Osepelaka na boyekoli na yo moko?

MOSALELI nyonso ya sembo ya Nzambe asengeli kozwa nsáí ya kobomba ntango mpo na boyekoli na ye moko ya Biblia. (Nzembo 1:1, 2) Nzokande, koyokáká ete makambo mingi mazali kosɛnga ntango mpe nguya na bango, basusu bazali komona ete ezali mpasi kopesa ntango mingi na boyekoli na bango lokola bazali kolinga yango.

Nzokande, mpo na kozala ntango nyonso basaleli ya molende ya Nzambe, banso basengeli kobakisa mokolo na mokolo esengo mpe nguya na bango na kokundoláká mitindo ya sika to ya mozindo ya solo ya Liloba na Nzambe. Mateya ya solo ya Biblia oyo malendisaki yo na boumeli ya mibu mingi makoki mbala mosusu te kolendisa yo mingi lelo oyo. Na yango, ezali malamu, ezali ata na ntina mingi, ete tósala molende mpenza mpo na kozwa lisosoli ya sika ya solo mpo ete tómibatela makasi na elimo.

Lolenge nini mibali ya kondima ya ntango na kala bazalaki komibatela makasi na elimo na nzela ya boyekoli ya bango moko ya Liloba na Nzambe? Lolenge nini basaleli mosusu ya Yehova ya ntango na biso bazali kokómisa boyekoli ya bango moko likambo ya kosepelisa mpe ya kopesa mbano? Lolenge nini bazwaki mbano mpo na milende na bango?

Balendisaki nguya na bango na boyekoli na bango moko

Yosiya, Mokonzi ya Yuda azwaki meko ya kolongola bikeko na molende mingi koleka nsima ya koyoka ‘búku ya Mobeko ya [Yehova] epɛsamɛlaki na nzela na Mose.’ Na ntembe te wana ezalaki mbala ya liboso te azalaki kotalela eteni oyo ya Liloba ya Nzambe; kasi koyoka nsango uta na maniskri ya ebandeli mpenza ebakisaki molende na ye kati na etumba mpo na losambo ya solo.​—2 Ntango 34:14-19.

Mosakoli Danyele asosolaki ‘motuya na mbula oyo ekoleka wana Yelusaleme ekotikala na libebi’ mpe bosikisiki na yango bobele na mokanda ya Yilimia te, kasi lisusu kati na “mikanda.” Yango esangisaki mpenza mikanda lokola Levitike (26:34, 35), Yisaya (44:26-28), Hosea (14:4-7), mpe Amosa (9:13-15). Makambo oyo ye andimisaki bosolo na yango na nzela ya boyekoli ya molende ya mikanda ya Biblia ememaki mobali wana ya kobanga Nzambe na koluka ye kati na libondeli. Masɛngi na ye ya mɔ́tɔ mazwaki biyano na nzela ya bimoniseli mpe endimiseli mingi na ntina na engumba ya Yelusaleme mpe bato na yango.​—Danyele, mokapo 9.

Yosiya, oyo “asalaki malamu na miso na [Yehova],” mpe Danyele, oyo azalaki “moto alingami mingi” na miso na Nzambe, bakesenaki mpenza te na biso oyo tozali lelo na bomoi. (2 Mikonzi 22:2; Danyele 9:23) Milende na bango ya komipesa mingi mpo na koyekola biteni ya Makomami oyo bizalaki na eleko wana epesaki bango litomba ya kozala makasi na elimo mpe esalisaki bango na kozala na boyokani makasi elongo na Nzambe. Ezali mpe motindo moko mpo na basaleli mosusu ya Yehova ya ntango na kala, lokola Yefeta, mokomi moko ya Nzembo na ndako ya Asafa, Nehemia, mpe Setefano. Bango banso bapesaki bilembeteli ya boyekoli ya likebi mingi ya eteni ya Biblia oyo ezalaki na ntango na bango.​—Basambisi 11:14-27; Nzembo 79, 80; Nehemia 1:8-10; 8:9-12; 13:29-31; Misala 6:15 kino 7:53.

Tiká ete mosala ya kosakola mozala elendiseli

Ntalo monene ya basaleli ya Yehova ya mikolo na biso oyo basili kosalela ye na boumeli ya mibu mingi bazalaka na manáka ya boyekoli na bango moko. Bamonaki ete yango ezali na ntina mingi mpo na kotikala makasi na elimo mpe kokokisa malamu mikumba na bango. Atako bongo, mingi kati na bango bazali kondima ete ezali likambo ya pɛtɛɛ te kobatela ntango nyonso bokatikati na lolenge ya kosalela ntango mpe makasi na bango kati na boyekoli mpe makambo mosusu oyo masengeli te kotalelama na bopotu.

Nzokande, komibatela makasi na elimo na nzela ya boyekoli ya molende ya biso moko ezali na ntina monene mpo na kokokisa mposa oyo ezali kati na mosala ya boklisto na eteni ya nsuka ya mosala oyo ya kosakola bokonzi. Baoyo bazali kosepela mingi na bososoli ya sika mpe ya mozindo ya Liloba ya Nzambe bazali kolónga ntembe ya kosimba mitema na bato oyo bazali na nzala. Yango ezali solo ata soki moto atindami na esika oyo kolɔ́ba mbisi ya elimo ekoki kopesa matomba mingi to soki azali kolendendela kati na bateritware oyo esakolami mingi epai bato bazali komonisa bosepeli mingi te.

Komileisa mbala na mbala na Liloba ya Nzambe

Lolenge oyo basusu bazali kosala ekoki kopesa yo likanisi na lolenge oyo okoki kosepela mingi na momeseno na yo ya boyekoli to na lolenge oyo libota na yo likoki kosalela malamu ntango ya boyekoli. Kati na makambo oyo mosaleli ya Nzambe akolinga kozanga te ezali botángi ya Liloba ya Nzambe yango moko mbala na mbala. Mingi basili kokómisa lokola mokano kotánga mikapo misato to minei ya Biblia pɔ́sɔ nyonso. Olingi kotánga Biblia mobimba kati na mbula moko? Na bongo okozala na esengo ya kolekisa ntango mingi na kotángáká yango, mbala mosusu miniti 30 na mokolo.

Osili kotánga Biblia mobimba mbala mibale to koleka? Mpo na nini okomityela mokano ya sika te? Mpo na kosala mwa mbongwana, moklisto mwasi moko atángaki mikanda ya Biblia na kolanda molɔngɔ́ oyo yango ekomamaki. Asimbaki makambo mingi, oyo matalaki molɔngɔ́ oyo makambo masalamaki, makambo oyo azangaki kososola yango na mbala ya liboso. Mwasi moklisto mosusu asili kotánga Biblia mobimba mbala mitano na boumeli ya mibu mitano oyo miuti koleka, na mbala moko na moko nyonso asalaki yango na lolenge lokeseni. Na mbala ya liboso, atángaki yango kobanda ebandeli kino nsuka. Na mbala ya mibale, akamataki likanisi ya mokapo moko na moko na kokomáká yango na molɔngɔ́ moko to na milɔngɔ́ mibale kati na kayé na ye. Kobanda na mbula ya misato, azwaki ebimeli ya makomi minene oyo ezali na mitindami, ya liboso azalaki kopona mitindami oyo mizali na pembeni mpe na nsima atyaki likebi mingi na makomi na nsé ya lokasa elongo na makambo makomami na appendice. Mbala ya mitano, asalelaki bakaláti ya Biblia mpo na kokólisa boyebi na ye ya zébi ya mikili ya Biblia. Alobi ete: “Mpo na ngai, kotánga Biblia ekómaki kopesa esengo lokola bilei.”

Bayekoli mosusu ya molende ya Biblia bamonaki ete ezali na litomba ya kozala na Biblia moko oyo bazali kosalela bobele mpo na boyekoli na bango, epai bakoki kokoma na pembeni makambo ya kosepelisa, bililingi oyo ezali kotinda na kokanisa, to lokasa ya mikanda misusu oyo bakoki kotala na nsima. Mosaleli moko ya ntango nyonso atalelaki ete ezali esengo na nsuka ya sanza nyonso kokoma kati na Biblia na ye ya boyekoli makambo ya sika oyo ayekolaki na boumeli ya sanza yango. Alobi ete: “Kozela na esengo nyonso bangonga na ngai wana ya motuya mingi ezali kosalisa ngai na kokokisa mikano misusu mpo na sanza oyo ezali koya.”

Makanisi ya mayele mingi

Ozali komona ete manáka na yo etondi na makambo ya ntina ya mokolo na mokolo to ya pɔ́sɔ na pɔ́sɔ mpe ozali na mposa ya mwa makanisi mpo na kosalela malamu mwa ntango na yo? Boye, kamatá ntango nyonso eloko oyo olingi kotánga, mpe salelá ntango na yo ya bopemi. Na ndako to epai oyekolaka, na meko oyo ekoki bongisa babúku mpe mikanda misusu ya boyekoli na motindo boye ete okoka kozwa yango nokinoki. Bongisá malamu esika ya boyekoli na yo kasi kómisá yango te kitoko mingi ete epesaka yo mpongi. Ozali na mokumba ya kosala lisoló? Tángá yango na libaku ya liboso mpenza, na nsima tiká ete makanisi yango mazongelaka yo wana ozali kopema to ozali kosala misala misusu.

Basusu bakoki kosala elongo na yo na kosaleláká ntango malamu mpo na litomba na bino banso. Na ndakisa, moto moko akoki kotángela yo na mongongo makasi makambo oyo masɛngaka likebi mingi te wana ozali kosala misala ya mokolo na mokolo to wana ozali kobongisa tii mpo na motángi na yo ya boboto. Ezali boni mpo na boyokani kati na libota mpo na kozala na ntango ya kimya mpo na boyekoli ya moto na moto? “Mbala ya nsuka osepelaki kotánga nini?” Mbala mosusu okoki koyeba oyo baninga na yo bayekolaki na kobandáká lisoló na lolenge wana.

Ozali na mposa ya kokɔtisa mwa makanisi ya sika kati na manáka ya boyekoli na yo? Okoki komityela mokano ya kozala na ntango ya koyekola lolenge moko lokola bandeko mingi bamityelaka mokano ya kosala masoló ya Biblia elongo na bato mosusu. Mosakoli moko ya ntango nyonso (mobongisi-nzela) amityelaka mokano ya motuya ya bangonga ya koyekola mpe asepelaka mingi na komona ete azali kokokisa mokano yango. Basusu bazali kotya ndelo na ntango ya kotala televizyó mpe na lolenge wana bazali kozwa ntango ya koyekola. Mingi bazali kopona motó ya lisoló oyo bazali kolanda koyekola na boumeli ya mwa ntango, lokola mbuma ya elimo, lisoló ya mikili ya Biblia, to myango malamu ya koteya. Basusu basepelaka kosala bitánda ya makambo oyo masalamaki, lokola oyo mazali komonisa boyokani kati na mikonzi ya Yisraele mpe basakolia to Misala ya bantoma mpe mikanda ya Paulo.

Bilenge, bolingi kozala na kondima makasi? Mpo na nini bokoki te kopona mokanda moko mpo na kosala boyekoli ya mozindo na boumeli ya eleko ya bopemi oyo ekoya? Moyekoli moko ya Eteyelo ya katikati oyo asili kozwa batisimo aponaki búku L’Humanité à la recherche de Dieu, oyo ebimisami na la Société Watch Tower. Mokapo moko nsima na mokapo mosusu, akomaki makanisi ya ntina oyo ye ayekolaki kati na kayé moko. Ezalaki mpenza ntembe mpe esɛngaki ntango mingi koleka oyo ye akanisaki. Nzokande, ntango asilisaki búku yango mobimba, akamwaki mingi na nsango ya solo oyo ezali kati na Biblia.

Zalá na mposa makasi ya koyekola

Ntalo monene ya basaleli ya Yehova ya mikolo na biso bazali “kosala mingi kati na mosala ya Nkolo.” (1 Bakolinti 15:58, NW) Atako obongisi lisusu manáka na yo mpe osali milende mpenza, okobongola makambo mingi te na ebongiseli na yo ya pɔ́sɔ na pɔ́sɔ. Nzokande, mposa makasi na yo ya kozwa boyebi mozindo ya solo mpe ya komibatela na boyokani na mokano ya Yehova oyo esili komonisama ekosalisa yo na kobongisa mimeseno na yo ya boyekoli.

Tozali kozwa elendiseli na koyoka matomba oyo mazwamaki na baoyo babongisaki lolenge na bango ya koyekola. Ndeko mobali moko moklisto, oyo amonaki ete azalaki kobungisa momeseno malamu ya kozwa boyebi mozindo ya solo, abongisaki ntango na ye mpo ete akoka kopesa bangonga mingi ya ntango oyo azali na mosala te mpo na boyekoli na ye moko. Alobi ete: “Esili komemela ngai nsáí monene oyo nazalaki na yango liboso te. Na elikya oyo ezali ntango nyonso kokóla epai na Nzambe lokola eutelo ya Biblia, namoni ete nakoki kosolola na molende nyonso na bato mosusu na ntina na kondima. Nazali kooka ete naleisami malamu, nazali makasi na elimo mpe nazali na bosepeli na nsuka ya mikolo nyonso.”

Mokɛngɛli-motamboli moko ya Batatoli ya Yehova, oyo atalaka masangá mingi, alobelaki matomba mosusu na lolenge oyo: “Baoyo bazali na molende kati na boyekoli na bango moko balobaka mbala mingi na nguya mpe polele. Bayokanaka malamu elongo na basusu, mpe balembaka nokinoki te na maloba na bato mosusu. Wana bazali na mosala ya kosakola, bazali komiyokanisa na makambo mpe bazali kokeba na bamposa na bato oyo bakutani na bango.”

Abakisi likambo oyo basusu basengeli kobatela na makanisi ntango bazali kotalela lolenge na bango ya koyekola. “Na makita epai boyekoli ya Makomami ezali kosalama, mingi batángaka makambo oyo bazali koloba bobele na mikanda. Basengelaki kozwa matomba mingi soki bakanisaka likoló na lolenge lisoló yango likangisami na makambo oyo basili koyekola kala to na bomoi na bango moko.” Okanisi ete okoki komibongisa na likambo yango?

Mosakoli Danyele, wana azalaki na mibu koleka 90, akanisaki te ete ayebi makambo nyonso na banzela ya Yehova. Na bambula ya nsuka ya bomoi na ye, atunaki likambo moko oyo azalaki kososola mpenza malamu te: “Ɛ Nkolo na ngai, makambo oyo makosuka na nini?” (Danyele 12:8) Ntembe ezali te ete mposa makasi wana ya koyeba solo ya Nzambe nde ezalaki liziba ya bosembo monene oyo amonisaki kati na bomoi na ye oyo etondaki na makambo.​—Danyele 7:8, 16, 19, 20.

Moko na moko kati na basaleli ya Yehova azali mpe na mokumba monene ya kotɛlɛma ngwi lokola Motatoli na Ye. Zalá na mposa makasi ya koyeba komibatela makasi na elimo. Meká kobakisa likambo moko to makambo mibale ya sika pɔ́sɔ na pɔ́sɔ, sanza na sanza, to mbula na mbula na manáka ya boyekoli na yo moko. Talá lolenge Nzambe akopambola milende nyonso oyo okosala. Ee, sepelá na boyekoli ya yo moko ya Biblia mpe na matomba oyo yango ezali komema.​—Nzembo 107:43.

[Maloba na nse ya lokasa]