Bato bakoki koumela na bomoi mbula boni?

NA MOKOLO ya 3 Marsi 1513, Juan Ponce de León, moto moko ya Espagne oyo azalaki kotambolatambola mpo na koluka koyeba mokili, abandaki mobembo moko ya ntina mingi. Alongwaki na masuwa na Porto Rico na elikya ya kokóma na Esanga Bimini. Balobaka ete azalaki koluka liziba ya mai moko oyo esalaka likambo moko ya kokamwa: ezongisaka moto elenge. Kasi, akómaki nde na oyo ezali lelo etúká ya Floride, na États-Unis. Amonaki mai yango te mpo ezalaka te.

Lelo oyo bomoi ya bato esukaka mingi kaka na mbula 70 to 80. Atako Biblia elobeli bato mingi oyo baumelaki mingi na bomoi, buku Le livre Guinness des records 2002 elobi ete moto oyo aumelaki mingi na bomoi na mbula yango akufaki na mbula 122 mpe mikolo 164. (Genese 5:3-32) Nzokande, John Harris, moto ya mayele na makambo etali mibeko ya monganga, alobaki boye: “Makambo ya sika oyo bato ya siansi bamoni na boyekoli ya minganga ezali komonisa ete na mikolo ezali koya bakoki kosilisa konuna, ata mpe liwa.” Bato mingi ya siansi na bambula oyo ya 2000 bazali koloba ete “etikali moke bato bakokufa lisusu te,” “tii tókóma na mobu 2099, bomoi ya bato ekozala lisusu na nsuka te,” to “baselile ya moto ekobanda lisusu kotika kobotama te,” mpe maloba mosusu ya ndenge yango.

Na buku na ye The Dream of Eternal Life, Mark Benecke alobaki boye: “Na bomoi ya moto, nzoto na ye mobimba ezongaka sika mbala na mbala. . . . Nsima ya mbula nsambo, nzoto na biso mobimba ekómaka sika.” Kasi, yango esalemaka bongo libela na libela te mpamba te ekómaka na ntango moko oyo baselile ya sika ebotamaka lisusu te. Benecke alobi ete, “soki ezalaki bongo te, nzoto ya moto elingaki kozongaka sika mbala na mbala mpe mpo na ntango molai, ata mpe libela na libela.”

Kanisá mpe makoki ya kokamwa ya bɔɔngɔ ya moto; na bomoi ya mokuse oyo tozali na yango, tosalelaka yango kaka mwa moke mpenza. Buku Encyclopædia Britannica emonisi ete bɔɔngɔ ya moto “ezali na makoki mingi koleka oyo moto asalelaka na bomoi na ye.” (Ebimeli ya 1976, Volimi 12, lokasa 998) Buku How the Brain Learns, ya David Sousa elobi boye: “Makoki ya bɔɔngɔ ya kobomba makambo ezali na nsuka te.”​—Lokasa 78, Ebimeli ya mibale, copyright 2001.

Mpo na nini bato ya siansi oyo bayekolaka nzoto ya moto bamonaka te ntina oyo tokufaka? Mpo na nini bɔɔngɔ ya moto ezali na makoki oyo ezali na nsuka te? Ekoki nde kozala ete tosalemá mpo tóyekolaka makambo ya sika libela na libela? Makanisi ya kozala na bomoi ya seko eutá wapi?

Biblia elobi ete: “Ata likanisi ya bomoi ya seko [Nzambe] asili kotya yango na mitema na bango, mpo bato báyeba te misala oyo Nzambe ya solo asalaki banda na ebandeli tii na nsuka.” (Mosakoli 3:11, NW) Maloba yango emonisi ete Nzambe atyaki kati na mitema na biso mposa ya kozala na bomoi libela na libela. Yango wana, tokozala ntango nyonso na makambo ya koyekola na ntina etali Nzambe mpe misala na ye. Soki tozalaki na bomoi libela na libela, tolingaki ntango nyonso kokoka koyekola makambo mingi mpo na biloko kitoko oyo Nzambe akelá.

Maloba ya Yesu ezali mpe komonisa ete bato bakoki kozala na bomoi ya seko. Alobaki boye: “Oyo elakisi bomoi ya seko, báyekola koyeba yo, Nzambe kaka moko ya solosolo, mpe moto oyo yo otindaki, Yesu Klisto.” (Yoane 17:3) Ezali boni mpo na yo? Olingi kozala na bomoi libela na libela?

[Bililingi na lokasa 3]

Juan Ponce de León akendaki koluka liziba ya mai oyo ezongisaka moto elenge

[Eutelo ya bafɔtɔ]

Ponce de León: Harper’s Encyclopædia of United States History