Masoló ya Basakoli ya Bokonzi

Bazali kolónga ntembe kati na “Mokili ya makámá”

NTOMA Paulo atunaki baklisto ya Kolinti na ekeke ya liboso ete: “Soko kelelo ekoloba polele te, nani akoselingwa mpo na etumba? Boye mpe na bino; soko bokobimisa maloba mayebani ntina te, mpo na kolobaloba na ndenge na ndenge, nani akososola yango elobami?”​—1 Bakolinti 14:8, 9.

Na ekólo Papouasie Nouvelle-Guinée, oyo ntango mosusu ebéngamaka Mokili ya makámá, Batatoli ya Yehova bazali kokutana na mikakatano minene mpo na kosakola nsango oyo emonisami polele na Biblia. Bazali kosakola epai na bato oyo bazali koloba nkótá koleka 700 mpe oyo bazali na bonkɔkɔ ndenge na ndenge. Batatoli basengeli mpe komesana kotambola na mokili yango ya bangomba, na bisika oyo bizali mpenza na banzela te, mpe mobulu mpo na koboma bato oyo ezali sé komata. Longola mikakatano oyo nyonso, ezali na botɛmɛli oyo ezali kouta na mwa mangomba mpe ata na bakonzi ya biteyelo.

Atako bongo, kolakisama malamu na elimo mpe lisungi ya ebele ya mikanda mikolimbolaka Biblia na nkótá ya mboka ezali kobongisa Batatoli ya Yehova mpo na koyokisa nsango malamu polele lokola kelelo. Na mabaku mingi bato bandimaka, lokola lisoló oyo elandi emonisi yango:

• Na bozongeli ya kelasi, molakisi moko alingaki koyeba mpo na nini bana ya Batatoli ya Yehova bapesaka bɛndɛlɛ losako te mpe bayembaka loyembo ya ekólo te. Atunaki Maiola, moyekoli ya mbula 13 oyo asilá kozwa batisimo lokola Motatoli. Maiola apesaki ndimbola ya polele, oyo ezwaki moboko na Makomami. Molakisi andimaki makanisi na ye mpamba te yango eutaki na Biblia. Bandimbola na ye endimamaki mpe na balakisi mosusu ya eteyelo.

Na nsima, ntango basengaki na banakelasi ete bákoma mwa masoló mpo na ekizamɛ, Maiola aponaki motó ya likambo Bosato. Azwaki bilembo koleka banakelasi mosusu nyonso, mpe molakisi atunaki ye soki epai wapi azwaki makambo yango. Alakisaki ye mokanda Okoki kozala na bomoi ya seko na mabele oyo ekobongwana paradis na Lingelesi. Molakisi alakisaki mokanda yango na banakelasi nyonso, mpe mingi kati na bango bamonisaki mposa ya kozwa yango mpo na bango moko. Mokolo molandaki Maiola akabolaki mikanda 14 mpe bazulunalo 7 epai ya baninga na ye ya kelasi, mpe abandaki koyekola Biblia na baninga na ye misato. Mokano ya Maiola ezali ya kokóma mosaleli ya ntango nyonso.

• Na mboka moko penepene ya engumba Port Moresby, ezali na etuluku moko ya Batatoli ya Yehova oyo ezwami mosika na lisangá ezali kokutana na botɛmɛli uta na ebandeli ya bambula ya 1970. Nzokande, euti koleka mwa mikolo, bazwaki lisungi na esika oyo bakokaki komizela na yango te. Episkɔpɔ ya Lingomba ya Angleterre na mboka yango, mobotami ya Papouasie Nouvelle-Guinée oyo atangaki kelasi na ye na mikili ya bapaya, asengaki mokolo moko na bato banso oyo bayanganaki na ndakonzambe ete bátuna mituna. Moto moko atunaki ete: “Tozali na mangomba mibale na mboka na biso​—Lingomba ya Angleterre mpe Batatoli ya Yehova. Tosengeli kosala nini soki Batatoli ya Yehova bayei na ndako na biso?” Nsima ya kokanisa ntango molai, episkɔpɔ ayanolaki ete: “Talá, nayebi mpenza te soki nakoki kopesa yo eyano nini. Euti koleka mwa mikolo, bilenge mibale Batatoli ya Yehova bayaki na ndako na ngai. Batunaki ngai motuna, kasi atako natangaki na inivɛrsité, nayebaki eyano te. Nzokande bapesaki ngai eyano kozanga kokakatana uta na Biblia. Na yango nakoloba na bino te nini bokoki kosala​—moto na moto azwa ekateli. Bosengisami te na koyoka to koboya, kasi bósalela bango mobulu te.”

Momonisi-motamboli ya la Société Watch Tower oyo na nsima atalaki etuluku yango ya Batatoli ya Yehova alobaki ete: “Pene na bafandi nyonso ya mboka bazalaki koyoka Batatoli ya Yehova ntango bazalaki kosakola. Bamoko kútu bazalaki kobyanga bango na bandako na bango. Mpo na kosakola ezali sikawa paladiso.”