Ntina oyo tosengeli koyeba Motɛmɛli ya Klisto

Ntoma Yoane akomaki ete: “Boyokaki ete motɛmɛli ya Klisto azali koya.” (1 Yoane 2:18) Tosengeli mpenza kotyela maloba yango likebi! Banda kala, bato balukaka ndimbola ya maloba yango. Nani azali motɛmɛli ya Klisto? Akoya ntango nini? Akosala nini ntango akoya?

BATO oyo babengamá batɛmɛli ya Klisto bazali ebele. Na ntango ya kala, baoyo babengamaki ‘batɛmɛli ya Klisto’ ezalaki Bayuda, Bapápa ya Katolike mpe baampɛrɛrɛ ya Loma. Na ndakisa, ntango amperɛrɛ Frédéric II (1194-1250) aboyaki kokɔta na etumba moko ya lingomba, Pápa Grégoire IX abengaki ye motɛmɛli ya Klisto mpe abimisaki ye na lingomba. Innocent IV, Pápa oyo akitanaki Grégoire, abimisaki Frédéric II lisusu na lingomba. Kasi, Frédéric alobaki ete Pápa Innocent nde azali motɛmɛli ya Klisto.

Na bakomi nyonso ya Biblia, kaka ntoma Yoane nde asaleli liloba “motɛmɛli ya Klisto.” Na mokanda ya liboso mpe ya mibale ya Yoane, liloba yango ezongelami mbala mitano, mpe esalelami na bɔɔkɔ (singulier) mpe na boike (pluriel). Totye bavɛrsɛ oyo esaleli liloba yango na etanda oyo ezali na lokasa elandi. Bavɛrsɛ yango esalisi biso tóyeba ete motɛmɛli ya Klisto azali mokosi, oyo azali mpenza na mokano ya kobebisa boyokani ya moto ná Klisto mpe Nzambe. Na yango, ntoma Yoane alendisaki baninga na ye baklisto ete: “Balingami, bóndimaka te liloba nyonso oyo epemami, kasi bómekaka maloba mapemami mpo na komona soki yango euti na Nzambe, mpamba te basakoli mingi ya lokuta babimi na kati ya mokili.”​—1 Yoane 4:1.

Yesu mpe akebisaki na ntina na bakosi to basakoli ya lokuta ete: “Bazali koya epai na bino na bilamba ya bampate, kasi na kati bazali bambwa ya zamba ya lokoso. Na bambuma [to misala] na bango bokoyeba bango.” (Matai 7:15, 16) Yesu akebisaki mpe bayekoli na ye na ntina na motɛmɛli ya elilingi? Tótala ndenge tokoki koyeba mokosi yango ya mabe.