‘Kozanga kotyelana motema epalangani mingi’

Na Afrika ya wɛsti, elenge mobali moko ya mbula 12 alali na mbeto ya lopitalo; azali kobɛla mpo amɛlaki nkisi moko ya malaria oyo mama na ye asombaki na farmasi moko oyo eyebani ete ezali malamu. Monganga moko alobi boye: “Banda mbula 15 tozali komona bankisi ya monyato.”a

Na Asie, baboti ya bebe moko ya mobali bayoki mpasi mingi ntango bayebisi bango ete miliki oyo bato bazalaki koloba ete ezalaki na vitamini mingi, oyo bazalaki kopesa bebe na bango ezalaki na pwazɔ. Likambo ya mawa, mwana yango akufaki.

Na États-Unis, moto moko ya mombongo oyo bazalaki kotyela motema amɛlaki bamiliare ya badolare ya bakiliya na ye! Bato mingi bayaki komona ete mbongo na bango ya pansiɔ elimwaki na likambo wana ya moyibi oyo esalemá naino te na ekeke oyo.

NA MOKILI ya lelo, tokoki koloba ete moto nyonso asilá kokosama na moto moko oyo azalaki kotyela motema. Ata kobeba ya nkita oyo esalemi na mokili mobimba euti mingimingi nde na likambo oyo zulunalo moko ya France (Le Monde) ebengi “kozanga kotyelana motema oyo epalangani na mokili mobimba.”

Makambo nini esali ete bato mingi bátyelana lisusu motema te lelo? Ezali nde na moto oyo okoki kotyela motema?

[Maloba na nse ya lokasa]