Nkomá ya batángi

Etando oyo ezali na likámá Nazali kokomela bino mpo na lisoló “Etando na biso oyo ezali na likámá​—Ekoki kobikisama?” (8 Yanuáli 1996, ebimeli ya Lifalansé) Ezali malamu kozala na likoki ya kotánga eloko moko ya kolendisa. Lisoló ya misato kati na molɔngɔ́ ya masoló yango lizali kopesa biso elikya ya paladiso, epai kuna tokomitungisa te na ntina na ezingelo to kobebisama ya ozone! Nazali na elikya ya kofanda na paladiso wana elongo na libota na ngai mpe baninga na ngai.

A. C., États-Unis

Tosepelaki mingi na makanisi oyo mazwami na etánda ya nkasa 8 mpe 9 oyo mazali kolobela mikakatano lokola kobebisama ya zámba, bozangi ya mai, mpe nyama oyo ikómi kobunga. Masoló yango malimbwelaki biso ezalela ya likámá oyo kati na yango etando ezali sikawa. Tobɔndisami na likanisi oyo ete mwango bobele moko mpo na kosilisa mokakatano motindo wana mozali epai na Mozalisi na biso.

O.P. mpe F. J. O., Espagne

Lisoló ya Jessica Nauti kosilisa kotánga “Lisoló ya Jessica” kati na nimero ya 8 Yanuáli. Ezalaki mpenza ya kolendisa mpo na ngai! Ntango nazali komona elenge ya mayele kosalela Yehova na esengo mpe na sembo, esepelisaka ngai. Lisoló ya Jessica lizali kokundwela ngai ntina ya kopesa litatoli na mabaku nyonso.

A. H., États-Unis

Kozwa mokano na bomoi Lisoló “Nazalaki na mokano te na bomoi kasi na nasili kozwa yango” (8 Yanuáli 1996, ebimeli ya Lifalansé) esimbaki mpenza motema na ngai. Ntango natángaki yango, ezalaki lokola nde lisoló yango lizalaki kolobela ngai. Ngai mpe nazalaki koyengayenga kozanga ntina na bomoi mpe kozanga elikya mpo na mikolo mizali koya. Kasi nabyangamaki na Ndako ya Bokonzi ya Batatoli ya Yehova mpe nabandaki boyekoli ya Biblia. Sikawa nazali kosangana na esengo nyonso na mosala ya kosakola ya ntango nyonso, kosalisáká basusu ete bámona elikya kitoko oyo Yehova asili kolakisa ngai.

C. R., États-Unis

Lisalisi mpo na bokomba Lisoló oyo lizalaki na motó na likambo ete “Elikya mpo na babalani bikomba?” kati na “Makambo mazali koleka na mokili” libendaki likebi na ngai. (22 Sɛtɛ́mbɛ 1995, ebimeli ya Lifalansé) Nalakisaki yango na biolojiste moko, mpe alobaki ete ayoka naino te mwango oyo molobelami, oyo ya kokɔtisa mai ya mobali kati na likei ya mwasi “kati na nzoto ya mwasi.”

E. K., Allemagne

Lisoló na biso lizwamaki na lapólo ya agence France-Presse na ntina na likita moko litambwisamaki na physicien Anders Nyboe Andersen, moto ya mboka Danemark. Likambo ya mawa, makambo mosusu malobelamaki na bosikisiki te. Dr. Andersen alobaki na “Lamuká!” ete kokɔtisama na mai ya mobali na likei ya mwasi esalemaka in vitro, elingi koloba na libándá ya nzoto ya mwasi. Likei oyo likoki sikawa kokóla likokɔtisama na nsima kati na mwasi. Kasi, tolobaki na bosikisiki ete mwango yango mokoki kosalelama na “mai ya mobali na esika ete ezala ya mopesi mosusu​—yango ezali kopɛngola makambo mosusu matali bizalela malamu mpe ya losambo.” Na yango, babalani baklisto basengeli kozwa ekateli na bango moko na ntina na mwango yango. (Talá Linɔ́ngi ya Mosɛnzɛli ya 1 Sɛtɛ́mbɛ 1981, lokasa 31, ebimeli ya Lifalansé.)​—BAKOMI.

Moninga motomboki Nazali kokomela bino na ntina na lisoló “Mituna bilenge batunaka . . . Nasengeli kosala nini soki moninga moko akómi motomboki?” (22 Yanuáli 1996, ebimeli ya Lifalansé) Esili koleka mbula moko, moko kati na baninga na ngai ya motema abimisamaki na lisangá. Nabulunganaki mpenza. Namiyokaki lokola nde nasalisaki ye mingi te, mpe ete nazalaki moninga malamu te. Ntango natángaki ete yango ezalaki libunga na ngai te soki atikaki solo, nayokaki lokola bozito monene elongwaki na mapeka na ngai!

L. T., États-Unis

Mpo na oyo etali ngai, moninga na ngai ya pene oyo abandaki “kolanda lolenge ya bomoi mabe” ezalaki bobele moninga te kasi mama na ngai moko ya bolingo oyo akoki kokitinyama te. Nsukansuka nakendaki kokutana na bankulutu ya lisangá mpo na koyebisa bango ezalela na ye, mpe abimisamaki na lisangá. Namitungisaki ngai moko mpo ete nayebisaki bankulutu likambo yango. Sikawa nalingi kobundisa mayoki na ngai mabe ya komema ngambo na kosaleláká makanisi ya lisoló yango.

I. Y., Japon