Kosakola na bazando

NTANGO azalaki na engumba Atene, ntoma Paulo azalaki mikolo nyonso kokende kosakola nsango malamu ya Yesu na zando ya engumba yango. (Mis. 17:17) Paulo aponaki zando mpo ezali esika oyo bato ya Atene bazalaki kolekisa ntango na bango mingi.

Lelo oyo, mbula soki 2 000 na nsima, Batatoli ya Yehova bazali kokoba kosakola nsango ya Bokonzi ya Nzambe na bazando. Mpo na nini? Mpo ezali bisika oyo bato mingi bazalaka. Lelo oyo, zando ekoki kozala esika ya bamagazini. Nsima ya kozwa ndingisa epai ya mokonzi ya zando to nkolo magazini, Batatoli mosusu batandaka mikanda oyo elimbolaka Biblia na mesa moko.

Na ndakisa, na magazini moko na etúká ya New Jersey na États-Unis, batandaki mikanda oyo epesaka malako mpo na mabota. Yango ebimisaki matomba nini? Na mokolo moko kaka, bandeko bakabolaki babuku 153, na minɔkɔ motoba.

Mwasi moko apusanaki penepene na esika oyo batandaki mikanda mpe alandaki na likebi mpenza bandimbola oyo Motatoli moko azalaki kopesa. Mwasi yango andimaki ete ezali mpenza na ntina kosala mokano na Nzambe na kati ya libota. Azwaki mikanda oyo: Yekolá epai ya Moteyi Monene, Sɛkɛlɛ́ ya bolamu na libota mpe Mituna oyo bilenge batunaka​—Biyano bibongi.

Mwa moke na nsima ya midi, mobali moko alekaki pene na esika batandaki mikanda mpo na kokɔta na magazini moko oyo ezalaki pene na yango. Miso na ye ekendeki mbala moko na buku Mituna oyo bilenge batunaka. Ndeko mwasi moko amonaki ete moto yango asepelaki na buku yango. Atunaki ye, “Osepeli na buku moko awa?” Mobali yango andimaki mpe alakisaki ye buku Mituna oyo bilenge batunaka. Ndeko yango apesaki ye buku yango. Mobali yango alobaki ete azali na bana misato. Ntango bazalaki kosolola, mobali yango alobaki ete asololaka na bana na ye mbala moko na pɔsɔ mpe ete bana na ye mibale ya mikóló basilá koleka mbula zomi na mibale. Ntango atalaki makambo oyo ezali na buku yango, alobaki ete akoki kosalela yango na masolo na ye ná libota na ye. Ndeko mwasi alakisaki ye mpe buku Sɛkɛlɛ́ ya bolamu na libota mpe ayebisaki ye ete ezali na mwa batoli kitoko oyo ekosalisa ye ná mwasi na ye mpo bázwaka bikateli ya malamu na libota na bango. Mobali yango asepelaki na buku yango, apesaki likabo mpe andimaki ndeko moko akendaka kotala ye ná libota na ye.

Batatoli yango bayokaki ndenge nini mokolo wana oyo basakolaki na esika wana? Moko na bango alobi boye: “Nasepelaki makasi na lolenge wana ya kosakola. Naino nayoká esengo ya ndenge wana te!” Oyo mosusu alobaki boye: “Yehova alobi ete nsango malamu ekokende tii na esika eleki mosika na mabelé. Lelo oyo, na engumba Paramus, na etúká ya New Jersey, nsango malamu yango ezali kosakolama epai ya bato ya minɔkɔ ndenge na ndenge. Ezalaki esengo monene kosakola na magazini wana. Moto nyonso oyo asakolaki na lolenge wana asepelaki makasi. Na mpokwa, moko te na kati na biso azalaki na mposa ya kozonga ndako.”

Okoki mpe kobongolaka lolenge na yo ya kosakola nsango malamu? Lolenge ya libosoliboso oyo tosakolaka nsango malamu ezali ya ndako na ndako. (Mis. 20:20) Kasi, mpo na nini te kokende mpe kosakola na bazando to na bamagazini?