Nkomá ya batángi

Mabelé mobimba makokóma elanga kitoko Nasengeli kopesa bino matɔndi mpo na molɔngɔ ya masolo kitoko oyo ezalaki na motó na likambo ete “Mabelé mobimba makokóma elanga kitoko​—Ndɔtɔ to bosolo?” (8 Apríli 1997, ebimeli ya Lifalanse) Ɛɛ, bilanga ya bafololo kitoko ekoki kopesa bolamu na kolɔngɔnɔ ya nzoto na biso mpe kosepelisa biso. Nasepelaki na eteni oyo ezalaki na motó na likambo ete: “Nzela ya kozonga na Paladiso.” Maloba moke yango mazalaki mpenza maloba ya kolendisa​—lokola libyangi oyo ezali koloba ete “Oyo ezali nzela.” Oyo nde esengo ekozala ntango bato bakokóma kosala mosala banda ntɔngɔ kino mpokwa mpo na kobongola mabelé makóma paladiso! Lokola nasepelaka koyema, mpe kosala misala ya mabɔkɔ, nasepelaka mpe na bafɔtɔ mpe mayemi nyonso oyo ezalaka na zulunalo yango.

V. R., Australie

Nalingi kopesa bino longonya mpo na masolo yango. Nasepelaki na yango mingi. Nazali na mibu pene na 80 mpe nalingaka ntango nyonso kosala mosala na lopango na ngai. Bafololo na ngai mpe ndunda na ngai eleki ya baninga mosusu te kasi nalingaka kobongisa yango. Na kotángáká masolo yango, nasosoli malamu mpenza mpo na nini bato balingaka kosala na bilanga ya bafololo.

R. R., États-Unis

Libala ekoki kobatelama? Ntango natángaki lisolo “Libala ekoki kobatelama nsima ya ekobo?” (Yulí-Sɛtɛ́mbɛ 1997), namonaki lokola nde Yehova atindelaki ngai nkoma. Ezalaki kolobela mpenza makambo oyo nakutanaki na yango mpe mayoki oyo nazalaki na yango. Mobali na ngai asalaki ekobo, kasi abongolaki mpenza motema. Lokola lisolo elobaki yango, nazalaki komiyoka lokola nazalaki kati na ekumbaki. Nalimbisaki ye, kasi na bantango mosusu nazalaki koyoka nsɔni mpo na makanisi mabe oyo nazalaki na yango. Lisolo yango esalisaki ngai nasosola ete oyo ngai nasalaki ezalaki mabe te kasi ezalaki likambo ya kolongobana. Yehova apamboli mpenza milende na biso, mpe libala na biso ebatelami.

L. P., France

Wana libala na ngai ekokaki kobatelama te, lisolo yango ezalaki mpenza lipamboli mpamba te elobelaki mpenza mayoki oyo nazalaki na yango. Nakokaki mpenza kokokanisa makambo nyonso oyo malobelamaki na lisolo yango na oyo ngai nakutanaki na yango. Nayebi mpe bato mosusu oyo bazwaki matomba na lisolo yango. Bato mingi basosolaka te lolenge moto oyo akutani na mokakatano lokola oyo ya ngai akoki koyoka, na ntembe te lisolo yango ekosalisa mpenza, ekopesa bango bososoli.

M. C., Irlande

Nafandi na libala na boumeli ya mbula libwa na mobali oyo azali moklisto te, oyo azali kosala ekobo. Kasi ntango natángaki baparagrafe oyo ezwami na nse ya motó ya likambo moke oyo elobi ete “Libala ekoki kobikisama?” namiyokaki malamu mpenza. Mobali na ngai alingaki ete libala na biso ezala kasi akoba mpe kotambola na makango na ye. Na bongo, namoni malamu koboma libala yango. Sikawa nasengeli kobandela bomoi mpe kobɔkɔla bana ngai moko.

M. S. B., Trinité

Matɔndi mingi mpo na lisolo yango kitoko mpe ya kosimba motema. Toli ezalaki malamu mingi mpo na kosalela mpe koyeba soki kozongana ekolonga. Nazalaki ntango nyonso kokanisa ete soki mobali na ngai asali ekobo, nakolimbisa ye soko moke te. Namoni sikawa ete yango ezali mpenza likanisi malamu te. Ezali nsɔni ete ekobo ezali mokakatano oyo ezali ntango nyonso kokola, kasi matɔndi mingi mpo na bingɛngiseli ya makomami oyo ezali komonisa lolenge tokoki komisalisa. Kotya motema epai na Yehova esalisaki ngai na boumeli ya mawa oyo nazalaki na yango mpe epesaki ngai nguya ya kolimbisa, mpamba te mobali na ngai abongolaki mpenza motema.

S. N., États-Unis

Bakufi-matoi bazali kosanzola Yehova Ntango nazalaki kotánga lisolo “Bakufi-matoi bazali kosanzola Yehova” (8 Apríli 1997, ebimeli ya Lifalanse) natikalaki kotala fɔtɔ ya bato nyonso oyo bazalaki kati na liyangani. Oyo nde likambo ya kolendisa kondima komona bandeko mingi bazali kosalela elobeli ya bikela mpo na kokumisa Yehova! Nabimisaki mpisoli mbala mingi, lokola nasepelaki na molende na bango, mpiko na bango mpe komipesa na bango epai na Yehova. Matɔndi mingi mpo na masolo motindo wana.

R. H., États-Unis