2. Ezali foti na biso moko soki tozali komona mpasi?

Ntina ya koyeba yango

Soki tozali komona mpasi mpo na foti na biso moko, tokokoka mpe kokitisa bampasi.

Kanisá naino

Bato nde bazali kobimisa bampasi mingi oyo ezali na mokili lelo oyo.

• 

  Kosala basusu mabe.

  Ebongiseli ya ONU oyo etalelaka bokolɔngɔnɔ ya nzoto elobi ete soki tozwi bato 4, moko na bango anyokwamá to abɛtamá na bomwana mpe soki tozwi basi 3, moko na bango abɛtamá to basangisá na ye nzoto na makasi to mpe akutaná na makambo wana nyonso mibale.

• 

  Liwa ya bato oyo tolingaka.

  Ebongiseli ya ONU oyo etalelaka bokolɔngɔnɔ ya nzoto esalaki lapolo moko na 2018, oyo elobi ete na 2016 bato soki 477 000 bakufaki na mokili mobimba. Kaka na mbula yango, bato bakanisaka ete bato 180 000 mpe bakufaki na bitumba.

• 

  Bamaladi.

  Fran Smith akomaki na zulunalo moko (National Geographic) ete bato koleka miliare moko bamɛlaka makaya. Nzokande makaya ememaka bamaladi ya minene oyo ebomaka, na ndakisa maladi ya motema, AVC, maladi ya pema mpe kanser ya bapumo.

• 

  Bokeseni kati na bazwi mpe babola.

  Jay Watts, moto moko ya pisikoloji, alobi ete bobola, kozwa basusu na valɛrɛ te, koponapona loposo, koponapona kati na basi ná mibali, kozwa mimeseno mosusu na valɛrɛ te mpe kobengana bato na bamboka na bango ezali mbala mosusu kobakisa mitungisi to konyokola makanisi.

  MPO NA KOYEBA MAKAMBO MOSUSU

  Talá video Mpo na nini Nzambe akelaki mabele? ezali na jw.org.

Oyo Biblia elobi

Baguvɛrnema nde ezali kobimisela bato bampasi mingi.

“Moto ayangeli moto mpo na komonisa ye mpasi.”​—MOSAKOLI 8:9.

Tokoki kokitisa bampasi.

Batoli ya Biblia ezali kosalisa biso tózala na sante ya malamu mpe tóyokana malamu na basusu.

“Motema ya kimya ezali bomoi ya nzoto ya mosuni, kasi zuwa nde kopɔla mpo na mikuwa.”​—MASESE 14:30.

“Makambo nyonso ya bololo oyo eyokisaka mpasi mpe nkanda mpe nkɛlɛ mpe koganga mpe maloba ya kofinga elongwa mosika na bino, ná mabe nyonso.”​—BAEFESE 4:31.