Ntango ya bozwi kasi mpo na banani?
TOZALI na mokili ya bozwi. Ezali mpasi mpo na yo kondima yango? Emonani ete mikili mosusu ezali na misolo beboo mpe bakokoka te kosalela yango nyonso. Bato ya mayele balobi ete motuya ya biloko mpe misala nyonso oyo esalamaki na mokili mobimba na mobu 2005 eleki dolare miliare 60 000. Soki bakaboli ebele ya mbongo wana na bato nyonso na mokili, moto mokomoko akozwa dolare 9 000. Nzokande, motángo yango ezali se kobakisama.
Atako mokili etondi na bozwi, bato mingi bazali kozwela yango litomba te. Mokanda moko ya ONU oyo ebimi sika emonisi ete bozwi ya bato misato oyo baleki mokili mobimba na bomɛngo eleki bozwi nyonso ya mikili 48 ya bobola makasi. Ebongiseli moko ya ONU (PNUD) emonisi ete bato milio 2 na ndambo babikelaka mokolo na mokolo na mwa mbongo oyo ekoki ata dolare 2 te. Bamilio ya bato balyaka malamu te mpe bazali kozanga mai ya pɛto ya komɛla.
Na États-Unis, bato ya mayele na sosioloji bazali koyekola etuluku moko ya bato oyo babengi “bato oyo bazali pene na bobola.” Bato yango bazali na likama monene ya kokóma babola. Atako na États-Unis bozwi ezali mingi, bato koleka milio 50 bazali pene na bobola.
Mpo na nini bamilio ya bato bazali konyokwama na bobola makasi, nzokande mbongo ezali kokɔta mingi na bakɛsi ya Leta mpe na babanki? Mpo na nini bato mingi bazali kozwa litomba te na bozwi oyo ezali se kotonda na mokili?
[Likanisi ya paragrafe na lokasa 3]
Bozwi ya bato misato oyo baleki mokili mobimba na bomɛngo eleki bozwi nyonso ya mikili 48 ya bobola makasi
[Elilingi na nkasa 2, 3]
Bana ya mosala na izini oyo ya biliki bafutamaka santime 50 ya dolare na mokolo
[Eutelo ya bafɔtɔ]
© Fernando Moleres/Panos Pictures
[Maloba mpo na kolimbola eutelo ya bafɔtɔ na lokasa 3]
© Giacomo Pirozzi/Panos Pictures