Ozali komikundola?

Osepelaki mpenza na botángi ya banimero ya Linɔ́ngi ya Mosɛnzɛli oyo euti kobima? Na bongo, talá soki okoki kopesa biyano na mituna milandi:

• Ndenge nini Yesu “akobikisa mobola,” ndenge esakolami na Nzembo 72:12?

Ntango Yesu akoyangela, bosembo ekozala mpo na bato nyonso, makambo nyonso ya mabe ekozala lisusu te. Bobola mingi awa na mabelé ezali kouta na bitumba, kasi Klisto akotya kimya ya solosolo. Lokola ayokelaka bato mawa, akosangisa bango bázala liboke moko, mpe bilei ekozala beboo mpo na bato nyonso. (Nzembo 72:​4-​16)​—1/5, lokasa 7.

• Ndenge nini biso baklisto tokoki komonisa ete tozali na “elobeli ya polele”? (1 Timote 3:13; Filemona 8; Baebele 4:16)

Tokoki komonisa yango ntango tozali kosakola na mpiko nyonso, koteya mpe kopesa toli na ndenge oyo ebongi, mpe ntango tozali kobondela Nzambe na elikya ete akoyoka biso.​—5/5, nkasa 14-16.

• Mpo na nini Mibeko elobaki ete makambo lokola kobima mai ya mibali, komona sanza mpe kobota ezalaki kokómisa moto “mbindo”?

Mibeko yango etángaki mbindo, mobali oyo abimi mai ya mibali ye moko, mwasi oyo amoni sanza mpe oyo aboti; yango ezalaki mpo na kosalisa Bayisalaele bázalaka pɛtɔ mpe bázala nzoto kolɔngɔnɔ; ezalaki mpe komonisa bosantu ya makila, mpe ntina ya mbeka mpo na kolimbisama ya masumu.​—1/6, lokasa 31.

• Soki moto alingi kozala na esengo, mpo na nini ekozala malamu atalela mokanda ya Nzembo?

Bakomi ya mokanda ya Nzembo bayebaki ete mpo moto azala na esengo, asengeli kozala na boyokani malamu na Nzambe. (Nzembo 112:1) Bamonisaki ete moto moko te na mokili, ezala moninga to ndeko; eloko moko mpe te, ezala bozwi to makambo minene oyo moto akoki kosala, ekoki kopesa ye esengo oyo ekokani na esengo ya kozala “bato oyo [Yehova] azali Nzambe na bango.” (Nzembo 144:15)​—15/6, lokasa 12.

• Boyokani nini Bayisalaele bazalaki na yango na Yehova?

Na mobu 1513 liboso ya ntango na biso (L.T.B.), Yehova asalaki kondimana na Bayisalaele. (Exode 19:5, 6; 24: 7) Na bongo, Bayisalaele bazalaki kobotama na kati ya ekólo oyo emipesaki na Nzambe. Atako bongo, Moyisalaele mokomoko asengelaki kozwa ekateli ya kosalela Nzambe.​—1/7, nkasa 21-22.

• Mpo na nini tosengeli kosala makambo nyonso “kozanga koimaima”? (Bafilipi 2:14)

Masolo mingi ya Biblia emonisi ete koimaima esalaki mabe mingi kati na libota ya Nzambe. Tosengeli kobosana te mpasi oyo ezaleli ya koimaima ekoki kobimisa lelo oyo. Biso bato ya kozanga kokoka tobendamaka mingi na koimaima, yango wana tosengeli kofungola miso mpo tómonaka mbala moko ntango kaka tobandi kokóma na elimo ya koimaima mpe tókima yango.​—15/7, nkasa 16-17.

• Ndenge nini toyebi ete bwanya oyo elobelami na Masese 8:22-31 ezali mpenza bwanya te, kasi moto?

Bwanya yango “etongamaki,” to ekelamaki na ebandeli ya nzela ya Yehova. Nzambe azali na ebandeli te mpe azalaka ntango nyonso na bwanya; bwanya na ye ekelamaki te. Bwanya oyo Masese 8:22-31 elobeli ezalaki liboso ya Nzambe lokola “kapita-mosali,” yango emonisi ete bwanya yango ezalaki ekelamu ya elimo oyo na nsima akómaki Yesu, oyo asalaki elongo na Nzambe mpo na kozalisa biloko mosusu. (Bakolose 1:17; Emoniseli 3:14)​—1/8, lokasa 31.