Kobikisa bato na nzela na bikamwiseli​—Litomba na yango ezali nini

Lindanda ezali kobeta mpe mbonda ezali kotoka kati na ndako-nzambe. Bato nyonso, mibali, basi mpe bana bazali kobina mpe koyemba, wana ezali bango kopumbwapumbwa. Ezali nde ntango malamu mpo na kosalisa bato.

Elati ye nzambala monene ya mpembe, mobikisi abandi kotya maboko na ye likolo ya andikapé moko oyo azali kotambola na mabolongo. Mpe nsima ekomi ngala ya mokufeli-miso, oyo abombi miso na ye mamonaka te nsima ya lineti moindo. Lokola andikapé abandi kotambola mpe mokufeli-miso abandi komona bato bangangi ete “ezali ekamwiseli!” . . .

MAKAMBO motindo oyo mazali komonana mingi na Afrike kati na ebele ya Mangomba oyo ezali kosala bikamwiseli ya kobikisa bato. Na yango, kati na eteni wana ya mokili, lokola mpe na mikili mosusu, babikisi bazali na bandimi mingi mpamba te bazali koloba ete bakoki kosilisa mikakatano ya lolenge nyonso na nzela ya libondeli mpe ya kondima epai na Nzambe. Bato mosusu bazali bongo koloba makambo na bango epai na babikisi mpamba te bazali komitungisa mpo bazangi mosolo, bamosusu mpo ete babikisa bango mpo babotaka te, mpo ete yango ezali kokitisa lokumu ya moto epai na baindo.

Nzokande, mbala mingi ezali mpo na bokono nde bazali kokende epai na babikisi. Atako mokili etondi na bankisi mpe atako minganga bazali kosala milende ya kokoka mpo na kopesa lisalisi epai na bato ya maladi, moto alongi naino te mpo na kozwa nkisi oyo ekoki kosilisa mpasi nyonso ya bato. Bato mosusu babebisi mosolo na bango mpamba mpo na koluka libikisi. Na yango, ntina ya kokamwa ezali te na komona ebele na bato komibalola epai na babikisi soki bazwi lisalisi ya malonga te.

Ezali na baoyo bazali kondima polele ete bazwaki lisalisi ya babikisi, mpe bazali komona te soki na likambo nini bikamwiseli yango bizali koyokana te na losambo ya boklisto. Na yango, lokola babikisi bazali mbala mingi kondima ete bazali kosala na nkombo ya Yesu, mbala mingi ezali komonana ete bato na bango bazali kosambela na mbala moko kati na lingomba moko oyo eyebani mpenza mpe kati na Lingomba oyo ezali kosala bikamwiseli. Kasi ebongi mpenza ete mosambeli ya solo ya Nzambe aluka lisalisi ya mobikisi moko? (Yoane 4:23) Mpe tokoki solo koloba ete ezali nde Nzambe azali kosala bikamwiseli oyo bisalami epai na mobikisi moko?