Lisalisi mpo na koyeba Biblia malamu
BIBLIA ekokani na mokanda mosusu te. Bato oyo bakomaki yango balobaki ete bapemamaki na elimo ya Nzambe, mpe makambo oyo ezali na Biblia ezali komonisa ete balobaki solo. (2 Timote 3:16) Biblia elobeli makambo mingi, na ndakisa, ezali komonisa soki toutá wapi, mpo na nini tozali awa na mabele, mpe tokendaka wapi. Ezali mpenza mokanda oyo tosengeli kotyela motema!
Mbala mosusu osilá komeka kotánga Biblia, kasi omonaki ete ezali mpasi mpo na kokanga ntina na makambo ozali kotánga. Mbala mosusu oyebi te soki osengeli kobanda wapi mpo ozwa biyano na mituna na yo. Soki ezali bongo, yebá ete ozali yo moko te. Ozali lokola moto moko oyo azalaki na bomoi na ekeke ya liboso. Moto yango azalaki kotambola na likalo na ye, autaki na Yelusaleme mpe azalaki kozonga na mboka na ye, Etiopia. Azalaki moto monene kuna na Etiopia. Azalaki kotánga na mongongo makasi mokanda ya mosakoli Yisaya oyo ekomamaki soki mbula nkama nsambo liboso.
Na mbala moko, moto moko oyo azalaki kotambola pembeni ya likalo na ye apesaki ye mbote. Moto yango nkombo na ye ezali Filipo, azalaki moyekoli ya Yesu, mpe atunaki Moetiopia yango boye: “Oyebi ntina ya makambo ozali kotanga?” Moto yango azongisaki ete: “Ndenge nini nakoki koyeba yango soki moto alimboli ngai te?” Na nsima asɛngaki na Filipo amata na likalo. Filipo alimbwelaki ye makambo oyo azalaki kotánga mpe asakwelaki ye “Nsango Malamu ya Yesu.”—Misala 8:30-35, Boyokani ya Sika.
Ndenge kaka Filipo asalisaki Moetiopia wana na kokanga ntina ya Liloba ya Nzambe, lelo oyo Batatoli ya Yehova bazali kosalisa bato na kososola Biblia. Bakozala mpe na esengo mingi ya kosalisa yo. Mingimingi, elekaka malamu koyekola Biblia banda na mateya mpenza ya ebandeli. (Baebele 6:1) Ntango ozali kokola, okokóma na makoki ya kolya oyo ntoma Paulo abengaki “bilei makasi,” elingi koloba mateya ya makasi. (Baebele 5:14) Atako ozali mpenza koyekola Biblia, mikanda mosusu oyo elimbolaka Biblia ekoki kosalisa yo mpo na komona mpe kososola bavɛrsɛ ya Biblia na masolo ndenge na ndenge.
Mbala mingi, bokoki koyokana esika mpe ntango oyo ebongi mpo na yo. Bato mosusu kutu bayekolaka na nzela ya telefone. Boyekoli yango ekozala lokola na kelasi te; ekosalema na kotalela manaka oyo yo moko okopesa , okoki mpe kobakisa makambo oyo oyebaki liboso mpe oyo oyekolá na kelasi. Okofuta mbongo te mpo na boyekoli wana ya Biblia. (Matai 10:8) Okosala ekizame te, mpe bakotungisatungisa yo te. Okotuna mituna mpe bakopesa yo biyano, mpe okoyeba ndenge nini okoki kokóma moninga ya Nzambe. Kasi, mpo na nini osengeli koyekola Biblia? Talelá bantina mosusu oyo koyekola Biblia ekoki kobakisa esengo na bomoi na yo.