Mabele ezali se esika ya komeka bato?

MOTEMA ekiti sikoyo! Alongi. Mwanakelasi oyo alekisaki pɔsɔ mibale mobimba na kosala ekzame azwi nsango ya esengo. Sikoyo akoki kobanda mosala na ye oyo alingaka banda kala.

Bato mingi batalelaka bomoi awa na mabele ndenge yango. Bakanisaka ete bato nyonso bayaka awa na mabele mpo na komekama. Baoyo “balongaka,” nsima ya liwa na bango balekaka na bomoi mosusu oyo eleki malamu. Ya solo, ekozala mpenza likambo ya mawa soki bomoi na biso ekosuka kaka na liwa. Biblia elobeli moto moko nkombo na ye Yobo; atako na bambula mingi ya bomoi na ye azalaki nzoto kolɔngɔnɔ mpe azalaki na bomɛngo, moto yango alobaki ete: “Moto oyo abotami na mwasi azali na mikolo mingi te mpe atondi na mpasi.”—Yobo 14:1.

Mokanda moko (New Catholic Encyclopedia) emonisi likanisi oyo bato mingi bazalaka na yango na maloba oyo: “Nzambe akanaki ete moto amona nkembo ya lola. . . . Moto akozala na bolamu soki azwi bisengo ya lola.” Lingomba moko (Église du Christ) eutaki kosala ankɛtɛ moko na États-Unis mpe ankɛtɛ yango emonisi ete na kati ya bato oyo batunaki, mingi (87 %) bandimaki ete soki bakufi bakokende na likoló.

Ata bato mingi oyo bazali baklisto te bakanisaka ete mokolo mosusu, soki bakufi, bakotika mabele mpo na kokende na esika mosusu oyo eleki malamu. Na ndakisa, Bamizilma bakanisaka ete bakokende na paladiso na likoló. Bandimi ya Mokili ya Pɛto (mwa lingomba moko na kati ya Lingomba ya Bouddha na Chine mpe na Japon), bandimaka ete soki moto azali kozongela mbala na mbala liloba “Amida,” nkombo ya Bouddha ya Kongɛnga Oyo Ezangi Nsuka, akobotama na Mokili ya Pɛto, to na Paladiso ya Wɛsti, kuna nde akozala na bolamu oyo eleki bolamu nyonso.

Kasi, Biblia, mokanda oyo ezali na minɔkɔ mingi mpe bato mingi bazali na yango koleka mikanda mosusu nyonso na mokili mobimba, elobi te ete mabele ezali esika ya kofanda mwa moke mpe na nsima koleka. Na ndakisa, Biblia elobi ete: “Bayengebene bakosangola mokili mpe bakofanda wana libela.” (Nzembo 37:29) Na Biblia, tozali mpe kokuta maloba ya Yesu oyo eyebani mingi ete: “Bato ya komikitisa bapambwami: mpamba te bakozwa mabele lokola libula.”—Matai 5:5, King James version.

Ndenge bato mingi bakanisaka ete awa na mabele tozali se baleki nzela, emonisaka ete liwa ezali nzela mpo na koleka na bomoi ya bisengo. Soki ezali mpenza bongo, boye tokoloba ete liwa ezali malamu. Kasi, tokanisi mpenza ete bato mingi bamonaka ete liwa ezali malamu, to balingaka nde ete báumela na bomoi? Makambo oyo eleká emonisi ete ntango azali nzoto kolɔngɔnɔ mpe likambo moko ezali kotungisa ye te, moto alingaka kokufa te.

Atako bongo, lokola bomoi awa na mabele etondi na makambo ya mabe mpe na bampasi, bato mingi bamonaka ete likoló ezali esika se moko oyo bakoki kozwa kimya mpe bolamu ya solosolo. Ezali mpenza solo ete likoló ezali esika ya nkembo na nkembo, ezangi mabe to mobulu? Bomoi nsima ya liwa ekozala kaka na likoló? Mbala mosusu biyano oyo Biblia epesi na mituna yango ekokamwisa yo. Tosɛngi na yo otánga lisolo oyo elandi.