Liteya 11

Bindimeli mpe mimeseno oyo esepelisaka Nzambe te

Lolenge nini ya bindimeli mpe ya mimeseno oyo ezali mabe? (1)

Baklisto basengeli kondima ete Nzambe azali Bosato? (2)

Mpo na nini baklisto bakumisaka te Eyenga ya Mbótama, Pásika, to bokundoli mikolo ya kobotama? (3, 4)

Bakufi bakoki kosala mabe epai na bato oyo bazali na bomoi? (5) Yesu akufaki likoló na ekulusu? (6) Mpo na nini ezali na ntina kosepelisa Nzambe? (7)

1. Bindimeli mpe mimeseno nyonso ezalaka mabe te. Kasi Nzambe andimaka yango te soki euti na mangomba ya lokuta to soki eyokani te na mateya ya Biblia.​—Matai 15:6.

2. Bosato: Yehova azali nde Bosato​—Nzambe moko kati na bato misato? Te! Yehova, Tata, azali “Nzambe bobele moko ya solo.” (Yoane 17:3; Malako 12:29) Yesu azali Mwana mobotami na Ye ya liboso, mpe atosaka Nzambe. (1 Bakolinti 11:3) Tata aleki Mwana. (Yoane 14:28) Elimo santu ezali moto te; ezali nde nguya ya Nzambe oyo ekosalaka mosala.​—Genese 1:2; Misala 2:18.

3. Eyenga ya Mbótama mpe Pásika: Yesu abotamaki na mokolo ya 25 Desɛ́mbɛ te. Abotamaki soko na 1 Ɔkɔtɔ́bɛ, na eleko ya mobu ntango babateli na mpate bazalaki kobatela bitongá na bango na butu na libándá. (Luka 2:8-12) Yesu asɛngaki soko moke te na baklisto ete bákumisaka mokolo oyo ye abotamaki. Kasi, alobaki na bayekoli na ye ete bámikundolaka, to bákanisaka liwa na ye. (Luka 22:19, 20) Eyenga ya Mbótama mpe mimeseno na yango euti na mangomba ya lokuta ya ntango na kala. Ezali mpe bobele bongo mpo na oyo etali mimeseno ya Pásika, lokola bosaleli maki mpe lapin. Baklisto ya liboso bazalaki kokumisa Eyenga ya Mbótama to mpe Pásika te; bobele bongo, lelo oyo baklisto ya solo bakumisaka yango te.

4. Bokundoli mikolo ya kobotama: Biblia elobeli mabaku bobele mibale oyo bato bakumisaki bokundoli ya mikolo na bango ya kobotama, mpe bato yango bazalaki basambeli ya Yehova te. (Genese 40:20-22; Malako 6:21, 22, 24-27) Baklisto ya liboso bazalaki kokumisa bokundoli ya mikolo ya kobotama te. Mimeseno ya kokumisa bokundoli ya mikolo ya kobotama euti na mangomba ya lokuta ya ntango na kala. Baklisto ya solo bapesanaka makabo mpe bazalaka na bileko ya kosepela na mabaku mosusu na boumeli ya mbula.

5. Bobangi ya bakufi: Bakufi bakoki kosala eloko moko te mpe bakoki koyoka eloko moko te. Tokoki kosalisa bango te, mpe bango bakoki kosala biso mabe te. (Nzembo 146:4; Mosakoli 9:5, 10) Molimo ekufaka; elandaka kozala na bomoi nsima na kufa te. (Ezekiele 18:4) Kasi na bantango mosusu baanzelu mabe, oyo babéngami bademó, bamimonisaka ete bazali bilimu ya bakufi. Mimeseno nyonso oyo mizali kosɛnga kozala na bobangi ya bakufi to kosambela bango, etongami likoló na lokuta.​—Yisaya 8:19.

6. Ekulusu: Yesu akufaki likoló na ekulusu te. Akufaki nde likoló na likonzi, to nzeté. Liloba ya Greke oyo ebongolami “ekulusu” kati na Biblia mingi elimboli eteni ya nzeté. Elembo ya ekulusu euti na mangomba ya lokuta ya ntango na kala. Baklisto ya liboso basalelaki ekulusu te mpe basambelaki yango te. Na yango, okanisi ete ekozala malamu kosalela ekulusu kati na losambo?​—Deteronome 7:26; 1 Bakolinti 10:14.

7. Ekoki kozala mpenza mpasi mingi mpo na kotika bindimeli mpe mimeseno wana. Bandeko mpe baninga bakoki komeka kopekisa yo ete obongola bindimeli na yo. Kasi kosepelisa Nzambe ezali na ntina mingi koleka kosepelisa bato.​—Masese 29:25; Matai 10:36, 37.

[Elilingi na lokasa 22]

Nzambe azali Bosato te

[Elilingi na lokasa 23]

Eyenga ya Mbótama mpe Pásika euti na mangomba ya lokuta ya ntango na kala

[Elilingi na lokasa 23]

Ntina ezali te ya kosambela bakufi to ya kobanga bango