . . Na 1931, Bayekoli ya Biblia bazwaki nkombo Batatoli ya Yehova, nkombo oyo bazali na yango kino lelo. Batatoli ya Yehova bazali koleka milió mitano na mokili mobimba. Biro na bango na Estonie ezwami na Tallinn.”

Lisoló yango lilandaki boye: “Lisangá ya Batatoli ya Yehova lisalemaki na Pärnu esili koleka mobu moko na ndambo. Na ebandeli, lizalaki bobele na basangani 25; sikawa bazali basangani 120 . . .

“Kokutana na bango na mbala ya liboso ebendaka mpenza likebi. Bato yango​—oyo mingi kati na bango bazali babalani ya sika​—bazalaka na boninga, bazalaka pɛto na elateli na bango mpe bazalaka na boboto. Ezali likambo ya kokamwa ete bana mike bazali mpenza na disipilíni, lokola ezalaka likambo ya pɛtɛɛ te ete mwana moke afanda esika moko na boumeli ya ngonga moko na ndambo​—nzokande bana na bango basalaka bongo.”

Kolimboláká na makambo nini Batatoli ya Yehova bakeseni na mangomba mosusu, zulunalo yango elobaki ete: “Balobaka na kondimisama nyonso na ntina na Paladiso oyo ekoya. Likambo mosusu ya ntina, basangani ya etuluku yango bayebi Biblia malamu mpenza mpe batángaka yango mbala nyonso oyo likoki ezali.” Lisoló esukisaki boye: “Bato 120 yango, bango nyonso basakoli ya Yehova, bazwi ekateli moko, mpe bandimisami ete ekateli yango ezali malamu. Kondima na bango mpe kosakolama na yango ezali likambo lileki ntina kati na bomoi na bango.”

Bafandi nyonso te ya Pärnu nde basepelaki na lisoló oyo ya liboso litaleli mangomba ya engumba yango. Mwa 8 Yulí 1995, zulunalo Pärnu Leht eyebisaki: “Tozali na mposa ya kobimisa nkomá oyo mangomba minei etindelaki biso na ntina na motó na likambo ya sika.” Nkomá oyo batindelaki zulunalo etyamaki mabɔkɔ na bamonisi ya lingomba Ɔrtɔdɔ́ksi ya Estonie, ya lingomba Protestá ya Estonie, ya Union des chrétiens évangéliques et des baptistes ya Estonie, mpe ya Église méthodiste ya Estonie.

Bamonisi ya mangomba minei wana bamilelaki na maloba oyo: “Ekamwisi biso mingi na boye ete bobandi molɔngɔ́ ya masoló na Batatoli ya Yehova.” Balobaki lisusu ete: “Mpo na molɔngɔ́ yango ya masoló, tozali koyebisa bino ete likoki ekozala te mpo na biso ete tópesa makanisi na biso na zulunalo Pärnu Leht.”

Basukisaki boye: “Kati na engumba oyo bato mingi babungi nzela na bopusi oyo ezali kosalema na mangomba mpe bituluku mingi ya sika oyo ezali kopalanganisa ‘bondimi’ na bango, tokanisi ete makambo oyo makomami na zulunalo masengeli kotalela makambo ya losambo ya mboka mpe kokesenisa Mangomba ya kala na bituluku mpe bibongiseli mosusu ya bato ya makambo makasi. Basangani ya Conseil des Églises na Estonie, oyo bamonisaka Mangomba ya boklisto oyo basalaka elongo na elimo ya kosangisama ya mangomba bazali na likoki ya kopesa litambwisi na bango na likambo yango.”

Kasi, na eyano na nkomá yango, mokomi ya zulunalo Pärnu Leht apesaki makanisi oyo mabongi: “Oyo nyonso tomonaka ete ezali malamu ezalaka mpenza bongo te ntango nyonso. Lisusu, lolenge oyo Nzambe atalelaka bituluku ndenge na ndenge ya losambo ekoki kozala na bokeseni na makambo Mangomba minei oyo ya lokumu ezali kokanisa. Moto moko te azangi libunga, ata Mangomba ya bonkɔ́kɔ oyo eumeli bikeke mingi.”

Okanisi nini na bizaleli ya mangomba ya sika kati na ex-Union soviétique ? Tondimisami ete bipai binso, baoyo bazali koluka solo bamonisaka motuya na bonsomi ya losambo oyo ezali kati na mokili yango.

[Karte na lokasa 23]

(Mpo na komona yango, talá mokanda)

FINLANDE

Helsinki

Mer Baltique

ESTONIE

Tallinn

Pärnu

LETTONIE

Riga

LITUANIE

Vilnius

RUSSIE

Saint-Pétersbourg

Moscou

BIÉLORUSSIE

Minsk

[Bililingi na lokasa 24]

Lisangá ya Batatoli ya Yehova na Pärnu