Maloba ya nsuka oyo ebongi

MBALA mosusu olukalukaki na mikanda makambo oyo okoloba na lisolo na yo mpe otyaki yango na molɔngɔ. Mbala mosusu mpe obongisaki maloba ya ebandeli ya lisolo oyo ekolamusa mposa ya bato. Kasi ekoki kaka te, osengeli mpe kobongisa maloba ya nsuka oyo ebongi mpenza. Komona yango eloko moke te. Mbala mingi, makambo oyo tolobaka na nsuka ya lisolo na biso nde etikalaka mpe eumelaka na mitó ya bato. Soki maloba na yo ya nsuka esimbi mitema ya bato te, ata oyo nyonso olobaki liboso mpe ekosimba lisusu mitema ya bato te.

Talá bandakisa oyo: Pene na nsuka ya bomoi na ye, Yosua asalaki lisukulu moko monene liboso ya mibange ya ekólo ya Yisalaele. Nsima ya kolobela makambo oyo Yehova asalaki mpo na Yisalaele banda na ntango ya Abalayama, Yosua azongelaki kaka na mokuse makanisi ya ntina ya lisukulu na ye? Te. Na bolingo mpenza, alendisaki bato boye: “Bóbanga Yehova mpe bósalela ye na bosembo mpe na solo.” Tángá yo moko maloba ya nsuka ya Yosua, oyo ezali na Yosua 24:14, 15, (NW).

Na Misala 2:14-36 okokuta lisukulu mosusu oyo ntoma Petelo asalaki liboso ya ebele ya bato na Yelusaleme, na Fɛti ya Pantekote ya mobu 33 ya ntango na biso (T.B.). Libosoliboso, alimbolaki ete bazalaki komona esakweli ya Yoele ndenge ezali kokokisama, esakweli oyo elobeli ndenge Nzambe akosopa elimo na ye. Na nsima, amonisaki ndenge yango eyokani na bisakweli oyo etali Masiya na mokanda ya Nzembo oyo ezali kosakola lisekwa ya Yesu Klisto mpe ndenge akotombwama na lobɔkɔ ya mobali ya Nzambe. Bongo na nsuka ya lisolo na ye, Petelo amonisaki polele likambo oyo moto mokomoko oyo azalaki koyoka ye asengelaki kosala. Alobaki boye: “Na yango tiká ete ndako mobimba ya Yisalaele eyeba malamumalamu ete Nzambe akómisi ye Nkolo mpe Klisto, Yesu yango oyo bino bobakaki na nzete.” Bato oyo bazalaki wana batunaki ye boye: “Mibali, bandeko, tosengeli kosala nini?” Petelo azongiselaki bango ete: “Bóbongola mitema, mpe tiká ete moko na moko na bino abatisama na nkombo ya Yesu Klisto.” (Mis. 2:37, 38) Na mokolo yango, bato soki 3 000 oyo bayokaki ye basepelaki mpenza na makambo oyo bayokaki mpe bandimaki solo oyo etali Yesu Klisto.

Makambo oyo osengeli kobosana te. Maloba na yo ya nsuka esengeli mpenza koyokana na motó ya likambo ya lisolo na yo. Esengeli komonana ete ezali nde ndenge oyo osengelaki kosukisa makanisi ya ntina oyo olimbolaki. Atako mbala mosusu, okolinga kozongela maloba ya ntina ya motó ya likambo na yo, yo moko nde okopona soki osengeli mpenza kozongela motó ya likambo na yo mobimba to te.

Ntango ozali kosala lisolo na yo, mokano na yo ezali ete olendisa bato básalela makambo oyo ozali koyebisa bango. Na maloba ya nsuka, mokano na yo ya libosoliboso ezali ete omonisa bango likambo oyo basengeli mpenza kosala. Ntango oponaki motó ya likambo na yo mpe makanisi ya ntina, otalaki malamumalamu mpo na nini makambo yango ezali na ntina mpo na bato oyo bakoyoka yo mpe soki mokano na yo ekozala nini ntango okosala yango? Soki ezali bongo, boye oyebi malamu likambo oyo olingi básala. Sikoyo, osengeli kolimbola likambo yango mpe mbala mosusu, ndenge oyo basengeli kosala yango.

Longola komonisa bato oyo bazali koyoka yo likambo oyo basengeli kosala, maloba na yo ya nsuka esengeli mpe kolendisa bango. Esengeli komonisa bango ntina mpenza oyo basengeli kosala likambo yango mpe matomba oyo bakozwa soki basali yango. Soki obongisi malamumalamu fraze na yo ya nsuka mpe otii maloba oyo ebongi, yango ekosala ete lisolo na yo esimba mitema ya bato mingi koleka.

Kobosana te ete ozali kokóma na nsuka ya lisolo na yo. Maloba na yo esengeli komonisa yango. Osengeli mpe koloba mbangumbangu te mpe malɛmbemalɛmbe te. Koloba mbangumbangu tii na nsuka, bongo okati mbala moko, yango ebongi te. Kosukisa mpe na kokitisa mongongo te. Osengeli koloba na mongongo malamu, kasi kolekisa ndelo te. Maloba na yo ya nsuka esengeli komonisa ete okómi na nsuka ya lisolo na yo. Elobeli na yo esengeli komonisa ete ezali likambo ya ntina mingi mpe yo moko ondimi yango mpenza. Ntango ozali kobongisa ndenge oyo okosala lisolo na yo, kobosana te kozongela maloba na yo ya nsuka.

Maloba yango ya nsuka esengeli kozala molai ndenge nini? Wana etali kaka ngonga te. Maloba ya nsuka esengeli kobendana molai mingi te. Mpo na koyeba soki esengeli koumela ntango boni, okoki kotalela likambo oyo yango ekotinda bato oyo bakoyoka yo básala. Bato basepelaka mingi soki maloba ya nsuka ya lisolo ezali pɛtɛɛ, polele mpe ezali kolendisa bango. Maloba ya nsuka ya mwa molai oyo ezali na ndakisa moko ya mokuse ekoki mpe kozala malamu soki obongisi yango malamumalamu liboso. Kokanisá Mosakoli 12:13, 14 oyo ezali maloba mokuse ya nsuka mpo na mokanda mobimba ya Mosakoli, mpe Matai 7:24-27, oyo ezali maloba ya nsuka ya Lisolo Likoló ya Ngomba, lisolo moko ya mokuse koleka mokanda ya Mosakoli.

Na mosala ya kosakola. Ezali na esika moko te oyo okozala na mposa ya maloba ya nsuka koleka mosala ya kosakola. Soki omibongisi malamu mpe soki ozali kolinga bato, okosalela bango malamu mingi. Okoki kosalela toli oyo tolobelaki liboso mpe ekosalisa yo ata ntango ozali kosolola na moto moko kaka.

Lisolo ekoki kozala mokuse mpenza. Mbala mosusu moto yango azali na misala ya kosala. Okoki kotala moto na boumeli ya miniti moko mpamba. Soki ebongi, okoki koloba boye: “Namoni ete ozali na mosala. Kasi liboso nakende, tiká nayebisa yo likanisi moko oyo ekolendisa yo. Biblia emonisi ete Mozalisi na biso azali na mokano moko ya malamu mpenza: kokómisa mabele esika oyo bato bakozala na bomoi ya seko. Tokoki kozala na kati ya Paladiso yango, kasi tosengeli naino koyekola makambo oyo Nzambe azali kosɛnga.” To okoki kaka kosɛnga ye ozongela ye na ngonga mosusu oyo akozala na mosala te.

Ata soki lisolo na bino ekatani mpo moto yango azali na maloba mabe to azangi boboto, okoki kaka kosala likambo moko oyo ekosalisa ye. Kobosana te toli oyo ezali na Matai 10:12, 13 mpe Baloma 12:17, 18. Eyano ya boboto oyo okopesa ye ekoki mbala mosusu kobongola ndenge oyo ye atalelaka Batatoli ya Yehova. Yango ekozala mpenza malamu.

Kasi ntango mosusu osololaki lisolo moko kitoko na moto moko. Mpo na nini te kozongela likanisi ya ntina oyo olingi ete akanga na motó? Monisá ye mpe ntina oyo asengeli kosalela yango.

Soki omoni ete bokoki kosolola lisusu na mbala ekoya, yebisá moto yango ntina oyo asengeli kozela yo na mbala ekoya. Tuná ye motuna moko, mbala mosusu motuna moko oyo ezali na mokanda Ndenge ya kosolola na bato na Makomami to na mokanda moko oyo tosalelaka mpo na koyekola na bato Biblia. Kobosana te mokano na yo, ndenge Yesu amonisi yango na Matai 28:19, 20.

Okómi na nsuka ya boyekoli ya Biblia na moto moko? Soki ozongeli motó ya likambo, yango ekosalisa moyekoli ete abosana te makambo oyo bolobelaki. Soki osaleli mituna ya bozongeli, yango ekosalisa moyekoli ete akanga mpenza makanisi ya ntina na motó, mingimingi soki osali bozongeli yango mbangumbangu te. Soki otuni moyekoli motuna moko mpo na koyeba ndenge makambo oyo boyekoli ekoki kosalisa ye to ndenge oyo akoki koyebisa bato mosusu makambo yango, yango ekoki kosalisa ye akanisa ndenge akosalela makambo oyo ayekoli.​—Mas. 4:7.

Kobosana te: maloba na yo ya nsuka nde ekosala ete lisolo na yo mobimba esimba motema ya moto to te.