Etamboli malamu ememaka matomba

NA MWA esanga moko oyo ezali na sudi ya Japon, mama moko ná bana na ye misato babandaki koyekola Biblia na Batatoli ya Yehova. Ntango bato mosusu ya esanga yango bamonaki bongo, babandaki kokipe ye lisusu te soki bamoni ye. Alobi boye: “Likambo oyo ezalaki kosala mpasi mingi koleka ezali ete na esika bátyola ngai moko, bakómaki tii kotyola mobali na ngai na bana na ngai.” Atako bongo, ayebisaki bana na ye ete: “Tosengeli kokoba kopesa bazalani na biso mbote mpo na nkombo ya Yehova.”​—Matai 5:47, 48.

Na ndako, ateyaki bana na ye bázalaka na bonkonde atako bato bazali kolinga bango te. Na kati ya motuka, ntango bazalaki kokende kotala maziba oyo ebimisaka mai ya mɔtɔ, bazalaki kopesa bato mbote na nzela ndenge mama na bango azalaki kolakisa bango na ndako. Soki kaka bakɔti na esika ya maziba yango, bana yango bazalaki ntango nyonso koloba na esengo nyonso ete, “Konnichiwa!”​—Elingi koloba “mbote!” Atako bato bazalaki kondima mbote na bango na esengo te, libota yango balɛmbaki te kopesa moto nyonso oyo bakutani na ye mbote. Na ndenge yango, bato bamonaki bonkonde ya bana yango.

Mokemoke, bato bakómaki kondima “Konnichiwa.” Nsima ya mbula mibale, pene na bato nyonso ya engumba yango bakómaki kondima mbote ya libota wana. Bato yango bakómaki mpe kopesana mbote mpe kolingana. Mokonzi ya engumba yango alingaki kopesa bana wana mbano mpo na mosala monene oyo basalaki mpo na mbongwana wana. Kasi, mama na bango alobaki na ye ete basalaki kaka oyo baklisto basengeli kosala. Na nsima, na momekano moko ya masolo oyo esalemaki na esanga yango, mwana moko ya mama yango ayebisaki ndenge mama na ye azalaki kolakisa libota mobimba kopesaka bato mbote na bonkonde atako bato bazali kokipe bango te. Lisolo na ye ezwaki mbano ya monene koleka masolo nyonso mpe babimisaki yango na zulunalo ya engumba yango. Lelo oyo, libota yango bazali na esengo monene ya komona ete kosalela mitinda ya boklisto ebimisaki matomba ya ndenge wana. Kosakwela bato nsango malamu ezalaka mpasi te soki bato yango bazali boboto.