Ozali Komikundola?

Osepelaki na botángi ya banimero ya Linɔ́ngi ya Mosɛnzɛli oyo eutaki kobima? Na yango, okosepela komikundola makambo oyo:

▫ Solo na makambo ya losambo ekoki komonana?

Yesu Klisto alobaki ete: “Bokoyeba solo, mpe solo ekosikola bino.” (Yoane 8:32) Yesu asukaki te bobele na komonisa ete solo ekoki komonana kasi amonisaki mpe ete mpo na komona yango esengeli ete losambo na biso endimama epai na Nzambe. Ayebisaki mwasi Mosamalia ete: “Basambeli ya solo bakosambela Tata [na elimo, NW] mpe na solo.” (Yoane 4:23)​—15/4, lokasa 5.

▫ Robert Estienne azalaki nani, mpe na ndimbola nini tokoki kobosana ye te?

Robert Estienne azalaki monyati mikanda oyo azalaki na bomoi na ekeke ya 16. Apesaki bomoi na ye mobimba na mosala ya kobimisa Makomami mosantu mpe asalaki milende mpo na komonisa polele maloba ya Biblia na lolenge ekomamaki uta ebandeli. Mwango na ye ya kokabola makomi ya Biblia na milɔngɔ́ ya kotánga esalelami lelo oyo kati na mokili mobimba.​—15/4, nkasa 10, 14.

▫ Lolenge nini tozwaka matomba na botángi ya Biblia mokolo na mokolo?

Makomami mazali ntango nyonso kozwa ndimbola ya sika mpo na biso, mpe bisakweli oyo bizali kolobela mikolo ya nsuka bizali mpenza kobenda likebi wana tozali kokokanisa yango na makambo oyo touti komona, koyoka to kokutana na yango biso moko. Wana tozali kokóma na eksperianse mingi na makambo ya bomoi mpe koyika mpiko liboso na mikakatano, tozali kopesa motuya mingi na batoli ya Biblia. (Masese 4:18)​—1/5, lokasa 14.

▫ Lolenge nini okoki komikundola mikapo ya Biblia?

Wana ozali kotánga Biblia, tyá elembo na mikapo okomaki mpo ete okoka mpenza komikundola yango, to komá yango likoló na bakarte mpe tyá yango na esika oyo okomona yango mikolo nyonso. Wana ozali komeka kokanga yango na motó, manyolá likoló na yango mpe salelá yango. Komeka te kokanga mikapo mingi na mbala moko.​—1/5, nkasa 16, 17.

▫ Makambo nini oyo ezali kati na Evanzile ya Luka ezali bongo libakisami likoló na oyo bakomi mosusu ya Baevanzile bayebisaki?

Atako eteni monene ya lisoló oyo Luka akomaki ekokani na oyo ya Matai, 59 % ya makambo ekesani. Luka akomaki makamwisi motoba ya Yesu Klisto mpe masese na Ye mingi, oyo, koleka mbala mibale, malobami te na bakomi mosusu ya Baevanzile.​—15/5, lokasa 12.

▫ Engɛngiseli nini ya pole ya kokamwa emonisamaki na 1935?

Na mobu wana basaleli ya Yehova basosolaki ete ebele monene oyo elobelami na Emoniseli 7:9, 14 elobelaki te kelasi ya mibale ya bato oyo bakokenda na likoló, kasi baoyo elikya na bango ezali bongo ya kofanda na mabelé. (Yoane 10:16)​—15/5, lokasa 20.

▫ Makambo nini mabongi tokoki kosala mpo na kobɔndisa baoyo bazali na mawa?

Yokamelá. Pesá elikya. Sombá ntango. Zwá likanisi ya kosala eloko soki ebongi. Tindá nkomá to kálati ya kobɔndisa. Bondelá elongo na bango. (Yakobo 5:16) Landá kosunga bango.​—1/6, nkasa 13, 14.

▫ Bandeko mibali mpe bandeko basi ya elimo bakoki kosala nini mpo na kosunga baoyo bazali kati na mabota makabwani na makambo ya losambo?

Kolobela bango ntango nyonso maloba ya kolendisa, ya malamu, mpe ya kobɔndisa. (1 Batesaloniki 5:14) Yango ezali kopesa bango kopema kati na makanisi mpe kati na nzoto na bango. Na ntango ebongi mpe ya malamu, byangá bango kati na misala ya teokrasi mpe ya kominanola. Kɔtisá bango kati na mabondeli na yo. (Baloma 1:9; Baefese 1:16)​—1/6, lokasa 29.

▫ Mbano nini tokoki kozwa na komonisáká motema pɛtɛɛ wana tozali kati na mosala ya kosakola?

Motema pɛtɛɛ esungaka basakoli ya Bokonzi ete báyika mpiko soki bato bazali koyoka bango te to soki bakutani na botɛmɛli. Na esika ya koswana na balobani oyo basiliki, baministre oyo bazali na motema pɛtɛɛ bakokoka kopesa eyano ya bopɔlɔ mpe bakokenda na boboto nyonso, na kobateláká bongo kimya mpe esengo. (Matai 10:12, 13) Lisusu, bato oyo bakokani na bampate bakobéndama na nsango ya Bokonzi.​—15/6, lokasa 9.

▫ Mpo na nini koyeba solo ezali na ntina mingi?

Koyeba solo ezali kosikola biso na nkuta, na mabungá, mpe na biyambayamba. Mpe wana tozali komitambwisa engebene yango, solo ekolendisa biso ete tóyika mpiko kati na mikakatano, mpe ezali kopesa biso elikya na kopesáká biso nzela ya koyika mpiko kati na komekama ya motindo nyonso.​—1/7, lokasa 8.

▫ Na mokumba nini ya liboso mpenza lisangá ya baklisto bapakolami likitanaki na esika ya Yisraele ya mosuni?

Na mokumba ya kotatola bonene ya Yehova kati na bikólo nyonso. (Yisaya 43:21; 1 Petelo 2:9)​—1/7, lokasa 19.

▫ Maloba oyo ya Petelo ete mobali asengeli ‘kopesa lokumu’ epai na mwasi na ye elimboli nini? (1 Petelo 3:7)

Mobali oyo azali kokumisa mwasi na ye akokitisaka ye te to akotalela ye na motuya moke te. Nzokande, amonisaka na maloba na ye mpe na misala na ye​—wana bazali bango mibale to mpe kati na bato mingi​—ete apesaka ye motuya. (Masese 31:10-31)​—15/7, lokasa 19.

▫ Mpo na nini tokoki koloba ete kobengana mosáli mabe oyo aboyi kobongola motema na lisangá ezali likambo ya bolingo?

Kobimisa moto na lisangá ezali elembo ya bolingo mpo na Yehova mpe banzela na ye. (Nzembo 97:10) Likambo yango ezali komonisa bolingo mpo na baoyo bazali kolanda nzela ya sembo mpamba te ezali kolongola moto oyo akoki kokɔtisa bopusi mabe kati na bango; yango ezali mpe kobatela bopɛtɔ ya lisangá. (1 Bakolinti 5:1-13)​—15/7, lokasa 25.

▫ Lolenge nini lelo oyo tokoki koyeba “moombo ya sembo mpe ya mayele,” oyo Yesu alobelaki kati na Matai 24:45-47?

Ayebani malamu mpenza mpo na mosala oyo azali kosala na kobimisáká mikanda mikolimbolaka Biblia, na koteyáká mpe na kosakoláká “nsango malamu na Bokonzi,” mpe na kotosáká mpenza Liloba ya Nzambe, Biblia. (Matai 24:14; 28:19, 20)​—1/8, lokasa 16.