Asalisaki mingi mpo na kopalanganisa pole “kino na nsuka ya mabelé”
NTOMA Paulo asalelamaki mpo na kopalanganisa pole ya elimo “kino na nsuka ya mabelé.” Na yango, bato mingi “oyo babongi mpo na bomoi ya seko bakómaki bandimi.”—Misala 13:47, 48, NW; Yisaya 49:6.
Mposa makasi ya kopalanganisa pole ya elimo emonanaki mpe epai ya William Lloyd Barry, na bomoi na ye ya moklisto mpe na milende oyo azalaki kosala. Ye azalaki moko kati na Lisangani ya Mikóló-Bakambi ya Batatoli ya Yehova. Ndeko Barry akufaki na mokolo ya 2 Yuli 1999, wana azalaki kosala lisukulu na liyangani ya etúká na Hawaii
Lloyd Barry abotamaki na Nouvelle-Zélande na mokolo ya 20 Desɛmbɛ 1916. Banda kala, mama na ye na tata na ye bazalaki kosepela mingi na solo ya Biblia oyo ezalaki na mikanda ya C.T. Russel, mikanda oyo la Société Watch Tower azalaki kokabola. Na yango, ndeko Barry abɔkwamaki na libota ya baklisto.
Azalaki kosepela mingi na masano mpe na kelasi, azwaki kutu lipɔlɔmi ya iniversite na makambo ya siansi, kasi atako bongo, ndeko Barry abatelaki makasi mposa oyo azalaki na yango na makambo ya elimo. Yango wana, na mokolo ya 1 Yanuali 1939, abandaki mosala ya ntango nyonso, akómaki mosangani ya libota ya Betele na biro ya la Société na Australie. Na mobu 1941, ntango guvɛrnɛma epekisaki misala ya la Société, ndeko Barry akobaki kosala na biro, mbala na mbala azwaki mosala ya kokoma masolo mpo na kolendisa baninga na ye bandimi. Azalaki mpe ndakisa mpo na oyo etali kokamba mosala ya kosakola.
Na Febwali 1942, ndeko Barry abalanaki na mosáli mosusu ya ntango nyonso. Melba, mwasi na ye ya boboto, asalaki na bosembo nyonso elongo na ye na boumeli ya bambula nyonso wana na bisika mingi na mabelé. Libaku oyo bazwaki ya kokɔta kelasi ya 11 ya Gileadi, Eteyelo ya Biblia ya la Société na États-Unis, esalisaki bango mingi mpo na mosala ya kosakola na mboka-bapaya. Batindaki bango na Japon, mboka oyo bato mingi batalelaka lokola “nsuka ya mabelé.” Nsima ya kokóma kuna na sanza ya Novɛmbɛ 1949, babandaki kosala lokola bamisionere na Kobe, engumba ya libongo ya mai monene. Na ntango wana, bobele bato 12 nde bazalaki kosakola nsango malamu na Japon. Ndeko Barry ayekolaki monɔkɔ mpe bomoi ya bato na mboka na ye wana ya sika, mpe azalaki kolinga bato ya Japon mingi, bato oyo asalaki elongo na bango na boumeli ya mbula 25 oyo elandaki. Bolingo na ye mpo na bato “oyo babongi mpo na bomoi ya seko” emonanaki polele ndenge lisangá ya boklisto ekolaki na Japon. Yango esalisaki ye mingi mpo na kokamba filiale ya mboka wana na boumeli ya bambula ebele.
Na katikati ya mobu 1975, ntango Batatoli bakómaki 30 000 na Japon, ndeko Barry na mwasi na ye batindamaki na Brooklyn, na engumba New York. Lokola azalaki moklisto mopakolami, ndeko Barry abyangamaki mpo na kosala na Lisangani ya Mikóló-Bakambi ya Batatoli ya Yehova. (Baloma 8:16, 17) Lokola amesanaki mingi na mosala ya kokoma, yango ezalaki na ntina mingi mpo na mosala na ye ya sika na Département de rédaction. Lisusu lokola amesanaki na misala ya filiale mpe lokola ayebaki mingi makambo ya mikili ndenge na ndenge, yango esungaki ye mpenza na kopesa mabɔkɔ na ndenge ya malamu na Comité d’édition ya Lisangani ya Mikóló-Bakambi.
Na boumeli ya bambula, ndeko Barry azalaki ntango nyonso kolinga mikili ya Ɛsti mpe bato oyo bafandaka kuna. Banakelasi ya Eteyelo ya Gileadi mpe basangani ya libota ya Betele bayebaki ete na masukulu na ye mpe na masolo mosusu azalaki kolobela mingi makambo ya kosimba mitema ya bandeko mingi oyo basalaki mosala ya misionɛrɛ. Mosala ya kosakola Bokonzi kino na “nsuka ya mabelé” ezalaki komonisama polele ntango ndeko Barry azalaki kolobela na esengo nyonso makambo oyo ye moko akutanaki na yango. Ndambo ya makambo yango elobelami na lisolo ya bomoi na ye, oyo ebimaki na Linɔ́ngi ya Mosɛnzɛli ya 15 Sɛtɛmbɛ 1960 na ebimeli ya Lingelesi.
Tondimi ete lokola akozala ‘mosangoli ya libula esika moko na Klisto’ ndeko Barry akolanda komonisa lobanzo oyo azalaki na yango mpo na “baoyo babongi mpo na bomoi ya seko.” Ya solo, liwa na ye epesi mawa na bato nyonso oyo bayebaki ye mpe bazalaki kolinga moto wana ya elimo, oyo amipesaki na motema mobimba epai ya Yehova mpe oyo azalaki kolinga basaleli ya Nzambe mingi. Atako bongo, tozali kosepela na ndenge ndeko Barry ayikaki mpiko mpe azalaki sembo kino nsuka ya bomoi na ye awa na mabelé.—Emoniseli 2:10.
[Elilingi na lokasa 16]
Lloyd Barry mpe John Barr ntango buku “Étude perspicace des Écritures” ebimaki na Lingelesi na 1988
[Elilingi na lokasa 16]
Bato oyo bazwaki mapɔlɔmi na kelasi ya 11 ya Gileadi, bakutani na Japon nsima ya mbula 40.