Nkoma ya batángi

Bilenge bazali komiboma Nalingi kopesa bino matɔndi mingi mpo na masolo “Elikya nini ezali mpo na bilenge ya lelo?” (8 Sɛtɛmbɛ 1998, ebimeli ya Lifalanse) Masolo yango ebimisaki ngai mpisoli. Mbala na mbala, nazalaki koluka komiboma. Kasi nazali na esengo ete namibomaki te.

A. Z., République Tchèque

Masolo yango ezalaki mpenza malamu mpe ezali kosimba motema. Nalukaki komiboma na ebandeli ya mobu oyo ntango nakɔtaki lopitalo mpo nazalaki konyokwama na makanisi. Matɔndi mingi mpo na masolo yango, eyaki na ntango ebongi. Ebikisi bomoi na ngai.

R. P., Angleterre

Likambo ya mawa, nayebi baninga mibale ya kelasi oyo balukaki komiboma. Moko kati na bango amibomaki mpamba te ntango azalaki kotalela bomoi na ye ya mikolo mizali koya, azalaki komona likambo moko ya malamu te—bobele mikakatano oyo akokutana na yango. Na yango, lisolo oyo ebongaki mpenza, mpamba te emonisaki polele bomoi na biso na mikolo mizali koya ekoki kozala na ntina.

R. D., Espagne

Lisolo na bino esimbaki mpenza motema na ngai. Ezalaki lokola nde Yehova azalaki koloba na ngai ndenge Tata ya bolingo alobaka na mwana. Ntango nazalaki mwana moke, tata na ngai abebisaki ngai. Nazalaki komimona ete nazali na ntina te mpe mbala na mbala nazalaki kokanisa ete namiboma. Kasi sikawa, lokola lisolo na bino elobi yango, nazali kolona mposa makasi mpo na “bomoi ya solosolo.”​—1 Timote 6:19, NW.

S. R., Brésil

Matɔndi mingi, mingi mpenza mpo na maloba ya bilenge oyo bokomaki. Maloba yango ezali kopesa biyano mbala moko na mikakatano oyo bazali kokutana na yango.

W. H., Allemagne

Kozwa mbongo Matɔndi mingi na ndenge bozwaki ntango mpo na kobimisa masolo ya “Mituna oyo bilenge batunaka . . . Ndenge nini nakoki kozwa mwa mbongo?” (22 Augusto 1998, ebimeli ya Lifalanse) Nazalaki na mokakatano ya kozwa mosala. Kasi nalandaki makanisi na bino mpe nsukansuka nazwi mosala.

S. D., Ghana

Lokota ya bikela Nsima ya kotánga lisolo na bino “Lokota oyo osengeli komona!” (Aprili-Yuni 1999), nasengelaki kokomela bino mpo na kotɔnda bino. Masolo lokola oyo esalisaka biso tómityaka na esika ya bato mosusu oyo bazali na makoki lokola biso te. Nazali na moninga moko oyo banda abotamá ayokaka te. Nalingaki koyekola lokota ya bikela kasi nazwaka ntango te ya kosala yango. Nakozela lisusu te koyekola yango!

M. E., Angleterre

Nalingi kotɔnda bino mpo na milende mingi oyo bozali kosala mpo na kosalisa bato oyo bayokaka te. Nakabolaki bazulunalo yango mosusu epai ya bakonzi ya Leta. Lokola ekomamaki malamu mpenza, basɛngaki mosusu! Napesaki mpe yango na mwasi moko oyo azalaki koboya mwana na ye ayekola Biblia na Batatoli ya Yehova. Nsima ya kotánga lisolo yango, abimisaki mpisoli ya esengo. Azali sikawa kosimba milende ya mwana na ye mpo ayanganaka na makita ya boklisto mpe alaki ete akopesa ye mbongo ya transport mpo na kokenda na liyangani moko ya boklisto!

E. R., Mexique

Nasengeli koyebisa bino ete nasepelaki na lisolo yango mingi. Nakanaki koyekola lokota ya bikela ya Amerika mpe koyangana na makita ya lisangá ya Batatoli ya Yehova oyo esalemaka na lokota ya bikela. Kasi nalɛmbaki nzoto. Lisolo yango epesaki ngai nguya oyo nasengelaki na yango mpo na kokokisa mokano na ngai!

N. D., États-Unis

Ezalaki likambo ya malamu koyeba ete moto oyo ayokaka te akanisaka na lokota ya bikela. Lokola nayokaka, nakozala na makanisi malamu koleka mpo na koluka kosolola na bato oyo bayokaka te na ndenge oyo esengeli.

P. H., États-Unis