Engebene Biblia
Nzambe amibanzabanzaka mpenza mpo na bana?
MBULA na mbula, bazali kokosa bamilio ya bana, kosalela bango makambo ya mabe, mpe konyokola bango na ndenge ya nsɔmɔ. Mingi basalaka misala ya makasi lokola baombo na ndenge oyo ekoki komemela bango makama. Basusu, bazali kokanga bango na makasi mpe kokómisa bango basoda to kosalisa bango kindumba. Bana ebele batyelaka lisusu mikóló motema te mpo bandeko na bango mosusu basangisaki na bango nzoto to basalaki bango makambo mosusu ya nsɔmɔ.
Tokoki kokamwa te soki bato mosusu ya mitema malamu bazali komitungisa mpo na bana. Atako toyebi ete lokoso mpe motema mabe nde ezali kotinda bato mingi bányokola bana, kasi, ekoki kozala na bato mosusu oyo bamitunaka mpo na nini Nzambe ya bolingo azali kotika nzela na makambo ya kozanga bosembo ya ndenge wana. Bakoki kokanisa ete Nzambe asundolá bana wana mpe ntango mosusu amibanzabanzaka mpenza te mpo na bango. Ezali mpenza bongo? Ndenge oyo bazali kokosa bana mpe kobebisa bango mbala na mbala elimboli nde ete Nzambe amibanzabanzaka mpo na bango te? Biblia elobi nini?
Nzambe asepelaka te na bato oyo banyokolaka bana
Yehova Nzambe akanaki soki moke te ete mikóló ya mitema mabe bákosaka bana mike. Konyokola bana ezali moko ya bambuma mabe oyo eutá na botomboki ya bato epai ya Nzambe na elanga ya Edene. Lokola baboyaki Nzambe azala mokonzi na bango, yango efungolaki nzela mpo bato bányokola baninga na bango bato. (Genese 3:11-13, 16; Mosakoli 8:9) Maloba na ye ekokisami mpenza!
Nzambe ayini baoyo banyokolaka bato ya bolɛmbu mpe oyo bazangi moto ya kolobela bango. Na bikólo mingi ya kala oyo ezalaki kosambela Yehova te, bato bazalaki kolekisa bana mbeka, kasi Nzambe alobaki ete ‘alakaki bango boye te, eyaki ata kati na motema na ye te.’ (Yilimia 7:31) Nzambe akebisaki libota na ye na ntango ya kala ete: ‘Soki okopesa [mwana etike] mawa mpe aleli epai na ngai, mbɛlɛ nakoyoka kolela na ye solo, mpe nkanda na ngai ekopela.’—Exode 22:22-24.
Yehova alingaka bana
Malako ya mayele oyo Nzambe apesi baboti emonisi polele ete amibanzabanzaka mpo na bana. Bana oyo bakolaka na ndako ya baboti, mbala mingi bakolaka malamu mpe bakómaka mikóló oyo bakɔmeli mpe ya mayele. Yango wana, Mozalisi na biso asalá libala, ebongiseli oyo esengeli koumela libela, oyo na nzela na yango, “moto akotika tata na ye mpe mama na ye mpe akosangana na mwasi na ye, mpe bango bakozala mosuni moko.” (Genese 2:24) Na kotalela Biblia, kosangisa nzoto epesami nzela kaka na kati ya libala, mpo ete bana oyo bakobotama bábatelama mpe bákola na ndako ya baboti.—Baebele 13:4.
Makomami elobeli mpe mingi ntina oyo baboti basengeli koteya bana na bango. Biblia elobi ete: “Bana mibali bazali likabo na [Yehova], mpe mbuma na libumu ezali libonza. Bana mibali babotami na moto kati na makasi na ye bazali pelamɔkɔ mbanzi na lobɔkɔ na elombe.” (Nzembo 127:3, 4) Bana bazali likabo ya motuya oyo Nzambe apesaka bato, mpe alingaka ete bákola malamu. Kaka ndenge moto ya bokila atalaka malamumalamu liboso ya kobɛta mbanzi, ndenge moko mpe Nzambe alendisi baboti bálakisa bana na bango nzela malamu mpo na bomoi na bango. “Batata,” liloba ya Nzambe epesi bino etinda oyo: “bósilikisaka bana na bino te, kasi bókoba kobɔkɔla bango na disipilini mpe na makebisi ya Yehova.”—Baefese 6:4.
Lolenge mosusu oyo Yehova amonisaka ete alingaka bana ezali ndenge ateyaka baboti bábatelaka bana na bango mpo bato ya mabe básala bango mabe te. Na Yisalaele ya kala, ata “bana” basengelaki koyoka Mobeko, oyo mpe ezalaki kolimbola kosangisa nzoto oyo epesami nzela mpe oyo epekisami. (Deteronome 31:12; Levitike 18:6-24) Nzambe alingi ete baboti básala nyonso oyo bakoki mpo na kobatela bana na bango mpo moto moko te akosa bango to anyokola bango.
Elikya mpo na bana
Bolingo oyo Yehova azalaka na yango mpo na bana, emonanaki polele na nzela ya Yesu Klisto, oyo amonisaka mpenza bomoto ya tata na ye na ndenge ya kokoka. (Yoane 5:19) Ntango bantoma ya Yesu bakanisaki ete ezali malamu te baboti bámema bana na bango ya mike epai na ye, Yesu ye moko asepelaki te mpe apamelaki bango. Alobaki ete: “Bótika bana mike báya epai na ngai.” Mpe na nsima, “akamataki bana na mabɔkɔ na ye mpe abandaki kopambola bango.” (Malako 10:13-16) Bana bazali na ntina mingi na miso ya Yehova mpe ya Mwana na ye.
Kutu, etikali moke, Nzambe akosalela Mokonzi oyo asili kopona, Yesu Klisto, mpo na kobikisa bana na mabɔkɔ ya bato oyo bazali konyokola bango. Bato ya lokoso mpe ya mitema mabe oyo bakosaka bana mpe banyokolaka bango bakozala lisusu te mpo na libela. (Nzembo 37:10, 11) Mpo na bato ya komikitisa oyo balukaka Yehova, Biblia elobi ete: “Akopangwisa mpisoli nyonso na miso na bango, mpe liwa ekozala lisusu te, ná mawa ná koganga ná mpasi ekozala lisusu mpe te. Makambo ya kala esili koleka.”—Emoniseli 21:3, 4.
Liboso ete elaka yango ekokisama, Nzambe azali komonisa banda lelo ete alingaka bana, na ndenge azali kosalisa bango na elimo mpe kobɔndisa bana nyonso oyo bazali kokosa bango mpe konyokola bango. Apesi elaka oyo: “Nakoluka oyo abungi, mpe nakozongisa oyo akimisami, mpe nakokanga oyo abukani, mpe nakokembisa oyo abɛli.” (Ezekiele 34:16) Na nzela ya Liloba na ye, ya elimo santu na ye, mpe ya Lisangá ya boklisto, Yehova azali kobɔndisa bana oyo bazali konyokwama mpe bazali babola. Ezali mpenza esengo koyeba ete, lelo oyo mpe na mikolo ezali koya, “Tata ya motema mawa mingi mpe Nzambe ya kobɔndisama nyonso, . . . abɔndisaka biso na kati ya bolɔzi na biso nyonso.”—2 Bakolinti 1:3, 4.
[Maloba mpo na kolimbola eutelo ya bafɔtɔ na lokasa 20]
© Mikkel Ostergaard/Panos Pictures