Masoló ya Basakoli na Bokonzi

Kosilisa nzala ya elimo​—Kati na Eteyelo

“ESENGO na baoyo bazali komibanzabanza na bamposa na bango ya elimo,” ezali maloba na Yesu kati na Lisoló na ye likoló na Ngomba. (Matai 5:3) Bana mingi ya kelasi bazali na mposa ya koyeba Nzambe mpe mikano na ye kitoko. Balingi kozwa biyano na mituna mitali bomoi mpe koyeba lolenge basengeli kozala na bomoi mpo na kondimama na Nzambe mpe kozala na esengo. Mposa wana ya elimo emonanaki mingi kati na eteyelo moko na bisanga ya Vierges britanniques. Témoin de Jéhovah moko oyo azali kuna ayebisi ete:

◻ “Nayanganaki na likita ya baboti mpe balakisi na eteyelo oyo ezali na mboka, mpe makambo mingi malobamaki na ntina na drogue, masanga, kobima ya bilenge mibali mpe basi, makambo matali televizyó, bapwɛ ya bana na eteyelo, mpe makambo mosusu. Mpo na yango, nazwaki ekateli ya kokamata mokanda Les jeunes s’interrogent​—Réponses pratiques mpe nalakisaki yango na directrice ya eteyelo. Nsima ya kotalela mokanda yango, alobaki ete ezali yango nde eteyelo ezali na mposa mpe atunaki soki akoki kozwa mokanda moko moko mpo na bayekoli 120. Likambo yango litalelamaki na bankulutu ya lisangá, mpe bazwaki ekateli ya kopesa mikanda yango na eteyelo. Ntango tolobelaki yango, balakisi basengaki ete tolakisa mikanda yango na bana nyonso ya kelasi. Batemwe mibale bayaki, mpe esika etondaki na bana ya kelasi, baoyo bazalaki kozela mpo na kozwa mokanda yango. Bandeko balobaki na boumeli ya minite ntuku misato, mpe batangaki kati na bazulunalo ya la Société Watch Tower baeksperianse oyo emonisaki lolenge nini mokanda yango esalisaki bilenge mpe mikólo. Na nsima mikanda milakisamaki epai na bana ya kelasi oyo bazalaki mpenza na mposa na yango.”

Ezali esengo na koyeba ete eteyelo ezwaki ekateli ya koteya mokanda yango lokola eteni ebongisami na malako masengeli kopesama na bana ya kelasi ya 1^ère mpe 2^ème secondaire. Mokanda yango ekoyanola solo na mituna mingi oyo bana ya kelasi wana bazali komituna na ntina na bomoi mpe mikolo mizali koya.

Kosilisa Nzala ya Elimo kati na Papouasie-Nouvelle-Guinée

Eksperianse oyo elandi eyebisamaki na mokengeli moko ya zongazonga. Ezali koyebisa lolenge nini nzala ya elimo ezalaki kati na bato ya mboka wana mpe lolenge nini mikanda mikolimbolaka Biblia misilisaki nzala na bango.

◻ Mokengeli moko ya zongazonga ayebisi ete: “Lokola nazwaki te likoki ya kotala mboka Kamberatoro, nalekisaki ntango na ngai na kosakoláká elongo na lisangá moke oyo ezalaki kati na engumba Vanimo. Mposa ezali mingi na mboka yango. Bato mingi ya mboka Bewani bandimaki mikanda na biso. Mobali moko asengaki ngai ete nakende mpe kotala bafandi ya mboka wana, mpe abakisaki ete akopesa ngai esika ya kofanda. Bato mingi basili komimesenisa na mikanda na biso. Mbala na mbala oyo tozalaki kokende na engumba Vanimo, tozalaki kokabola karto misato ya mikanda oyo tozalaki komema. Mokanda mpo na masolo ya Biblia etalelami na motuya mingi lokola wolo. Bato bazali koluka yango mingi. Mikanda namemaki ekabolamaki nokinoki. Ntango tozalaki kolakisa bato mikanda na biso, basusu bazalaki kotuna ete: ‘Mokanda oyo ya langi ya mosaka ezali wapi?’ Mobali moko asengaki mikanda motoba. Apesaki ngai nkombo na ye mpe adresse na ye, mpe asengaki ngai ete nayebisa ye na nzela ya radio soki nazwi mikanda yango. Na bongo, akoya longwa na mboka na ye mpo na kozwa yango.” Mokengeli ya zongazonga abakisi ete: “Namonaki ete bato mingi kati na Vanimo bazali kondima mokanda L’humanité à la recherche de Dieu mpe mokanda Les jeunes s’interrogent​—Réponses pratiques.”

Makambo oyo mamonisi ete bato na motema sembo bazali na nzala mpo na bilei ya elimo oyo ezali kati na Biblia mpe mikanda oyo Jéhovah azali kopesa na nzela na “moombo na sembo mpe na mayele.” (Matai 24:45-47) Oyo nde esengo ba Témoins de Jéhovah bazali na yango na kosalisa baoyo bazali na nzala mpo na solo!

[Elilingi na lokasa 19]

Mosala ya kosakola kati na mboka Papouasie-Nouvelle-Guinée