Mangomba ezali kokende wapi?

NINI ezali kokómela mangomba ya boklisto? Na esika oyo ofandi, mangomba ezali kokola to ezali nde kozonga nsima? Ntango mosusu, oyokaka ete bato bakómi kosepela mingi na makambo ya Nzambe. Oyokaka mpe mbala mosusu balapolo ya mikili ya Afrika, ya Mpoto ya Ɛsti mpe ya États-Unis oyo ezali komonisa ete bandimi ya mangomba bazali se kobakisama. Kasi, bansango oyo euti na mikili mosusu, mingimingi na Mpoto ya Wɛsti emonisi ete bandako-nzambe ezali kokangama, motuya ya bandimi ezali se kokita mpe bato mingi bazali lisusu kosepela na makambo ya Nzambe te.

Lokola motuya ya bandimi ezali se kokita, mangomba mingi babongoli mateya mpe misala na bango. Na mangomba mosusu, balobelaka mabe ya bato te mpamba te, mpo na bango, Nzambe andimaka etamboli ata ya ndenge nini. Na esika ya koteya Liloba ya Nzambe, mangomba mingi ezali nde kobongisa masano mpe makambo ndenge na ndenge mpo na kosepelisa bandimi mpe kopesa bango nzela bámonisaka mayoki na bango. Atako bandimi mosusu ya mangomba yango bazali komona ete mbongwana yango ezali na ntina na bomoi ya lelo, bato mingi ya mitema sembo bazali komituna soki mangomba ezali kaka kosala ndenge Yesu asɛngaki bayekoli na ye. Tótalela ndenge mangomba ekómi na bambula oyo euti koleka.