Mpo na nini? ‘Nzambe, mpo na nini otiki likambo oyo esalema?’

RICARDO akanisaka lisusu ndenge afandaki na mwasi na ye Maria na esika bato ya maladi bafandaka mpo na kozela kokutana na monganga.a Bango nyonso mibale bakokaki te kotánga lokasa oyo bakomaki makambo oyo emonanaki na baekizamɛ oyo bautaki kosala Maria mpo bazalaki kobanga. Nsukansuka, Ricardo afungolaki anvɛlɔpi mpe babwakaki liso nokinoki na makambo yango oyo ekomamaki na elobeli ya minganga. Bamonaki liloba “kanser,” mpe lokola bayebaki likambo oyo bazalaki na yango, bango nyonso mibale babandaki kolela.

Ricardo alobi boye: “Monganga azalaki na boboto mpenza, kasi emonanaki mpenza ete likambo yango ezali monene na miso na ye, mpo azalaki koyebisa biso ntango nyonso ete tosengeli kotika nyonso na mabɔkɔ ya Nzambe.”

Liboso ete bábanda kosalisa Maria na rayon X, monganga na ye amonaki ete lokolo na ye ya mobali ekómaki koningananingana. Ntango basalaki ye baekizamɛ mosusu, eyaki komonana ete kanser yango ekómaki tii na bɔɔngɔ. Nsima ya pɔsɔ moko mpamba, bakataki kosalisa ye na rayon X. Maria azalaki lisusu koyeba ata eloko moko te mpe nsima ya sanza mibale akufaki. Ricardo alobi boye: “Nasepelaki mpo mpasi na ye esukaki, kasi nazalaki kokanisa ye mingi mpenza na ndenge ete nakómaki kutu koyoka mposa ete bomoi na ngai mpe esuka. Nazalaki mbala mingi kotuna Nzambe boye: ‘Mpo na nini otiki likambo oyo esalema?’”

Tomitunaka mituna mingi na ntango ya mpasi

Lokola Ricardo, ebele ya bato na mokili mobimba bazali kokutana na bampasi. Mbala mingi, bato oyo basali ata likambo moko te nde bakutanaka na bampasi. Kanisá naino mpasi makasi oyo bitumba ezali ntango nyonso koyokisa bato. To mpe kanisá naino mpasi oyo ezali na mitema ya ebele ya basi oyo basangisaki na bango nzoto na makasi, ya bana oyo bazali konyokwama, ya bato oyo bazali kobɛtama to kofingama na kati ya mabota na bango, to mpe ya baoyo nyonso basalelamaki makambo mosusu ya mabe. Banda kala, emonani ete basi mpe mibali bazali kosalelana makambo oyo ezangi bosembo mpe bazali koyokisana mpasi oyo ezangi ndelo. (Mosakoli 4:1-3) Tokoki mpe kotánga mpasi ya bato oyo bazali kozwa makama to ya baoyo bazali na bamaladi ya mayoki, ya makanisi to bazali kobɛla maladi mosusu. Na yango, tokokamwa te soki bato mingi bazali kotuna ete: “Mpo na nini Nzambe azali kotika bampasi ya ndenge wana esalema?”

Ata bato oyo basambelaka bazalaka mpe na mokakatano mpo na kondima mpasi. Ntango mosusu, yo mpe okoki komituna mpo na nini Nzambe ya bolingo, mozwi-ya-nguya-nyonso, akoki kotika ete bato bámonaka mpasi. Eyano ya malamu mpe oyo ebongi mpenza na motuna yango ezali na ntina mingi mpo na kopesa biso kimya na makanisi mpe mpo na boyokani na biso na Nzambe. Eyano yango ezali na Biblia. Mpo na koyeba yango, tosɛngi na yo otánga lisolo oyo elandi.

[Maloba na nse ya lokasa]

[Bililingi na lokasa 3]

Monganga azalaki koyebisa biso ntango nyonso ete tosengeli kotika nyonso na mabɔkɔ ya Nzambe