Oyebaka mpenza kosolola?

ELEKI mwa bambula, na Japon, banki moko esalisaki lisano moko; basɛngaki na moto nyonso oyo azali na mbula kobanda 50 tii 60 akoma mokanda ya bolingo epai ya molongani na ye. Mobali moko akomelaki mwasi na ye boye: “Mbala mosusu ekosɛkisa yo, kasi ekozala mabe soki nalobi yango te; yango wana nalobi na mongongo makasi ete: Mersi mingi ndenge ondimaki tóbalana.”

Na bamboka mingi, ata mpe na bikólo mosusu ya Azia, bapekisaka bato bámonisa polele mayoki na bango. Nzokande, bato koleka 15000 basalaki lisano yango. Kutu, lokola bato basepelaki na lisano yango mingi, bazongelaki yango lisusu mpe na nsuka, babimisaki babuku oyo ezalaki na maloba oyo bato yango bakomaki. Likambo yango emonisi ete bato mingi bayokaka mposa ya koyebisa balongani na bango ete balingaka bango mingi. Kasi, ezali mpe na bato mosusu oyo baboyaka kosala yango. Mpo na nini? Mpamba te ekoki kosɛnga moto alongola nsɔni mpe aluka maloba mpo na koyebisa moto mosusu​—na ndakisa molongani na ye—​ete alingaka ye mingi.

Hitoshi Kato, moto moko oyo akomaki buku moko elobeli bato oyo bazwá pansyo, alobaki ete na Japon, mbala mingi basi nde bazali kosɛnga koboma libala mpamba te babombá na mitema makambo ya mabe oyo mibali na bango bazalaki kosalela bango na boumeli ya bambula. Abakisaki boye: “Kasi, ntango mosusu mpe ezali mpo mwasi ná mobali bakokaka kolobana polele te ntango bakutani na mikakatano.”

Ntango mosusu mobali akoki kokamwa ete ntango azwi pansyo, mwasi na ye alobi na ye ete alingi koboma libala. Ekoki kozala ete mwasi ná mobali bafandaki bambula mingi, kasi mokomoko azalaki koloba te makambo oyo azalaki kosepela na yango te. Ntango mosusu, bazalaki komeka komonisa yango, kasi bazalaki kosolola malamu te. Na esika ya kobongisa makambo, bazalaki nde koswana ntango nyonso.

Ndenge nini mwasi ná mobali bakoki kosilisa matata na kimya mpe mokomoko akoki koyebisa moninga na boboto makambo oyo azali kosepela na yango te? Okoki kokanisa ete batoli oyo eleki malamu na likambo yango ezali na buku oyo mopesi-toli moko na makambo ya libala akómi na mikolo na biso; kasi, na ntembe te okosepela koyeba ete ezali nde na Biblia, mokanda moko oyo ekomamá kala oyo bato mingi bapesaka valɛrɛ.