Lingomba na yo—Ezali masuwa oyo osengeli kotika yango te?
MASUWA moko ezwami kati na mopepe makasi. Na kozanga elikya nyonso, basáli kati na yango bazali kosala makasi mpo na kobikisa masuwa na bango, kasi basengeli kokamata ekateli moko ya mpasi: soki bakotikala kati na masuwa to bakolongwa na yango mpo ete bákoka komibikisa. Oyebi ete likambo oyo ya nsɔ́mɔ esalelami lokola elilingi mpo na makambo matali teoloji?
Bateolojié, mingimingi bato ya mayele ya Katolike, bakokanisaka mbala mingi lingomba na bango na masuwa oyo ezali na nkaká kati na mopepe makasi. Balobaka ete masuwa yango, oyo Yesu to Petelo nde bazali basímbi yenda na yango, ezali nzela bobele moko mpo na kozwa lobiko. Etɛlɛmɛlo ya bakonzi ya mangomba ezali oyo ete: ‘Bókima masuwa soko moke te. Lingomba esilaki kokutana na mikakatano minene liboso, kasi ezali masuwa oyo ebikaki na mikakatano nyonso ya liboso.’ Bamoko balobaka ete, ‘Mpo na nini kotika lingomba? Maponi nini mazali na yango? Mpo na nini te kotikala wana mpe kokamba yango na esika mai ezali na kimya?’
Na boyokani na elobeli oyo ya elilingi, bato mingi, oyo bazali kati na mangomba ndenge na ndenge, balobaka ete: ‘Nayebi ete kati na makambo mingi, lingomba na ngai ezali mabe, kasi nakanisi ete ekobongwana. Nalingi kotika yango te. Nalingi kopesa lisungi na ngai na kosalisáká yango mpo ete elónga mikakatano na yango.’ Moto akoki kopusama na kokanisa lolenge wana mpo na bolingo ya motema mpe ya sembo oyo azali na yango mpo na lingomba ya bankɔ́kɔ na ye to ata mpo na kobanga “kokaba” yango.
Ndakisa monene ezali oyo ya Hans Küng, teolojié ya Katolike oyo ayebani malamu mpe azalaki motomboki, oyo alobaki ete: “Nasengeli nde kotika masuwa na ntango ya mopepe makasi, kotika baoyo nasili kosala na bango elongo kati na masuwa kino sikawa ete bábunda na mopepe makasi, kopepa mai, mpe mbala mosusu kobunda mpo na komibikisa?” Azongisaki ete: “Nakotika te molende na ngai kati na lingomba.” Liponi mosusu ekozala bongo ya “kotika lingomba oyo, mpo na lipɛngwi na yango, mpo ete nalingi bizaleli bitombwami, mpe mbala mosusu, mpo na kozala moklisto ya solosolo.”—Die Hoffnung bewahren.
Kasi, moto akoki kotikala kati na masuwa ya lingomba na ye moko na elikya ete, Nzambe, na mawa na ye, akotikela yango ntango ezangi ndelo mpo na kosala mbongwana? Yango ezali likambo moko monene mingi. Lokola elobeli ya elilingi emonisi yango, kolongwa na lombangu nyonso na masuwa oyo ezali na likámá mpo na kokɔta na bwato oyo ezangi libateli ekozala likámá motindo moko na kotikala kati na masuwa oyo ezali kozinda. Ezali likambo ya mayele kotikala kati na lingomba moko ata soki yango ekoki komema na likambo nini, ata soki ezalela ya makambo na yango ezali nini? Mangomba na mikolo na biso ezali na makoki ya kondima mbongawana? Kino ntango nini Nzambe akotikela yango nzela ete ekóba ntango nyonso kotɛmɛla mokano na ye?
[Maloba mpo na kolimbola eutelo ya bafɔtɔ na lokasa 3]
Chesnot/Sipa Press