Motɛmɛli ya Kristo
Ndimbola: Motɛmɛli ya Kristo elimboli moto oyo azali kotombokela Kristo to komitya na esika ya Kristo. Ezaleli ya kotɛmɛla Kristo emonanaka epai ya baoyo nyonso baboyaka kondima oyo Biblia elobi mpo na Yesu Kristo, baoyo nyonso batɛmɛlaka Bokonzi na ye, mpe baoyo nyonso banyokolaka bayekoli na ye. Emonanaka mpe epai ya bato, bibongiseli, mpe bikólo oyo batutaka ntolo ete bazali bamonisi ya Kristo to balobaka ete bazali Bamasiya.
Biblia elobi ete motɛmɛli ya Kristo azali kaka moko?
1 Yoa. 2:18: “Bana mike, oyo ezali ngonga ya nsuka, mpe, kaka ndenge boyokaki ete motɛmɛli ya Kristo azali koya, banda sikoyo ebele ya batɛmɛli ya Kristo bayei; na likambo wana nde toyebi ete oyo ezali ngonga ya nsuka.”
2 Yoa. 7: “Ebele ya bakosi babimi na kati ya mokili, bato oyo bazali kosakola te ete Yesu Kristo ayaki na nzoto ya mosuni. Wana nde mokosi mpe motɛmɛli ya Kristo.” (Simbá ete na vɛrsɛ oyo, “ebele ya batɛmɛli ya Kristo” oyo balobelami na 1 Yoane 2:18 babengami lokola moto moko: “motɛmɛli ya Kristo.”)
Motɛmɛli ya Kristo asengeli komonana nde na mikolo ekoya?
1 Yoa. 4:3: “Liloba nyonso ya elimo oyo endimi Yesu te euti na Nzambe te. Lisusu, yango ezali liloba ya elimo ya motɛmɛli ya Kristo oyo boyokaki ete ezali koya, mpe sikoyo esili koya na mokili.” (Vɛrsɛ oyo ekomamaki pene na nsuka ya siɛklɛ ya liboso T.B.)
1 Yoa. 2:18: “Banda sikoyo ebele ya batɛmɛli ya Kristo bayei; na likambo wana nde toyebi ete oyo ezali ngonga ya nsuka.” (Emonani polele ete Yoane alobelaki nsuka ya eleko ya bantoma ntango asalelaki maloba “ngonga ya nsuka.” Bantoma mosusu basilaki kokufa, mpe Yoane akómaki mobange mpenza.)
Ndenge ya koyeba batɛmɛli ya Kristo—
Bato oyo baboyaka kondima ete Yesu azali mpenza Masiya
1 Yoa. 2:22: “Nani azali moto ya lokuta soki ezali te moto oyo azali kowangana ete Yesu azali Kristo [to Masiya, moto oyo atyami mafuta na elimo]? Wana nde motɛmɛli ya Kristo.”
Baoyo nyonso baboyaka kondima ete Yesu azali Mwana se moko ya Nzambe
1 Yoa. 2:22: “Wana nde motɛmɛli ya Kristo, moto oyo azali kowangana Tata mpe Mwana.”
Talá Yoane 10:36; Luka 9:35.
Bapɛngwi
1 Yoa. 2:18, 19: “Ebele ya batɛmɛli ya Kristo bayei . . . Babimaki na kati na biso, kasi bazalaki bato ya ndenge na biso te.”
Baoyo batɛmɛlaka bayekoli ya solo ya Kristo
Yoa. 15:20, 21: “Soki banyokolaki ngai, bakonyokola mpe bino . . . Kasi bakosala bino makambo nyonso wana mpo na nkombo na ngai, mpo bayebi te moto oyo atindaki ngai.”
Bato mpe bikólo oyo batɛmɛlaka Bokonzi ya Kristo to batutaka ntolo ete bazali Bamasiya
Nz. 2:2: “Bakonzi ya mabele bazali kotɛlɛma mpe bankumu bayangani lokola moto moko mpo na kotɛmɛla Yehova mpe kotɛmɛla moto na ye oyo atyami mafuta [Kristo, to Masiya].”
Talá mpe Emoniseli 17:3, 12-14; 19:11-21.
Mat. 24:24: “Ba-Kristo ya lokuta mpe basakoli ya lokuta bakobima mpe bakobimisa bilembo minene mpe bakosala makamwisi mpo na kokosa ata bato oyo baponami, soki likoki ezali.”