Masolo ya Basakoli ya Bokonzi

“Kati na zando mokolo na mokolo”

NTOMA Paulo asalelaki mabaku nyonso mpo na kopalanganisa nsango ya Bokonzi. Mpo na koluka bato oyo babongi na nsango malamu, azalaki kososola na Bayuda “kati na eyanganelo . . . mpe kati na zando mokolo na mokolo na bango bakutani na ye.”​—Misala 17:17.

Molende motindo wana ezali elembo ya basambeli ya solo ya Yehova uta ekeke ya liboso T.B. (Matai 28:19, 20) Lelo oyo, Batatoli ya Yehova bazali mpe kosalela myango ndenge na ndenge wana bazali na molende nyonso, kosunga bato ya mitema sembo ete báyeba solo malamumalamu. (1 Timoté 2:3, 4) Lisolo oyo esalemaki na ekólo Australie emonisi likambo yango.

Mikolo mitano pɔsɔ na pɔsɔ, na esika moko oyo engbunduka etɛlɛmaka na engumba Sydney, Sid na Harold, moto na moto na ngala na ye, bazalaki kotanda mwa mesa ya mikanda mikolimbolaka Biblia. Pene na mbula mitano bazali kosakola nsango malamu ya Bokonzi na motindo yango. Sid, oyo azali na mbula 95, alimboli ete: “Ntango nakómaki na mbula 87, nakokaki lisusu kotambwisa motuka te. Yango epesaki ngai mawa, mpamba te nazalaki kolinga kosakola na bisika ya bato mingi. Mokolo moko, wana nakómaki penepene na esika babéngi Echo Point esika baturiste bayaka mingi na egumba Katoomba, namonaki moyemi moko azalaki kotɛkisa bitanda likoló na yango ayemaki banzete. Natalaki etanda yango mpe nalobaki ete, ‘Nazali na bililingi ya kitoko koleka oyo kati na sakosi oyo nasalelaka na mosala ya kosakola—mpe ezali na ntalo moke!’ Bongo, nazwaki ekateli ya kotanda mwa mesa moke, natyaki yango epai baturiste bazalaki mingi, mpe nazalaki kolakisa baleki-nzela mikanda mikolimbolaka Biblia oyo ezali na bililingi ya kitoko oyo Batatoli ya Yehova bazalaki kokabola.

“Esili koleka mbula minei, nakendaki na mesa na engumba Sydney, mpe Harold alandaki ngai. Tozalaki kotɛkisa na mesa moto na moto na ngala na ye, mpe kosala elongo na masangá na biso.” Harold, azali sikawa na mbula 83, alobi ete: “Kobanda mokolo ya yambo kino mokolo ya mitano bato bazalaka mpenza na bandako na bango te. Yango wana, kosakola nsango ya Bokonzi na lolenge oyo ememaka biso esika bato bazali. Solo mpenza, tozali kozwa matomba ya malamu mingi. Tozali kokabola mikanda mingi mpenza na ekólo oyo.”

Sid, alobi ete: “Atako totyaki mesa na bisika minei to mitano bikeseni na boumeli ya bambula, bato baumelaki koyeba biso te. Bato mosusu bayaka epai na biso mpo na koluka mikanda. Basusu bazalaka na mituna oyo balingaka ete bázwa biyano na yango. Mpe bamoko balingaki kosolola na biso bobele na mwa miniti moke.” Na mwa kosɛka alobaki ete: “Ezali bobele na lolenge wana nde nazalaki kosala bozongeli ya sika.”

Harold abakisi ete: “Bato mingi basepelaka na Biblia. Na sanza moko bato minei babandaki koyekola Biblia na Batatoli ya Yehova lokola litomba ya mikanda oyo bazwaki epai na biso mpe na biyano oyo topesaki na mituna na bango na Biblia. Baeksperiansi motindo oyo ezali kolendisa biso mingi.”

Ndenge moko na Sid na Harold—mpe lokola ntoma Paulo—Batatoli ya Yehova na bisika nyonso bazali kosalela mabaku nyonso oyo emonani mpo na kopalanganisa nsango ya bomoi. Na ndenge yango, “nsango malamu” ezali kokoba kosakolama “na mokili mobimba.”​—Matai 24:14.