Oyokaka mosala na yo mpii?

MBALA mosusu osalaka na boumeli ya ngonga soko mwambe na mokolo. Yango ezali ntango mingi mpe ezali kozwa eleko molai ya bomoi na yo kino koyoka mosala na yo mpii! Nzokande, na ekeke oyo ya 20, misala mingi mizali kosɛnga bongo mpe misepelisaka mpenza basáli te.

Na yango, okoki kozwa matomba mingi na kokómisáká mosala na yo eloko ya kosepelisa. Okosepela mingi na mosala mpe okoyeba sɛkɛlɛ ya kokómisa mosala nyonso mosusu oyo okosala nsima eloko ya kosepelisa. Na bongo, tika tótalela mwa myango mosusu ya kokokisa likambo yango.

Sepelá na mosala na yo

Bakambi mosusu ya misala basɛngaka ete osala mosala lokola nde olingaka yango. Soki osali bongo, okosepela na mosala na yo.

Mbala mosusu okoki koloba ete: ‘Nakoki kozala na esengo soko moke te na mosala na ngai!’ Mosala na yo ekoki kosɛnga kozongela sé makambo motindo moko mbala na mbala, na ndakisa mosala ya kosangisa biloko na masini. To ekoki kozala ete ozali kosala mosala na yo esili koleka bambula mingi na boye ete likoki ezali te ya kosepela na yango lisusu. Nzokande, mwa makambo mikemike lokola kosɛka mwa moke mpe kosembola mokɔngɔ ekoki kosalisa yo ete osepela mingi na mosala na yo.

Soki ozali komipesa mobimba na eloko ozali kosala, yango mpe ekoki kosalisa yo ete osepela na mosala na yo. Kosala mosala na yo na lolenge ya nyamunyamu te, mpe ntango ozali kosala, kokanisa ngonga ya kolya te, kokanisa mpe wikende mpo na bopemi te, kokanisa te mosala mosusu oyo osengeli kosala nsima. Ezali malamu kotya makanisi na yo nyonso na oyo ozali kosala. Litomba na yango nini? Okosepela na mosala na yo mpe okomona ete ngonga ezali kokende mbangu.

Yango esalemaka mingimingi ntango omoni ete otye makanisi na yo nyonso na mosala moko oyo olingaka mingi. Okoki kozwa bosepeli lolenge moko na kosaláká molende ya kotya likebi nyonso na mosala oyo osepelaka na yango mpenza te.

Salá oyo ekoki na yo

Kosala oyo ekoki na yo ekoki kosalisa yo na kosepela na mosala. Ya solo, toli yango ekeseni na likanisi oyo lipalangani mingi ete ntango ozali kosepela lisusu te na mosala oyo ozali kosala, komipesa lisusu te na mosala yango. Kasi, kolɛmbisa mabɔkɔ, kozongisa mosala na nsima, mpe likanisi oyo ete koboma nzoto te ekoki kozala makambo oyo ekotungisa mpe ekolɛmbisa. Na mabaku mosusu, moto oyo azongaka ndako na nkanda, na elongi mawamawa mpe na kolɛmba makasi, ekoki kozala ete azali konyokwama mpo ete azali kosala mosala na ye na bopɔtu.

Engebene Biblia, kosala makasi na mosala epesaka kutu bosepeli na ntango ya kominanola. “Likambo eleki malamu ezali mpo na moto te, bobele ete alya mpe amɛla mpe azwa esengo kati na mosala na ye.” (Mosakoli 2:24) Mpo na basusu, maloba yango makoki komonana lokola maleká ngala. Kasi baoyo bazali kosalela etinda yango ntango nyonso, bandimaka ete ezali na ‘eloko moko te’ oyo ekoki koleka bosepeli oyo bazwaka na mbuma ya mosala makasi na bango. Buku The Joy of Working (Esengo ya mosala) elobi ete: “Mosala oyo mosalami malamu mosepelisaka mingi.”

Na bongo, salá oyo ekoki na yo, mbala mosusu okoyoka nzoto makasi. Salá mingi mpe okomona ete okoyoka esengo koleka. Salá liboso misala ya ntina, na bongo okomiyoka malamu na ntango ya bopemi ya midi mpe na bawikende koleka moto oyo azongisaka misala na nsima.​—Kokanisá na Esetele 10:2; Baloma 12:11; 2 Timoté 2:15.

Na esika ya kosala momekano na basusu, salá molende ya komileka yo moko. (Bagalatia 6:4) Omityela malako ya sika mpe mikano ya sika. Salá milende ntango nyonso. Mwasi moko oyo mosala na ye esɛngaka ntango nyonso bobele kotonga bilamba, mosala oyo bato mosusu bakoki komona ete ezali koboma nzoto, asalaki mwa lisano mpo na komisepelisa. Amikatelaki ngonga ya mosala mokomoko, na nsima amekaki kokokisa mosala na ye na bangonga oyo amikatelaki. Akómaki kosepela na mosala na ye mingi mpamba te asalaki nyonso oyo ekokaki na ye mpo na kobongisa yango malamu.​—Masese 31:31.

“Kembisá” mosala na yo

Dennis T. Jaffe mpe Cynthia D. Scott, banganga-mayele ya sosioloji bapesi toli oyo: “Moná mosala na yo lokola ndako oyo ezali na eloko moko te na kati. Okɔti na kati mpe otali lolenge batongaki yango. Na bongo, okomona ete mosala oyo yo moko osali ezali na ntina. Okotalela lolenge okotya biloko mpe kotika bisika mosusu mpamba, lolenge okokembisa yango, mpe okómisi yango esika na yo ya kofanda. Okómisi yango na lolenge yo moko olingi.”

Mingimingi mosala epesamaka elongo na mitinda mpe na malako oyo mosali asengeli kolanda. Kosala bobele oyo esɛngami na yo ezali lokola kofanda na ndako oyo ezali na eloko na kati te, mpe ebongisami te. Kasi soki obongisi yango na lolenge na yo moko, mosala na yo ekosepelisa yo mingi koleka. Bato mibale “bakokembisa” mosala lolenge moko te. Mosali na restorá akoki koyeba bilei bakiliya oyo bayaka mbala na mbala balingaka. Mosali mosusu akoki kozala moto ya boboto mpe ya bonkonde. Bango nyonso mibale bazali kosepela na mosala na bango mpamba te bazali komipesa na oyo bazali kosala.

Yekolá makambo mosusu

Mwango mosusu ya kosepela na mosala ezali bongo koyekola makambo mosusu. Buku Tension Turnaround elobi ete wana tozali kopusana na mbula, bɔɔngɔ́ na biso mpe ekólisaka makoki na yango ya koyeba makambo malamu. Yango wana makambo oyo mbala mosusu masepelisaki biso kala makoki kopesa biso mpii sikawa. Mpo na kosalisa yango ezali kosɛnga kokokisa mposa ya bɔɔngɔ́, koyeba bansango mosusu na koyekoláká makambo ya sika.

Koyekola makambo mingi na ntina na mosala na yo ekoki na nsima kopesa nzela ete bápesa yo mosala mosusu oyo ekosepelisa yo mingi koleka. Kasi, ata soki esalemi bongo te, koyekola mingi ekosala ete okóma kosepela na mosala na yo. Bakomi Charles Cameron mpe Suzanne Elusorr bamonisi ete: “Koyekola makambo mosusu ekokólisa bobele makoki na yo te, kasi ekozala mpe na bopusi likoló na bomoi na yo: okoyekola ete likoki ya kosilisa mpe kolonga mikakatano ezali, bobangi ekoki kokita, mpe okoki kosala makambo mosusu mingi na lolenge oyo kutu okanisaki yango te.”

‘Kasi’ okoki koloba ete, ‘Nayebi makambo nyonso oyo nasengeli koyeba na ntina na mosala na ngai uta kala!’ Soki ezali bongo, okoki te koyekola makambo oyo mayokani na mosala na yo na lolenge mosusu? Na ndakisa, okoki kozwa ekateli ya koyekola makambo mingi oyo matali boyokani malamu kati na bato to makambo oyo matali bisaleli na yo ya mosala. Mbala mosusu okoki koyekola lolenge malamu ya kokoma mokanda ya makambo matali mosala to lolenge malamu ya kotamwisa likita. Okoki mpe koyekola lolenge malamu ya koyokana na bakambi ya mosala.

Lolenge nini okoyekola makambo yango? Ekoki kozala ete na kompanyi oyo osalaka bapesaka mateya oyo makoki kopesa yo litomba. To mpe ebombelo ya mikanda ekoki kozala na babuku oyo ozali na yango mposa. Kasi, kobosana te koluka koyeba lolenge mosusu ya mosala. Kotala bato ntango bazali kosala mosala na bango mpe kotalela milende na bango mpe bolɛmbu na bango ekoki kozala liteya. Okoki mpe kozwa liteya na mabunga na yo moko, mpe makambo oyo osalaka malamu, na kotaleláká na bozindo mosala oyo osalaki malamu. Makambo oyo okoyeba na mosala na yo moko mpe na mosala ya bato mosusu ekoki koteya yo makambo otángá na babuku soko moke te to makambo oyo oyekola na kelasi te.

Toli ya nsuka

Ezali na lolenge mosusu oyo okoki kotalela mosala na yo. Okoki komona ete ebongi mpenza básalela yo malamu​—ete basusu bazwaka libaku ya kopesamela misala oyo bango balingaka nzokande yo ozwaka ata libaku moko te ya kopesamela mosala oyo olingaka mpenza kosala. Okoki kosolola ntango nyonso na baoyo bazali kondima likanisi na yo, mpe okoki komindimisa ete nyonso wana ezali solo.

Kasi ekoki mbala mosusu kozala solo te. Bato mingi oyo bazali kosepela na misala na bango bayekolaki kosepela na yango. Moto oyo asepelaka na mosala ya kosala plan ya bandako akoki mpe kosepela kotambwisa motuka. Mpo na nini? Mpamba te lolenge na ye ya koluka kosala eloko mosusu ezali kosepelisa ye mpe kopesa ye esengo.

Na bongo, longolá makanisi mabe oyo ekómisaka mosala na yo eloko ya mpii na boumeli ya pɔsɔ na kotaleláká lolenge olingaka wikende. Kolekisa ntango te na kokanisáká mabunga na yo oyo maleká, kokanisa mpe te mbeba oyo okosala nsima, mpe komitungisa te na ntina na oyo basusu bazali kokanisa mpo na yo. Talelá mosala oyo ezali liboso na yo. Tyá likebi na yo nyonso likoló na yango. Meká kotya makanisi na yo nyonso na yango lokola nde ezalaki eloko oyo osalaka mpe osepelaka na yango na ntango ya bopemi. Omipesa na molende nyonso mpe okosepela na mosala mosalami malamu.

[Etanda/Elilingi na lokasa 11]

Koyina mosala na yo te

Na Masese 27:23, 24, Biblia elobi ete: “Zalá na etingya koyeba lolenge na bitonga na yo mpe tyá motema na yo na bibwele na yo. Zambi bozwi ekoumela libela te. Motole ekomonana libota na libota?” Yango elingi koloba nini?

Elingi koloba ete bomengo mpe etɛlɛmɛlo ya bokonzi (motole), soki moto azwi yango, mbala mingi emonanaka ete ezalaka mpo na ntango mokuse. Na yango, na ntango ya lisolo ya Biblia, mobateli ya mpate azalaki komonana ete azali na bwanya soki azali kotya likebi makasi likoló na bampate na ye, yango elingi koloba ete ‘kotya motema na bibwele na ye.’ Lokola vɛrsɛ misato oyo elandi elobi yango, litomba ekokaki kozala bozwi ya biloko ya mosuni mpo na mosali mpe mpo na libota na ye.​—Masese 27:25-27.

Ezali boni lelo oyo? Mbala mingi bato batyaka motema na kokóma na bozwi to kozala na etɛlɛmɛlo ya bokonzi, oyo bazalaka na elikya ete ekopesa bango nzela ya kotika mosala bazali kosala sikawa. Bamoko bazali na mikano milongobani; nzokande basusu bazali na mikano oyo mikokokisama soko moke te. Na makambo nyonso wana ezali malamu te kozala na bopɔtu na mosala oyo ozali kosala sikawa. Mosala yango ezali mpe ekoki kokóba kozala mpenza esika oyo ezali kobikisa yo. Moto ya mayele mingi ezali oyo azali kotya motema na “bibwele” na ye, azali kopesa likebi nyonso na mosala na ye. Kosaláká bongo akozwa matomba na mosuni sikawa mpe na mikolo mizali koya.