“Bolobeli mpenza bomoi na ngai!”

Mbula na mbula, zulunalo Lamuká! ezalaka na masolo oyo elobelaka maladi ndenge na ndenge. Ya solo, Lamuká! ezali zulunalo ya minganga te, yango wana elobaka te ete nkisi boye to boye ezali malamu koleka oyo mosusu. Kasi, ntango elobelaka maladi moko, bakomi ya zulunalo yango basalaka makasi mpo na komonisa mikakatano oyo maladi yango ememaka. Bamonisaka ndenge maladi yango eutaka mpe na nsima, bapesaka toli oyo euti na Biblia, mpo na bolamu ya moto oyo azali kobɛla mpe mpo na bandeko na ye oyo bazali kosalisa ye.

Na ndakisa, lisolo oyo ebimaki na Lamuká! ya 8 Yuni 1998 (ebimeli ya Lifalanse) elobelaki “Ndenge nini koyeba maladi babengi fibromyalgie mpe ndenge nini koyikela yango mpiko?” Lisolo yango esimbaki mpenza mitema ya bato na mokili mobimba. Kutu ata basanza mingi nsima ya kobima ya lisolo yango, tozalaki se kozwa mikanda ya bato oyo balingaki komonisa botɔndi na bango. Mwasi moko akomaki boye: “Nazali komona lokola balongoli ngomba moko na motó na ngai.” Mwasi mosusu alobaki boye: “Ezalaki lokola bolobeli mpenza bomoi na ngai! Sikoyo nayebi ndenge nini koyikela maladi yango mpiko.”

Ata minganga mpe basepelaki na lisolo yango. Prezida​-molandi ya liboso ya lisangá moko ya minganga na États-Unis (Arthritis Foundation), akomaki boye: “Namoni ete bozalaki na bokatikati na lisolo oyo elobeli fibromyalgie, bolobelaki makambo nyonso mpe ezalaki malamu mpenza. Napesi bino longonya mpo na ndenge botyaki mikapo ya Biblia na kati ya lisolo yango, ndenge bomonisaki ntina ya kozala na kondima na ntango moto azali kobɛla maladi yango mpe makambo mosusu oyo etali minganga.”

Tozwaki mikanda mingi lisusu. Talá mwa ndambo na yango.

“Monganga na ngai alendisaki ngai ete natángaka mokanda nyonso oyo elobeli maladi yango. Lisolo na bino eleki mpenza oyo ya mikanda nyonso natángaki.”​—L. R.

‘Bato mingi bazalaki kotuna ngai maladi nazali kobɛla. Mbala mingi, nazalaki kopesa bango mwa mokanda ya moke oyo ezali kolobela maladi yango. Sikoyo, nakoki kotinda bango bátánga nimero wana ya Lamuká! Ata eloko moko te ezali kobɔndisa lokola yango!’​—K. K.

‘Lisolo yango endimisi ngai ete namitalela lokola moto nyonso oyo azali na ntina mpe nazali ntango nyonso na motuya na miso ya Yehova.’​—D. C.

“Ezali mbala na ngai ya liboso ya komona ete bato mosusu mpe bayebi mpasi na ngai.”​—C. H.

‘Tobɔndisami mpamba te toyebi ete kaka biso te nde tozali na mpasi yango.’​—C. A.

‘Namitungisaka mingi mpo nakokaka lisusu te kosala misala oyo nazalaki kosala liboso. Nakobomba nimero oyo na mbeto na ngai mpo natángaka yango mbala na mbala soki nazali na mposa ya kolendisama.’​—K. B.

‘Tii lelo oyo, nasalaka makasi mpo na kobosana mpasi na ngai, nasalaka nyonso oyo nakoki kosala, kasi nalongaka te. Emonani ete makanisi na bino ekosalisa ngai mpenza nayika mpiko.’​—M. C.

“Nazali na mbula 14 mpe ntango nazalaki na mbula 12, minganga bayebisaki ngai ete nazali kobɛla fibromyalgie. Nalelaki ntango namonaki ete Yehova azali komibanzabanza mpo na biso. Bótika te kokoma masolo ya kolendisa lokola oyo!”​—K.A.M.