Ondimaka ete moto azongaka na bomoi mbala na mbala?

MUKUNDBHAI atindelaki mwana na ye ya mobali, moyekoli na Iniversité moko na États-Unis nkomá ezalaki na maloba oyo: “Ozali komikundola lisusu elenge mwasi oyo azalaki kofanda pembeni ya ndako na biso, oyo bolinganaki na ye ntango ozalaki naino kokóla awa na Inde? Nsima ya mwa bapɔ́sɔ akobala. Nakanisaki ete esengeli oyeba yango.”

Mpo na nini tata yango akomelaki mwana na ye nsango wana? Kútu, bambula mingi liboso, Mukundbhai asilikaki makasi mpo na kopekisa lolango wana ya bomwana. Lisusu, mwana na ye asila kokende na États-Unis mpo na kolanda kelasi molai ya mbula motoba. Azalaki lisusu na nsango ya mwana mwasi yango te na boumeli ya ntango wana, mpe Mukundbhai ayebaki yango.

Kasi, lobanzo na ye ezalaki nini? Mukundbhai amibanzabanzaki mpamba te andimaka liteya oyo ete moto azongaka na bomoi mbala na mbala, to abotamaka lisusu.a Na yango, soki mbala mosusu bana wana balinganaki mpo ete bazalaki liboso babalani na bomoi mosusu eleka, ekozala likambo mabe mpenza na kokabola bango sikawa lokola bakómi na bambula oyo bakoki kobala. Mukundbhai azalaki bobele na mposa ete mwana na ye ayeba ete mwana mwasi yango alingaki kokóma mwasi ya moto mosusu na bomoi oyo.

Tótalela ndakisa mosusu. Mwana moko moke ya mwasi ya mbula minei oyo mbala mingi azalaki kobangabanga, akɔtaki na lopitalo na engumba Mumbai, na Inde. Mokakatano na ye ezalaki ete mosisa moko ya motema na ye mobebaki. Baboti na ye ya bolingo bayokaki mawa mingi na komona ete mwana na bango azali konyokwama. Kasi bamilobelaki boye: “Tosengeli kondima likambo yango. Na ntembe te asalaki likambo moko na bomoi na ye ya liboso mpo ete mpasi oyo ekómela ye.”

Kondima likanisi ya kozonga na bomoi mbala na mbala ezali na bopusi makasi likoló na bomoi ya bato mingi ya lingomba ya Hindou, ya Bouddha, ya Jain, ya Sikh, mpe mangomba mingi mosusu oyo mauti na Inde. Makambo makómelaka moto na bomoi​—bandá na kolingana ya mwasi na mobali kino na monyoko makasi​—ezali kotalelama lokola mbuma ya etamboli oyo moto azalaki na yango na bomoi na ye eleka, mbala moko to mpe mbala mingi.

Bato mingi mpe na mikili ya Wɛ́sti bazali kolɛngolama na liteya ya kozonga na bomoi mbala na mbala. Shirley MacLaine, mwasi moko mosani na bafilime na Amerika alobaki ete andimaka likanisi yango. Mokomi Laurel Phelan ya Vancouver, na etúká ya Colombie Britannique, na Canada, alobi ete amikundolaka ete liboso abotama azalaki na bomoi mosusu mbala 50. Na Ankɛtɛ moko ya kotuna makanisi ya bato oyo esalemaki na 1994 na lisalisi ya televizyó CNN mpe zulunalo USA Today, mikóló koleka 270 kati na 1 016 balobaki ete bandimaka likanisi yango. Kondima liteya ya kozonga na bomoi mbala na mbala ezali mpe moko ya bindimeli ya lolenge ya kokanisa ebéngami “Nouvel Âge.” Kasi bilembeteli nini bizali kosimba endimeli yango?

Baoyo bandimaka yango balobi ete ezali bongo “komikundola makambo oyo basalaki na bomoi oyo eleka!” Na yango, ntango Ratana, mwana ya mbula misato na engumba Bangkok abandaki “komikundola bomoi na ye oyo eleka lokola mwasi oyo amipesaki na makambo ya Nzambe mpe ete akufaki wana azalaki na mbula 60,” bato mingi oyo bayokaki yango bandimaki yango lokola elembeteli ya bosolo ya liteya ya kozonga mbala na mbala na bomoi.

Nzokande, ntembe ezali naino mingi. Mpe bandimbola mosusu ekoki kopesama na ntina na likambo ya komikundola makambo oyo elobami ete ezali bongo suvenire ya bomoi eleka.b Kati na búku na ye Hinduism: Its Meaning for the Liberation of the Spirit, filozofe ya Lingomba ya Hindou Nikhilananda alobi ete ‘makambo oyo moto asalaki nsima ya liwa makoki komonisama na mayele ya bomoto te.’ Kasi alobi ete “Likoki ezali mingi ete liteya ya kozonga mbala na mbala na bomoi ezala liteya ya solo na esika ete ezala ya lokuta.”

Kasi Biblia ezali kondima liteya yango? Mpe Liloba lipemami na Nzambe lizali kopesa elikya nini mpo na bakufi?

[Maloba na nse ya lokasa]

[Bililingi na lokasa 4]

Azali nde kozwa etumbu mpo na masumu na ye na bomoi eleka?