Motɛmɛli ya Kristo ezali nani?

Eyano ya Biblia

Motɛmɛli ya Kristo ezali kaka moto moko to ebongiseli moko boye te, mpo Biblia elobi ete ezali na “ebele ya batɛmɛli ya Kristo.” (1 Yoane 2:18) Liloba “motɛmɛli ya Kristo,” oyo euti na liloba moko ya Grɛki oyo elimboli “monguna ya Kristo,” ezali nde moto nyonso oyo:

• Aboyaka kondima ete Yesu azali Kristo (Masiya) to ete azali Mwana ya Nzambe.​—1 Yoane 2:22.

• Aboyaka Kristo, Moto oyo Nzambe atyá mafuta.​—Nzembo 2:1, 2; Luka 11:23.

• Alobaka ete ye nde Kristo.​—Matai 24:24.

• Anyokolaka bayekoli ya Kristo, mpo Yesu amonaka ete makambo oyo basali bayekoli na ye basali yango nde epai na ye.​—Misala 9:5.

• Amibengaka mokristo kasi abukaka mibeko to mpe azali na bokosi.​—Matai 7:22, 23; 2 Bakorinti 11:13.

Bato oyo basalaka makambo ya ndenge wana bazali batɛmɛli ya Kristo; kasi Biblia ebengi mpe etuluku ya bato yango nyonso ete “motɛmɛli ya Kristo.” (2 Yoane 7) Motɛmɛli ya Kristo amonanaki mpo na mbala ya liboso na ntango ya bantoma mpe tii lelo azali kaka. Biblia esakolaki likambo yango.​—1 Yoane 4:3.

Ndenge ya koyeba batɛmɛli ya kristo

• Bateyaka makambo ya lokuta na ntina na Yesu. (Matai 24:9, 11) Na ndakisa, bato oyo bateyaka Bosato to ete Yesu azali Nzambe Mozwi-ya-Nguya-Nyonso batɛmɛlaka mpenza mateya ya Yesu, mpo ye moko alobaki ete: “Tata aleki ngai.”​—Yoane 14:28.

• Batɛmɛli ya Kristo bandimaka te makambo oyo Yesu alobaki na oyo etali Bokonzi ya Nzambe. Na ndakisa, bakonzi mosusu ya mangomba balobaka ete Kristo ayangelaka na nzela ya baguvɛrnema ya bato. Nzokande, likanisi yango eyokani te na maloba ya Yesu oyo: “Bokonzi na ngai ezali ya mokili oyo te.”​—Yoane 18:36.

• Balobaka ete Yesu azali Nkolo na bango, kasi batosaka mitinda na ye te, na ndakisa kosakola nsango malamu ya Bokonzi.​—Matai 28:19, 20; Luka 6:46; Misala 10:42.