Biblia: Búku oyo eleki babúku nyonso

Biblia ezali búku oyo eleki kotekama na mokili mobimba, mpe na elónga. Yango ezali kotángama mpe kolingama koleka búku mosusu nyonso. Lelo oyo, ekanisami ete kokabolama na yango (ezala ya mobimba to biteni na yango) ezali na baekzamplere koleka miliare minei na nkóta koleka 2 000. Nzokande, eloko ezali kobenda likebi koleka mpenza kokabolama na yango ezali ete búku yango emilobi ete euti na Nzambe. Ntoma moklisto Paulo akomaki ete: “Makomami nyonso mapemami na [elimo, NW] na Nzambe.” (2 Timoté 3:16) Yango elimboli nini? Maloba “epemami na Nzambe” (na Greke, the·oʹpneu·stos) malimboli mpenzampenza ete “euti na mpema ya Nzambe.” Liloba ya Greke pneuʹma, oyo eyokani na yango elimboli “elimo.” Na yango, koloba ete epemami na Nzambe elimboli ete elimo santu ya Nzambe nde epusaki bakomi oyo bazalaki bato, na elobeli ya elilingi kokɔtisáká mpema na ye epai na bango, na boye ete oyo basalaki esengeli solo mpenza kobéngama ete Liloba ya Nzambe, kasi ya bato te. Ya solo, bato oyo basili koyekola Biblia bakamwaka na boyokani oyo ezali kati na mikanda na yango, bosolo na yango na makambo ya siansi, bosembo ya bakomi na yango, mpe oyo eleki ntina, kokokisama ya bisakweli na yango​—oyo nyonso esili kondimisa bamilió ya batángi na yango oyo bakanisaka na bozindo ete búku yango euti na mayele oyo eleki mayele ya bato.a

Kasi na meko nini Nzambe asɛnzɛlaki mpo na kotambwisa bokomi ya Biblia? Bamoko balobaka ete azalaki kolobela bakomi liloba mokomoko. Basusu balobaka ete apemisaki bobele makanisi oyo mazali na Biblia, kasi maloba te. Nzokande, mpo na koloba solo, kopemisa ekoki kosuka na mwango moko te, mpamba te Nzambe alobaki “na bankɔkɔ na nzela na basakoli . . . na mitindo mingi.” (Baebele 1:1; kokanisá na 1 Bakolinti 12:6.) Na lisoló lilandi, tokotalela myango oyo Nzambe asalelaki mpo na koloba na bato soko 40 oyo bakomaki Biblia.

[Maloba na nse ya lokasa]