Ozali komikundola?

Osepelaki na botángi ya banimero ya sika ya Linɔ́ngi ya Mosɛnzɛli? Soki ezali bongo, talá soki okoki komikundola makambo malandi:

▫ Mpo na nini banɔ́ngi Bayisraele baponaki kolala na ndako ya Rahaba, mwasi ya pite?

Banɔ́ngi Bayisraele bazalaki komitambwisa engebene Mibeko ya Nzambe, na yango balalaki na ndako ya Rahaba mpo na kosala pite te. Likanisi na bango ekokaki kozala ete kokɔta na ndako ya mwasi ya pite esengelaki mpenza kobenda likebi na bato na engumba te likoló na bango. Esika ndako na ye etongamaki kuna na likoló na efelo ya mboka, elingaki lisusu kopesa bango nzela ete bákima kozanga nkaká. Kasi likambo mpenza ya ntina ezali ete, Yehova akambaki bango solo na ndako na mosumuki oyo motema na ye mosilaki kobongisama na bansango ya misala ya Nzambe epai na Bayisraele, na boye ete abongolaki motema na ye mpe etamboli na ye.​—12/15, nkasa 24-5.

▫ Lolenge nini nkanda ezali kosala bopusi likoló na kolɔngɔ́nɔ́ ya nzoto na biso?

Bolukiluki bozali komonisa ete nkanda ebimisaka ba hormones mingi ya kobulungana na makanisi. Kongala mbala na mbala ekoki kobebisa bokatikati oyo ezali kati na mitindo ya malamu mpe na mitindo ya mabe ya eloko ebéngami cholestérol, kotyáká biso na likámá ya kozwa bokɔnɔ ya motema mpe ya misisa.​—12/15, lokasa 32.

▫ Batoli nini ekosalisa biso na kokólisa bokaboli na biso ya bazulunalo Linɔ́ngi ya Mosɛnzɛli mpe Lamuká!?

Kotalela Linɔ́ngi ya Mosɛnzɛli mpe Lamuká! liboso; kozala na maloba ya pɛtɛɛ; koyeba kobongola masoló na kobongisáká mwa masoló mokuse; komityela mokano.​—1/1, nkasa 24 - 5.

▫ Mpo na nini Mose azali ndakisa eleki malamu ya botosi ya teokrasi oyo tosengeli kolanda?

Mose azalaki koluka litambwisi ya Yehova; azalaki kotalela bomoto na ye moko te, kasi azalaki nde komibanzabanza mpo na lokumu ya Yehova; azalaki na kondima makasi; mpe abosanaki soko moke te ete Yehova nde azalaki mpenzampenza Moyangeli ya Yisraele.​—1/15, lokasa 11.

▫ Wapi mwa makambo kati na yango mateya mauti na Nzambe mazali kolónga?

Mateya mauti na Nzambe mazali kolónga na kopesáká epai na libota na Yehova bososoli mokemoke ya solo. Mazali komema bato kati na pole ya elimo, mpe mazali komonisa na basɔkɛmi lolenge ya kosambela Nzambe “na elimo mpe na solo.” (Yoane 4:24) Mateya mauti na Nzambe mazali lisusu kolónga likoló na mimekamo mpe mokili oyo mabe.​—2/1, nkasa 10-12.

▫ Nini ezali sɛkɛlɛ́ mpo na kolónga kopesa toli malamu?

Sɛkɛlɛ́ ezali bongo komonisa limemya mpo na moto mosusu mpe mpo na lotómo na ye ya kotalelama na mwa lokumu. Na yango, moklisto mopesi-toli asengeli kozala na boboto mpe kozala na mpiko, kasi asengeli mpe kopesa lokumu epai na moto oyo azali kozwa toli.​—2/1, lokasa 28.

▫ Lolenge nini Lingomba ya Katolike ya Loma ekómaki kondima liteya ya Ntómbwa ya Malia?

Na bikeke oyo bilandaki kufa na Yesu, likanisi ya Ntómbwa ya Malia liyebanaki te epai na baklisto. Nzokande, nsima wana Bosato ekómaki liteya lindimami na Lingomba ya Katolike, babandaki kopesa Malia ntina monene mpenza. Liteya ya Ntómbwa endimamaki bobele na Novɛ́mbɛ 1, 1950, ntango pápa Pie XII asakolaki ete: “Tolimboli yango ete ezali liteya limonisami na Nzambe.”​—Munificentissimus Deus.​—2/15, nkasa 26-7.

▫ Kati na Yilimia mokapo 24, bikɔlɔ́ mibale ya mbuma na mosuke, mbuma malamu ya mosuke mpe mbuma mabe ya mosuke, emonisaki nini?

Mbuma malamu ya mosuke ezalaki kolimbola Bayuda ya liboso oyo bakendeki na boombo na Babilone, oyo ndambo na bango elingaki kozonga lisusu na Yuda. Mbuma mabe ya mosuke ezalaki elilingi ya mokonzi Sidikiya mpe baoyo, elongo na ye batombokelaki mokonzi Nebukadenesala atako bakataki ndai na nkombo na Nzambe. Bobele bongo, na ntango na biso ezali na batikali ya Yisraele ya elimo, baoyo bazali kobota mbuma malamu kati na bomoi na bango, na bokeseni na bakonzi na mangomba na boklisto ya lokuta, baoyo bazali kobota mbuma ya kopɔla.​—3/1, nkasa 14-16.

▫ Ba Quartodécimans bazalaki banani, mpe mpo na nini bazali na ntina mpo na baklisto na mikolo na biso?

Nsima ya eleko na bantoma, ezalaki na baoyo bakumisaki Elambo ya Mpokwa ya Nkolo na mokolo ya Nisan 14, mbula na mbula, kolandáká matambe ya bantoma. Bayaki koyebana lokola “Baízomi na minei,” to Quartodécimans. Yango ezali na ntina lelo, mpamba te ezali komonisa ete ata nsima wana bantoma bakufaki, ezalaki na baoyo balandaki kokanisa kufa na Yesu mbala moko na mbula na mokolo ya Nisan 14.​—3/15, nkasa 4-5.

▫ William Whiston azalaki nani?

Azalaki moto ya mayele ya mboka Angleterre na ekeke ya 18, moninga ya penepene ya Sir Isaac Newton. Whiston abongolaki Makomami ya Greke ya boklisto, atɛmɛlaki na polele liteya ya Bosato, mpe azalaki molakisi ya zébi ya minzoto mpe ya Matematiki. Nzokande, Whiston ayebani mpenza mingi koleka mpo na mabongoli na ye na Lingelesi ya mikanda ya Flavius Josèphe, Moyuda mokomi ya Lisoló ya kala.​—3/15, nkasa 26-8.

▫ Na ndimbola nini moto asalemaki na elilingi ya Nzambe? (Genese 1:27)

Moto asalemaki na makoki ya kokamwa ya komonisa bizaleli minene ya Nzambe lokola bolingo, boyengebene, bwanya, mpe nguya​—bakisá mpe bizaleli misusu.​—4/1, lokasa 25.