Nkoma ya batángi

Kosila ya bobola Matɔndi mingi mpo na lisolo “Etikali moke bobola esila,” oyo ebimaki na Lamuká! ya 8 Yuni 1998 (ebimeli ya Lifalanse). Lisolo yango esembolaki makanisi na ngai mpe emonisaki ngai ezaleli na ngai ya komilelalela. Nazali na mosala te mpe nazali mpenza na mbongo te. Nakanisaki ete nazali mobola mpenza. Nzokande ezali bongo te! Lisolo yango emonisi ete ezali na bato mosusu oyo bazali komona mpasi koleka ngai. Nasengeli kozala na botɔndi mpo na oyo nazali na yango—bilei, bilamba, nzoto kolɔngɔnɔ, mpe oyo eleki ntina, Yehova. Nazali kozela na motema likoló ntango bobola ekosila. Ekateli na ngai ezali ya kokoba koluka Bokonzi ya Yehova mpe kotika komilelalela.

C. W., Nouvelle-Zélande

Kozala monzemba Ekómi bambula ebele banda nabandá kotánga bazulunalo na bino. Nasengeli komonisa bino ete bolobi na bosembo te mpo na bindimeli ya Lingomba ya Katolike na lisolo “Engebene Biblia: Baministre baklisto basɛngisami kotikala minzemba?” (8 Yuni 1998, ebimeli ya Lifalanse). Lingomba ya Katolike esɛngisaka bato te ete “bátikala minzemba!” Ezali liponi ya moto ye moko ya kozala monzemba mpe yango ezali likambo oyo moto ayebaka liboso mpo na kosala mosala moko boye. Moto nyonso oyo akoloba ete basɛngisaki ye na makasi ete azala monzemba, azali kokosa.

R. G., Allemagne

Tokanisi ete bokeseni ezali monene kati na elobeli kozala monzemba na makasi mpe kosɛngisama kozala monzemba. Soki na ndakisa, kompanyi moko etii mobeko ya lolenge moko boye ya kolata mpe ezali kozwa na mosala bobele bato oyo bandimi elateli yango kasi ezali kolongola baoyo baboi yango, na bongo tokoki koloba ete kompanyi yango ezali na lolenge moko ya elateli oyo esɛngami na “makasi.” Bobele bongo, ebongi kolobama ete “kozala monzemba na makasi” ezali lisɛngami mpo na bonganga-nzambe ya Lingomba ya Katolike. Nzokande, lisolo na biso elobelaki mingimingi ete esika moko te kati na Makomami esɛngi kozala monzemba mpo na kokóma ministre moklisto. (1 Timote 3:2) Na esika ete ekweisa bato oyo baponi kozala minzemba na bomoi na bango, lisolo yango emonisaki ete kozala monzemba “ezali bomoi oyo etondi na mapamboli mpe na bosepeli mpo na bato mosusu.”​—Bakomi

Batata mibale—Napona oyo wapi? Nayekolaki solo ya Liloba ya Nzambe epai ya moninga moko ya eteyelo ntango nazalaki na mibu 14. Baboti na ngai, mingimingi tata na ngai azalaki kolinga te nayekola Biblia. Kasi abenganaki ngai na ndako te. Nalendendelaki kino nazwaki batisimo esili koleka mbula mitano. Lokola ndeko oyo alobelami na lisolo yango (Ɔkɔtɔbɛ-Dɛsɛmbɛ 1998), nazali na elikya ete mokolo mosusu baboti na ngai bakokóma na elikya lokola ngai ya kozala na bomoi na kati ya mokili ya sika ya sembo ya Yehova.

W. S. L., Brésil

Mpisoli etondaki na miso na ngai ntango natángaki lisolo yango. Tata na ngai alingaki soki moke te makambo oyo nazalaki koyekola. Atako na bantango mosusu tokoki kosolola malamu, kasi ntango nyonso oyo lisolo moko etaleli Biblia to Batatoli ya Yehova ebimi, akómaka na nkanda makasi. Mbala mingi asimbaki ngai na nzoto mpo na kobundisa ngai. Kasi lisolo yango elendisaki ngai mpo na kotikala ngwi, ata liboso ya mokakatano motindo wana.

I. H., Allemagne

Lisolo yango esimbaki mpenza motema na ngai. Lokola nabokwami na libota oyo ekabwani na makambo ya losambo, nakoki kososola mpasi na mayoki ya elenge mobali oyo asengelaki kosala liponi makasi motindo wana.

A. M., Italie

Fibromyalgie Matɔndi mingi mpo na lisolo “Koyeba mpe kobika na fibromyalgie kati na nzoto.” (8 Yuni 1998, ebimeli ya Lifalanse) Nazali kobɛla fibromyalgie na boumeli ya mbula motoba. Lisolo yango elobi makambo nyonso mpe ya solosolo. Mpe, bavɛrsɛ oyo etyami na etanda elendisaki ngai mingi mpenza.

N. M., États-Unis