Mituna ya batángi

Moklisto akoki kozala na lisosoli ya malamu soki andimi mosala oyo esɛngaka kosimba mondoki?

Batatoli ya Yehova nyonso bazwaka na lisɛki te mokumba oyo Nzambe apesá bango ya kokokisa bamposa ya mosuni ya mabota na bango. (1 Timote 5:8) Kasi, basengeli koboya misala mosusu oyo ebukaka mpenza mibeko ya Biblia. Na ndakisa, kosala na bisika oyo basalisaka bato masano ya mbongo, na bisika oyo basalelaka makila na lolenge ebongi te mpe kosala bapiblisite ya makaya. (Yisaya 65:11; Misala 15:29; 2 Bakolinti 7:1; Bakolose 3:5) Kasi, ata misala mosusu oyo Biblia epekisi polelepolele te, ekoki kobebisa lisosoli ya moto ye moko to ya bato mosusu.

Kosala mosala oyo esɛngaka kosimba mondoki to ebundeli mosusu etali ekateli ya moto na moto. Kasi, mosala ya ndenge wana ekoki komema moto na kosopa makila soki esɛngi asalela mondoki na ye. Yango wana, moklisto asengeli kotalela na libondeli, soki akondima mokumba monene oyo ekosenga azwa ekateli nokinoki soki akoki kosalela mondoki na ye to te. Kosimba mondoki ekoki mpe komema moto na likama ya kozoka to kokufa soki bato mabe babundisi ye.

Ekateli ya moto ekoki mpe kosala bato mosusu mabe. Na ndakisa, mokumba ya moklisto ya libosoliboso ezali ya kosakola nsango malamu ya bokonzi ya Nzambe. (Matai 24:14) Akoki nde koteyaka bato mosusu ‘bázala na kimya elongo na bato nyonso,’ ntango ye moko azali kobikela na mosala oyo esɛngaka kosimba mindoki? (Baloma 12:18) Ezali boni mpo na bana to bato mosusu ya libota? Kozala na mondoki na kati ya ndako ekoki kotya bomoi na bango na likama? Lisusu, liponi ya moto moko ekoki kobɛtisa bato mosusu libaku?​—Bafilipi 1:10.

Na “mikolo ya nsuka” oyo, bato mingi bazali “bato ya kongala, bazangi bolingo ya makambo ya malamu.” (2 Timote 3:1, 3) Moto oyo ayebi bongo akoki lisusu ‘Kofundama ata na likambo moko te’ soki aponi mosala oyo esɛngaka kosimba mondoki, oyo ekoki kotya ye na bonguna ná bato ya ndenge wana? (1 Timote 3:10) Soki moke te. Yango wana, bandeko ya lisangá bakoki te kotalela moto ya ndenge wana lokola “moto oyo azangi mbeba” soki azali kokoba kosimba mondoki atako bapesaki ye na bolingo nyonso toli ya Biblia. (1 Timote 3:2; Tito 1:5, 6) Mobali to mwasi ya ndenge wana abongi kozwa mokumba moko te na lisangá.

Yesu alobaki na bayekoli na ye ete soki batye matomba ya bokonzi na esika ya liboso na bomoi na bango, basengeli komitungisa mingi te mpo na biloko oyo basengeli na yango na bomoi. (Matai 6:25, 33) Ya solo, soki totye elikya na biso mobimba epai ya Yehova, “ye akokumba [biso]; libela ye akotika te ete moyengebene atelengana.”​—Nzembo 55:22.